Yudìt 13
13
Yudìt wù Hòlofernɔ̀
1Kè èzã sĩ vɔ̀a, yebe sumɔviwo ɖèbla jo. Bagòa tu gòxɔa so xixenu, e dɔ̃ àmèɖiatɔwo jo lè yebe àpetɔ gbɔ eye wo jo yì mlɔ̃ ànyi. Nyàwoa, ènu tìkɔ̀ na woa kpata, ɖo wo nù àhà sùgbɔ ŋutɔ. 2Wo gble Yudìt ɖèka ɖɛ lè gòxɔa mè ku Hòlofernɔ̀, e jè ŋɛ̀sì jàkà lè yebe àbaa ji, mu àhà ci e mè bòbò. 3Yudìt gblɔ̃ na yebe sumɔvia be ne nɔ̀ xɔ̀dɔ̃mɛ be xixea nu eye ne nɔ̀ ŋùzɔ̃ na yè be toto sìgbè gbè sia gbè nène; eŋua ye e gblɔ̃ ɖɛ be yè la to yì fãkue. E pò nène be nupo na Bagòa. 4Àmèwo kpata dɔ̃ yì jo lè yebe ŋùkumè eye àmè ɖekpe, sɔ so àmè màɖinyi ji kaka jè àmè ɖinyi jia, mu ci xɔdɔ̃mɛa mè ò. Yudìt tɔtè lè Hòlofernɔ̀ be àbàtia gbɔ, e gblɔ̃ lè yebe èjì mè be: «Tɔhonɔ̀, ŋusɛ̃ ɖe sia ɖe be Mawu, ɖèkɔ̀ kpɔ àlɔ̀ nyèwo be èdɔwɔ̀wɔ ɖa fifì ɖo Yeruzàlɛm be bùbu xɔ̀xɔ ŋuti. 5Ɖo fifìa gàmè sù ne wòa hlùɛ̃ àpo dùkɔ̃a gã. Na be àpe ɖoɖo sɔ gbã kɛ̃tɔ kèwo sitè ɖo mia ŋutia, ne zɔ̃ sùu.» 6Kpòa, Yudìt zɔ̃ tùtà àba be sɔti kè lè Hòlofernɔ̀ be ètagbea, e dɔ̃ yebe èwuia. 7E gogo àbàtia, e le Hòlofernɔ̀ be èɖàa, gblɔ̃ be: «Do mù ŋusɛ̃ egbèa, Tɔhonɔ̀ Izràɛl be Mawu!» 8Ku yebe hɔ̃hlɔ̃a kpata, e dà èwuia ɖo yebe èkɔ̀a ji zè èvè eye be ɖè èta na ɛ̀. 9E yomèa, e mlì yebe ŋutilã jo lè mlɔ̃pea sɔ ɖo àbàtia gɔ̃mè eye e ɖè muɖɔa jo lè sɔtiawo ŋuti; zãɖea, e to eye e sɔ Hòlofernɔ̀ be èta na yebe sumɔvi nyɔnùa. 10Sumɔvi kèa sɔ ɛ̀ butu ɖo nuɖùɖu be àkpòa mè. Eye wo àmè èvèawo to jo ɖo du sìgbè àlekè wo wɔ̀nà xoxo yì fãnàkuea nène. Wo to àsàɖa mè va yì, zɔ̃ trɔ do èsìsràdo, lia Betulìa be ètoa ji eye wo va ɖo yebe àgbowo nu. 11Yudìt pò nu so dìdìpe ɖoɖa àmè kèwo le ɖia àgboawo be: «Mì hũ ì, mì hũ àgboa. Mawu, miabe Mawua, lè mia ji sɔ yebe hɔ̃hlɔ̃ fiɔ lè Izràɛl ku yebe ŋusɛ̃a ɖo miabe kɛ̃tɔwo ji sìgbè àlekè be wɔ̀ ɛ̀ egbèa nène!» 12Wàlɛbɛ kè yebe èdùa be ŋusùwo sè yebe ègbèa, wo ɖèbla ɖì yì èdùa be àgboa nu; wo yɔ èdùa mè be àmègãwo bɔ̀. 13Eye woa kpata pudù, so vifɛ̃ ji kɔ̀ ɖo àmè sĩsĩwo ji, ɖo yebe tɔtrɔ gbɔ̀a wɔ̀ ŋùdã na wo; wo hũ àgboa, wo xɔ̀ wo, wo sũ èzò bèa na kɛ̃klɛ̃ eye wo dotò do wo. 14E gblɔ̃ na wo ku ègbè sɛ̃sɛ̃ɖe be: «Mì kafu Mawu. Mì kafu ì. Mì kafu Mawu àmè kè mu ɖè yebe xòmèfalɔ̃lɔ̃a jo lè Izràɛl be àxuedoa ji ò, vɔ̀a tùkù miabe kɛ̃tɔwo to àlɔ̀ nyèa ji èzã kèa mè.» 15E yomèa, kè be ɖè ètaa to lè àkpòa mèa, e sɔ ɛ̀ fiɔ wo eye e gblɔ̃ na wo be: «Hòlofernɔ̀, Àsirìa be àhùakɔ̃a be àhùaga gãa be èta ye, eye mudɔ kè gɔ̃mè e mlɔ̃ lè yebe àhàsu nùnu mèa ye kè. Tɔhonɔ̀ pò è to nyɔnù be àlɔ̀a ji. 16Mù tà Tɔhonɔ̀ be àgbè, e ya àmè kè kpɔ ji nyè lè èmɔ kè mù zɔ̃a mè, àpe ŋùmè ble na yebe cɔ̃crɔ̃, nuvuɛ̃ ɖe màwɔ̀ kudo mù, la pòɖi mù sɔ do mù ŋùkpɛ̃ ò.
17Dùkɔ̃ bliboa be ènu ku ɖotè keŋu keŋu; kè wo do èta gũa, wo sɛ̃ Mawu eye wo gblɔ̃ gbèkpli gbekpli be: «Wo ne mlã wò, oò miabe Mawu, èwò kè crɔ̃ àpo dùkɔ̃ be kɛ̃tɔwo egbèa.»
18Ozìas gblɔ̃ na ɛ̀ be: «Mawu jihũitɔa tusì na wò, èvi nyè nyɔnùvi, sɔ wu nyɔnù kèwo kpata lè ànyigbã ji. Gogo na Tɔhonɔ̀, àmè kè ɖo jiŋùkusi ku ànyigbã, àmè kè kplɔ̀ wò yì ɖè èta na miabe kɛ̃tɔwo be àhùaga gãa. 19Wo mu la ŋlɔ̀be lekè wò dojì nɔ̀ ŋùɖo mè ò; àmèwo la nɔ ɖoŋùku Mawu be èdɔ ɖìnyi kèa kòɖò. 20Mawu ne na woa kɔ wò ɖo ji wè sia wè eye bèa va ji wò kpɔ ku yebe àdɔ̀kùnuwo, ɖo wò mu gbe àpo àgbèa ɖo miabe kɔ̀ta be ŋùkpɛ̃ ɖùɖua ŋuti ò, vɔ̀a wò kpe àkɔ miabe ànyijèje sɔ zɔ̃ èmɔ tututu lè ŋùkɔ̀ na miabe Mawu!» Eye dùkɔ̃ bliboa gblɔ̃ be: «Àmèn! Àmèn!»
Currently Selected:
Yudìt 13: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.