Yɔb 30
30
Àgbè nyèa trɔ àyàɖùɖu ɖèɖe
1Vɔ̀ fifìa, ɖèkajɛ kèwo mu ɖo àpe èpè cã òa, le kò mù.
Co sã xoxoa, mù kpɔ be woa tɔwo cã mu jè
la kplɔ̀ àvũ kèwo kplɔ̀nà èlãha nyèwo do ò.
2Ŋusɛ̃ cã mu lè woa si tètè ò,
wo mu ɖo ènu ɖe la jràɖo lè àpe àgbè mè ò.
3Àdɔ̀ kudo èhiã na wo gbɔjɔ eye wo le ji ènu ɖe
ne woa ɖù lè ŋuzĩzĩ be tèpe puplu kèa
4wo sũna ègbe vevewo lè àvewo gbɔ,
wo ɖùnà àti be èkèwo.
5Àmè sia àmè ye nyà wo,
wo le do àpa ɖo woa ta sìgbè fìãfìwo nène.
6Eye wo yì sò kɔpe ɖo bàlì do vìvìti cicriwo mè,
àkpãdo kudo tèpe klìkowo mè.
7Wo yì tɛna ɖo àvewo gɔ̃mè, wo dona àpa
sìgbè èsɔàkɛtɛwo nène lè àŋùjawo dòmè.
8Wo lè sìgbè àmèkpòwo nène.
Wo mu ɖo tèpe ɖe lè ànyigbã ji ò.
*
9Eye fifìa, wo le kpà èhà ɖo ŋuti nyè,
wo kpànà ènyà gbogbowo ɖo ènu nyè.
10Àpe ènu wɔ̀ àtãŋu na wo, eye wo trɔ lè ŋuti nyè.
Wo tuna ètã kɔ̀ ɖo ŋùmè na mù èjì ɖèɖe tɔ̀.
11Kè e nyi be Mawu xɔ̀ ŋusɛ̃ lè àsi nyè, dà mù ɖo ànyigbã a,
wo le wɔ̀ ènu kè jro woa kudo mù.
12Gbɔ nyè gble lo, àmè màɖì ènuwo ye dohùɛ do mù.
Wo le ji be ma jè ànyi, wo le ji ènyà lè ŋuti nyè ne ma gɛ̃.
13Wo tu woabe èhɔ̃wo keŋu, wo le ji la crɔ̃ mù kòkòkò,
àmè ɖekpe mu hiã àlɔ̀do lè woa dòmè ò.
14Wo ɖè èdo gã ɖe ɖo èglì kè wla mù a ŋuti,
eye wo ɖè èmɔ̃ to funu va gbɔ nyè.
*
15Vɔ̃vɔ̃ jè èji nyè, eye e na bùbu nyèa bu keŋu-keŋu zè ɖèka.
Àpe nyɔna klo sìgbè lili nène.
16Eye fifìa, àgbè nyèa le yì,
ŋùkèkè nyèawo lè gbledo mè.
17Lè èzã mèa, mù sènà vève kaka yìnà èpu mè ke,
e nana be nyè mu teŋu dɔ̃na àlɔ̃ ò.
18Mawu jè e ji nyè kudo àdã,
e miɔ̃ èhlò na mù sìgbè àwù èkɔ̀mè miɔ̃-miɔ̃ nène.
19E sɔ mù dãŋùgbe ɖo bàba mè,
mù trɔ sìgbè hũhũ ku àfi nène.
*
20Mawu nyè, mù do àpa le yɔ wò, tɔ̀ na mù jro.
Mù lè ŋùkɔ̀ na wò, vɔ̀ wò mu le kè ènu do mè na mù ò.
21Wò jo le sɛ̃tamè ɖo ŋuti nyè,
wò le wɔ̀ àvũ kudo mù ku àpo ŋusɛ̃a kpata.
22Wò na mù fò toɖo-toɖo eye mù lè àya ji le yì.
Eye wò ci mù lè àya sɛ̃sɛ̃ pòpo mè;
23Ɛ̃ɛ mù nya, wò kplɔ̀ mù le yì na èku,
fikè ye ènu àgbèagbèwo kpata la yì dogò lè.
24Vɔ̀ ne àmè ɖe ŋɛ̃a, mu biɔna àlɔ̀doa?
Lè gbledo mèa, wo mu jina xɔ̀namètɔa?
25Nyè mu fã ɖo àmè kèwo àgbè le ɖèfũ na a taa?
Àmè kè jèhiã mèa be ènu wɔ̀nà ŋuzĩzĩ na mù.
26Mù kã ɖo nyɔna ji sãa, gbledo ye va ɖɔ̀lì ì bòhũ.
Mù le nɔ̀tè kpɔ kɔ̀kɔ̀ɛ, vɔ̀ vìvìti ŋuti ye mù kè ɖo.
*
27Mù kpɔ̀tɔ̀ titɔ ɖo àpe àyàɖùɖu be àgbè kèa ŋuti.
28Mù le zɔ̃, ci kpɔ̃: ɖo kɔ̀kɔ̀ɛ ɖe mu lè na mù ò.
Mù gbà le ji àlòdo lè àmèwo be ŋùkɔ̀.
29Àpadodo nyèwo na be mù trɔ wɛ̀tɛ̀klɛ̀wo be èxlɔ̃
eye mù le doha kudo èglòwo.
30Àgbàze nyè pu lè ŋuti na mù, le ɖù
eye èpu nyèwo le fiɔ̃.
31Èkàsãŋùgu nyè mu teŋu gbà le jì
èhà bu sɔ wu ècɔ be èhàwo ò,
èkpɛ̃ nyèa le jì àvihawo.
Currently Selected:
Yɔb 30: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
