Yudìt 16
16
Yudìt be àyosòso be èhà
1Yudìt gblɔ̃ be:
«Mì to àyosòha ɖèka na àpe
Mawu ku àsihũviwo,
mì jì èhà na Tɔhonɔ̀ ku gàkokoewo,
mì kpà mamlã be kafuha jì na ɛ̀,
mì do è ɖo èji eye mì fã yɔ yebe nyikɔ!
2Ɖo Tɔhonɔ̀ nyi Mawu kè nɔ̀tè àhùawo.
E ɖè mù lè kɛ̃tɔwo be àlɔ̀wo mè,
kplɔ̀ mù gbɔ̀ va yebe àsàɖa mè,
lè yebe dùkɔ̃a be dòdòmè.
3Àsirìa ɖì so àvego be èto nyigbã ji,
e va ku yebe àhùakɔ̃a lè gbɔsùsu mè.
Woabe gbɔsùsua tu èmɔ na ètɔ̀sàsrawo
eye woabe èsɔdotɔwo cɔ̃ ètokɔ̃ɛwo vĩi.
4E be yèa tɔ èzò èdù nyèa,
sɔ crɔ̃ àpe ɖèkajɛwo lè èwui nu,
la xla àpe ànɔnuviwo ɖo ànyigbã,
la sɔ vifɛ̃ nyèwo wɔ̀ àdè be èlã
la sò èkɔ̃ tùgbɛ̀jɛ nyèwo.
5Tɔhonɔ̀, hɔ̃hlɔ̃ keŋu tɔa, tɔ wo tè
to nyɔnù be àlɔ̀ ji.
6Woabe kãlìsuka mu ci ènyà mè
ɖo ɖèkajɛwo simè ò,
àmè kàkò be èviwo mu pò è ò,
àmè jɔ̀asuwo mu pò àvũ ku ì ò,
vɔ̀a Yudìt, Mèrarì be èvi nyɔnùa
ye gbɔjɔ ɛ̀ to yebe ŋùmè be nyɔnyɔa ji.
7E ɖè yebe àhòvɔa ɖɛ
gbìgbɔ̀ fɔ̃ Izràɛl be èfũmɛwo ɖotè.
E sì ànùwɛtrɛ̀ ɖo yebe ŋùmè,
8e sɔ àvɔnu zɛ̃zɛ̃ bla yebe èɖàwo,
e fɔ àvɔ bìɖì bìɖì be àwù kpla, la sɔ flù ì.
9Yebe cokota dɔ̃ àhùaga gã be ŋùkuviwo
eye yebe nyɔnyɔa le èjì na ɛ̀,
e yomèa, èwuia sò èkɔ̀ na ɛ̀!
10Pɛrsìatɔwo hũhũ lè yebe kãlì wɔ̀wɔ mè
eye Medìatɔwo sàvò ɖo yebe èjì dodo ŋuti.
11Gà ŋua mèa dùkɔ̃ nyè kè wo ɖìgbɔa
do àhùa be àpa,
eye Àsirìatɔwo ci jojojoe.
miabe dùkɔ̃ gbɔjɔa ɖè ègbè
eye vɔ̃vɔ̃ jè woa ji.
12Sìgbè nyɔnù gblɔ̀ɛwo be èviwo nènea,
mi sɔ ènu ŋɔ wo jè e godo,
Mi do èkubi woa ŋuti
lè woabe sisiwo mè.
Wo crɔ̃ lè Tɔhonɔ̀ nyèa
be àhùa kpekpe na wo mè.
13Mù la jì èhà yeye na àpe Mawu,
Tɔhonɔ̀, wò lòlò gbà trì àkɔ,
ŋùdãtɔ to hɔ̃hlɔ̃ mè,
wo mu la teŋu ɖù èji wò ò.
14Nuɖoɖo ɖe sia ɖe ne sumɔ wò,
wò pò nupo eye ènua va jɔ̀,
wò dɔ̃ àpo gbɔ̃gbɔ̃a ɖoɖa eye e ɖo wo.
