Yakobò 4
4
Xixea lɔ̃lɔ̃
1Nukɛ hɛ̃nà àhùa wɔ̀wɔ ku àjrè wɔ̀wɔ ɖona mìa dòmè ò? Mu nyi ènu vuɛ̃ kèwo jrona mìabe ŋutinuwo ye hɛ̃nà wo vaa? 2Mì le bìaŋù, eye ènu mu sù mìa si ò. Mì le wù àmè, mì le hùãŋu, eye mì mu teŋu le ɖùji ò. Mì le wɔ̀ àvũ, mì le wɔ̀ àhùa, ènu ɖe mu sù mìa si ò, ɖo mì mu le biɔ ò. 3Mì le biɔ ènu, eye mì mu le kpɔ xɔ̀ ò, ɖo mì mu biɔna kudo susu nyuɛ̃ ò. Mì biɔna, àleke be mìa sɔ ɛ̀ do jìjɔɛ na mìa ɖokoewo kpò. 4Mì, àmè mà wɔ̀ ànùkuawo! Mì mu nya be àmè kè jè èxlɔ̃ xixea, sɔ ye ɖokoe wɔ̀ Mawu be kɛ̃tɔa? Ye ŋutia àmè sia àmè kè jro be ye à jè èxlɔ̃ xixea, sɔ ye ɖokoe wɔ̀ Mawu be kɛ̃tɔ. 5Mì susu be gbalo ye wo ŋlɔ̀ ɖɛ be: “Mawu huãnàŋu veve ɖe ɖo yebe gbɔ̃gbɔ̃ kè be sɔ do mìa mèa nua”? 6Vɔ̀a màje kè Mawu nana mia wu ènuwo keŋu, ye ŋuti wo ŋlɔ̀ ɖɛ be: “Mawu sinatè ɖo àmè kèwo yinagòawo ŋuti, eye e kuna ŋuzĩzĩ na àmè kèwo bɔ̀bɔ̀nà woa ɖokoewoa.”
7Ye ŋutia mì bɔ̀bɔ̀ mìa ɖokoe ɖo Mawu be gɔ̃mè. Mì sitè ɖo Àbòsam ŋuti, ne bèa si jo lè mìa gbɔ. 8Mì dɔ̃ gogo Mawu, eye e la dɔ̃ gogo mì. Mì lè mìa ɖokoewo ɖì, mìa èvuɛ̃wɔ̀tɔwo! Mì àyè èvètɔwo, mì lè mìabe èjìwo ɖì! 9Mì sè veve; mì lòfũ; mì fã àvi. Mì na mìabe ènukòko ne trɔ zũ èfũlòlo, eye mìabe jìjɔɛ kpɔkpɔ ne trɔ zũ àkpɔ̃. 10Mì bɔ̀bɔ̀ mìa ɖokoe lè Tɔhonɔ̀a be ŋùmè, ne bèa kɔ mì yìji.
Mù gbà ɖo kòjo na nɔ̀vi wò Kristòtɔ̀ ò
11Nɔ̀vi nyèwo, mì mu gbà gblɔ̃ ènyà kè mu jè òa ɖo nɔ̀vi ŋuti, àlo mìa ɖo kòjo ku nɔ̀vi ò. Àmè kè gblɔ̃ ènyà kè mu jè òa ɖo nɔ̀via ŋuti, àlo kè ɖo kòjo ku nɔ̀via, e gblɔ̃ ènyà kè mu jè òa ɖo èsea ŋuti, eye e ɖo kòjo ku èsea. Vɔ̀a, ne wò ɖona kòjo ku èsea, eŋuã wò mu nyi *èse ji wɔ̀ɖotɔ ò, vɔ̀ bòhũa yebe kòjoɖotɔ ye wò nyi. 12Mawu kpò ye nyi èsedotɔ kudo kòjoɖotɔ. E ye kpò ye nyi àmè kè teŋu hlùɛ̃nà àmè gã, eye e gbà teŋu crɔ̃na àmè cã. Àmè kɛ ye wò nyi, le ɖo kòjo kudo èhavi wò ò?
Mù gbà fìã ɖo èsɔ̀ kè gbãnà a nu ò
13Fifìa, mì ɖo èto mù, mì àmè kèwo gblɔ̃nà be: “Egbè, àlo èsɔ̀a, mi la yì èdù kèa, àlo eŋuã mè. Mi la nɔ̀ funua, èpè ɖèka, la sà àsì eye mi la ɖù àlèa”. 14Mì nya ènu kè la jɔ̀ èsɔ̀a? Mì nya ènu kè àgbè kè mì lèa nyia? Àzìzɔ kè zena gàmè kpòe ɖe kpò, gbà bunaa ye mì nyi. 15Lè ènyà kèa be gbɔ̃gblɔ̃ tèpea, e jè be mìa gblɔ̃ bòhũ be: “Ne Mawu jro a, mi la nɔ̀ àgbè, eye mi la wɔ̀ ènu kèa àlo eŋuã.” 16Vɔ̀ sìgbè àlekè be lè nènea, mì kãna ɖo ènu ji kpò, fìãnà gbalo. Àdã kãkã kèa hati nyi èvuɛ̃.
17Ye ŋutia àmè sia àmè kè nya ènu nyuɛ̃ wɔ̀wɔ, eye mu wɔ̀nà ɛ̀ òa, e wɔ̀ ènuvuɛ̃.
Mina Bible © Bible Society of Togo, 2014.