Yudìt 12
12
Hòlofernɔ̀ nù àhà mu
1E ɖègbè be woa kplɔ̀ ɛ̀ yì àfikè wo ɖo yebe klòsalò be àgbãwo ɖo eye e dɔ̃ be woa sɔ yèbe nuɖùɖuwo ku yebe vɛ̃ nùnua va na ɛ̀. 2Vɔ̀a Yudìt gblɔ̃ be: «Nyè mu la ɖù ènu ɖe ne bèa va nyi ànyijèje ò, vɔ̀a ènu kè mù sɔ ɖo àsi va ye la hɛ̃ mù.» 3Hòlofernɔ̀ gblɔ̃ na ɛ̀ be: «Ne ènu kèwo lè àsi wò va vɔ̀a ɖe, fikɛ mi la kpɔ ekèa hatiwo sɔ na wò ò? Ɖo àpo kɔ̀ta be èvi ɖekpe mu lè kudo mi ò?» 4Yudìt gblɔ̃ na ɛ̀ be: «Mù tà àpo àgbè, tɔhonɔ̀ nyè, àpo sumɔvia mu la ɖù ènu kè lèa kaka bèa vɔ̀ gbɔ̀xue Tɔhonɔ̀ la wɔ̀ ènu kè be ɖo ɖɛa to ji nyè ò.»
5Hòlofernɔ̀ be àhùakplɔ̀tɔwo kplɔ̀ ɛ̀ yì gòxɔa mè eye e dɔ̃ àlɔ̃ kaka èzã dòmè. E fɔ̃ lè fɔ̃fɔ̃mè gbɔ̀xue èŋù kè. 6E dɔ̃ woa gblɔ̃ na Hòlofernɔ̀ be: «Tɔhonɔ̀ nyè ne ɖègbè be wo ne ɖè èmɔ na àpo sumɔvi nyɔnùa bèa to yì fãkue.» 7Eye Hòlofernɔ̀ do èse na yebe ɖiatɔwo be wo mu gbà xe èmɔ na ɛ̀ ò. E nɔ̀ àsàɖa mè xɔ̀ ŋùkèkè ètɔ̃. Lè èzã mèa e to yìnà Betulìa be bàlìa mè, eye e yì lènà èsì lè àsàɖaa be èsìjɔ̀pea to. 8Ne e trɔ le lia bàlìa, e fãnàkue na Tɔhonɔ̀, Izràɛl be Mawua ne bèa jɔ̀ yèbe èmɔa na yebe dùkɔ̃a be èviwo be gbìgbɔ̀ fɔ̃ ɖotè. 9Ne e yì lè ye ɖokoe ɖì, trɔ gbɔ̀a, e cina yebe gòxɔa mè, kaka wo hɛ̃nà yebe nuɖùɖua vana na ɛ̀ lè fiɛ̃si mè.
Hòlofernɔ̀ ɖo ènuɖùɖu be èkplɔ̃
10Ŋùkèkè ènɛ̀gɔ̃a gbèa, Hòlofernɔ̀ ɖo àzãɖùɖu na yebe sumɔviwo kpò eye mu kpe yebe àsàfòhliwo dòmètɔ ɖe ò. 11E gblɔ̃ na Bagòa, kobonɔ̀ kè kpɔna yebe ènyà vevewo jia be: «Yì dogbè èto mè na nyɔnù Hebrùvi ŋua kè lè gbɔ wòa, ne bèa va mia gbɔ, bèa ɖùnu eye bèa nù àhà kudo mi. 12Ɖoa ŋùkpɛ̃ la ke cɔ̃ ŋùmè na mi ne mia tàsi nyɔnù kèa hati ɖɛ ye mi mu ɖù plàsi le e ŋuti òa. Ɖo ne mi mu dɔ̃ ɛ̀ va òa, e la va kò mi.»
13Bagòa to lè Hòlofernɔ̀ gbɔ eye be yì ɖo eya gbɔ eye e gblɔ̃ na ɛ̀ be: «Sumɔvi nyɔnù fɔwumɛ kèa, mù gbà le ɖokoe wò ne wòa va ɖo àpetɔ nyèa gbɔ ò. Wò la xɔ̀ bùbu lè ŋùkumè na ɛ̀, la nù àhà kudo mi lè jìjɔɛ mè eye egbèa wòa trɔ sìgbè Àsirìa be nyɔnùviwo dòmètɔ ɖèka nène, àmè kèwo nɔ̀nà Nèbùkàdnɛzà be àxomè.» 14Yudìt gblɔ̃ na ɛ̀ be: «Àmè kɛ mù nyi ne ma sitè ɖo àpetɔ nyèa ŋuti ò? Ènu ɖekpekpe kè jènà ŋùmè na ɛ̀a, ye mù la ɖèbla wɔ̀ eye jìjɔɛ la nyi na mù kaka na àpe èku gbè.»
15E sitè, fɔ̀ yebe àwùwo ku yebe nyɔnù be àcɔɖonuwo kpata sɔ kpla; yebe sumɔvi nyɔnùa jè ŋùkɔ̀ na ɛ̀, eye e sɔ èlãgbàze kèwo ye be xɔ̀ lè Bagòa si na yebe zãzã gbè sia gbètɔ̀a vlũ ɖo ànyigbã lè Hòlofernɔ̀ be ŋùmè ne bèa teŋu drɛ̃ ɖo e ji sɔ ɖùnu. 16Yudìt gɛ̃ ɖo e mè eye e drɛ̃ ɖo èlãgbàzea ji. Hòlofernɔ̀ be èjì tà to ekèa ji eye yebe susu mè titɔ. E jro veveɖe ŋutɔ la dɔ̃ kudo è. E le ɖia èmɔ kè ji be la gble è lè so kaka gbè kè gbè be kpɔ ɛ̀a. 17Hòlofernɔ̀ gblɔ̃ na ɛ̀ be: «Nù àhà eye nɔ̀ jìjɔɛ mè kudo mi!» 18Yudìt ɖo e ŋuti na ɛ̀ be: «Eŋua ma nù, àpetɔ, ɖo nyè mu xɔ̀ bùbu lekea kpɔ lè àpe àgbènɔ̀zãwo mè kpɔ ò.»
19Kè be xɔ̀ ènu kè yebe sumɔvi nyɔnùa ɖà na ɛ̀a, e ɖùnu eye be nùnua kpã ŋùkɔ̀ ɛ̀. 20Hòlofernɔ̀ lè jìjɔɛ mè, xàɖo e ŋuti eye e nù vɛ̃ sùgbɔ, sɔ wu kè mu nù kpɔ lè ŋùkèkè ɖèka pɛ mè so gbè kè gbè wo jìa ò.
Currently Selected:
Yudìt 12: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.