Yakobò 5
5
Pòpòfiɔ na àdɔ̀kùnɔ̀wo
1Fifìa mì, àdɔ̀kùnɔ̀wo, mì fã àvi, eye mì kpà àbòbo, ɖo àyàɖùɖu jiŋɔ, kè gbãnà mìa jia ŋuti. 2Mìabe àdɔ̀kùnuwo nyìnyɔ̀, eye èŋɔwo ɖù mìabe àwùwo keŋu-keŋu. 3Mì bɔ̀ àdɔ̀kùnuwo na àzã mlɛ̃awo! Mìabe sìka ku klòsalò jè àkaɖa, eye àkaɖa ŋua la ɖù ɖase so mìa ŋuti. E la ɖù mìabe ŋutilã sìgbè àlekè èzò fiɔ̃na ènu nène. 4Mì miɔ̃ àsi ɖo àmè kèwo dè àgblè na mìawo be fɛ̃tu ji. Wo le na àle, eye Tɔhonɔ̀, Àhùadù Mawu a sè woabe àlenana. 5Mì ɖù àgbè sɔ ènu xɔ̀asìwo do jìjɔɛ na mìa ɖokoewo lè àgbè kèa mè. Mì ɖù ènu, do àmì ɖɛ na gbè kè gbè wo la wù mì, sìgbè àleke wo wùnà èlã lè èlãwùpea nène. 6Mì wɔ̀ màjɔ̀ màjɔ, mì wù àmè jɔ̀jɔɛa, eye mu sitè ɖo mìa ŋuti ò.
Mì gbɔ̃jì ɖɛ, eye mì fãkue
7Ye ŋutia, nɔ̀vi nyèwo, mì gbɔ̃jì ɖɛ kaka na àzã kè gbè Tɔhonɔ̀ la vaa. Mì kpɔ àlekè àgblè dàtɔ gbɔ̃nà èjì ɖɛ kaka na gà kè mè ànyigbã nana ènuku xɔ̀ àsìawo ɖa! E nya be kèlè kudo zòzo hùenu be èjiwo la jà keŋu gbɔ̀xue. 8Mìawo cã mì gbɔ̃jì ɖɛ blɛ̀wù nènea ke. Mì dojì, ɖo, Tɔhonɔ̀ be vava be hùenu ɖo vɔ̀.
9Mì mu gbà ɖùse ɖo mìa nɔ̀nɔwo ŋuti ne Mawu ne ɖo kòjo kudo mì ò. Kpɔɖa, kòjoɖotɔa va ɖo. 10Nɔ̀vi nyèwo, mì ɖo ŋùku Mawu be gblɔ̃ɖɛtɔ kèwo pò nupo lè Tɔhonɔ̀ be nyikɔ mèawo ji. Mì na be, àlekè wo dojì kpe èfũa, ne nyi kpɔwɔɛ na mì. 11Kpɔɖa, mi kafuna, eye mi bùnà àmè kèwo dona jìawo, sìtumewo. Mì sè àlekè Yɔb dojìa, eye mì kpɔ ènu kè Mawu ɖo ɖɛ na ɛ̀ lè ènuwuwua. Tɔhonɔ̀ kpɔna ɖo e mè na àmè, eye e kuna ŋuzĩzĩ na àmè.
12Vevetɔa, nɔ̀vi nyèwo, mì mu gbà nɔ tà jiŋùkusi ò, mì mu gbà tà ànyigbã ò, eye mì mu gbà tà ènu bu cã ò. Mìabe “Ɛ̃” ne nyi ɛ̃, eye mìabe “Ò” ne nyi ò, àleke be Mawu mu gbà gblehùɛ do mì ò.
13Ne àmè ɖe lè kpe èfũ lè mìa dòmèa, ne fãkue. Ne èjì le jɔ̀ àmè ɖe lè mìa dòmèa, ne jì kafu be èhàwo. 14Ne àmè ɖe le èdɔ̀ lè mìa dòmèa, ne yɔ èhamèmègãwo ne woa va fãkue ɖo e ta, eye woa sì àmì na ɛ̀, lè Tɔhonɔ̀ be nyikɔ mè. 15Kuefã kè wo wɔ̀ kudo xɔ̀sè ɖo èdɔ̀nɔ̀a taa, la na yebe lãmè la xaya, eye Tɔhonɔ̀ la fɔ̃ ɛ̀ ɖotè. Ne e wɔ̀ èvuɛ̃ cã a, Mawu la sɔ ɛ̀ kè è. 16Ye ŋutia, mì hũ mìabe èvuɛ̃wo mè na mìa nɔ̀nɔwo, eye mìa fãkue ɖo mìa nɔ̀nɔwo ta, be Mawu ne dà èdɔ̀ na mì. Àmè jɔ̀jɔɛ be kuefã wɔ̀nà èdɔ ku ŋusɛ̃. 17Èli a, àgbètɔ kpò be nyi sìgbè miawo ke nène. Vɔ̀a, kè be fãkue veku-veku be èji mù gbà jà òa, èji mu jà ɖo ànyigbã ji ò, èpè ètɔ̃ ku èfã sɔ̃ŋu! 18Eye kè e gbà fãkuea, jiŋùkusi na èji jà, eye ànyigbã na yebe èkusɛ̃sɛ̃.
19Nɔ̀vi nyèwo, ne mìa dòmètɔ ɖe trã èmɔ jo lè nyàwo a gbɔ, eye àmè bu gbà kplɔ̀ ɛ̀ vaa, 20mì nya be, àmè kè la kplɔ̀ èvuɛ̃wɔ̀tɔ so yebe èmɔtãtrã ji gbɔ̀a, la hlùɛ̃ yebe èklaa gã so èku mè, eye e la klo ènuvuɛ̃ sùgbɔ jo.
Mina Bible © Bible Society of Togo, 2014.