Àmè ɖekpe mu lè kè la teŋu gbe àpo ègbè ò.
15Ètowo la hɔ̃ to so woabe dodoewo mè
la caka ku èsìwo, àkpãwo
la srè sìgbè ànyi be àgbà nène lè àpo ŋùmè.
Vɔ̀a àmè kèwo ɖona sisi na wòa,
wò kpɔna ŋùjèje lè woa mè.
16Ɖo vɔsawo kpata hùe àkpa
ne bèa la huɛ̃ titi jèŋùmè
eye àmì be tèpewo kpata kè wo fiɔ̃a
mu sù ènu ɖe lè àpo ŋùmè ò.
Vɔ̀a àmè kè ɖona sisi
na Tɔhonɔ̀a, lè gãa tɛ̀gbɛ̀.
17Bàbà na dùkɔ̃ kèwo sinatè ɖo àpe kɔ̀ta ŋuti.
Tɔhonɔ̀ ŋusɛ̃kpatatɔa la biɔhlɔ̃ lè kòjoɖoɖo zãgbè,
la sɔ èzò ku èŋɔviwo ɖo woabe ŋutilãwo mè,
eye wo la nɔ fã àvi ku vevesèse kaka sɔ yì.»
18Kè wo va ɖo Yeruzàlɛm vɔ̀a, wo yì do ènu gũ na Mawu lè mawuxɔa mè. Wo kɔ̀ woa ɖokoe ŋuti, eye wo wɔ̀ woabe numème, èjronyuɛ̃ ku ènunana vòvòwo be vɔsawo. 19Yudìt sɔ Hòlofernɔ̀ be ènu kèwo kpata dùkɔ̃a na ɛ̀a, sɔ ɖo àhovìnu lè mawuxɔa mè. So muɖɔ kè be sɔ na ye ɖokoe, lè yebe xɔ̀dɔ̃mɛ mèa ŋutia, e sɔ ɛ̀ na Mawu, ɖo àhovìnu nu. 20Dukɔ̃ bliboa nɔ̀ jìjɔɛ mè lè Yeruzàlɛm lè kɔ̀kɔɛpea be ŋùkɔ̀a kaka na wètri ètɔ̃ eye Yudìt nɔ̀ woa gbɔ.
Yudìt be àgbèa be vɔ̀vɔnu
21Lè ŋùkèkè ŋuawo yomèa, àmè sia àmè gbìgbɔ̀ trɔ yì yebe crɔ̃ nyigbãa ji. Yudìt so yì Betulìa eye be ci yebe àxomè. Yebe nyikɔ yì ji lè yebe hùenu lè èdù bliboa mè. 22Àmè sùgbɔ ji la nɔ̀ kudo è, vɔ̀a ŋusù ɖekpe mu gbà do è àta kpɔ so gà kè mè èsrɔ̃a Manasè ku gble è ɖɛ eye be trɔ va yebe dùkɔ̃a gbɔa ò. 23E sĩ lè gogo gãaɖe mè eye e va ku nyagã lè èsrɔ̃a be àxomè kaka be ɖo èpè èkà èvè takpo ci àtɔ̃ (105). E ɖo yebe nyɔnù sumɔvia ye ɖokoe sinu, eye e ku lè Betulìa. Wo ɖì ì ɖo èsrɔ̃a Manasè be èyɔ̀do mè. 24Izràɛl be àxuedoa wɔ̀ yebe ècɔa na ŋùkèkè adrɛ̃. Gbɔ̀xue be la kua, e ma yebe àdɔ̀kùnuwo na èsrɔ̃a Manasè ku ye ŋutɔ be xòmètɔwo. 25Àmè ɖekpe mu gbà do ŋùklɛ̃ na Izràɛlviwo lè Yudìt be ŋùkèkèwo mè kaka jè ŋùkèkè sùgbɔ fuu lè yebe èku yomè kpɔ ò.
Currently Selected:
Yudìt 16: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.