Ezayà 65
65
Tɔhonɔ̀ la ɖokòjo ku yebe dùkɔ̃a
1Tɔhonɔ̀ gblɔ̃ be: Mù ɖè ɖokoe nyè fiɔ
àmè kèwo mu jina mù kpɔ òa;
eye mù na àpe èsìkɔ tì àmè kèwo
mu biɔna mù ènyà ɖe sè òa.
Mù gblɔ̃ na dùkɔ̃ kè mu yɔna àpe nyikɔ òa be:
“Mù lè fikèa, ènyè ye kè!”
2Mù kè àpe àlɔ̀wo ɖotè na dùkɔ̃ mà-wɔ̀ ànùkua,
na àmè kèwo kpɔ̀tɔ̀ lè èmɔ̃ bàɖà ji
eye wo le wɔ̀ ènu kè jro woa.
3Dùkɔ̃ kèa le tè mù kpɔ lè gàglàgbè.
Wo le wɔ̀ vɔsa lè àbɔwo mè.
Wo le tɔ èzò lifiwo lè èkpewo ji na vòduwo.
4Wo nɔ̀nà ànyi ɖo èyɔ̀dowo mè,
wo nɔ̀nà àkpãdowo mè.
Wo ɖùnà èhãlã eye woabe àgbãwo mè
ɖɔ kudo ènuɖùɖu pòɖiwo.
5Wo gblɔ̃ be: “Mì mu gbà gogo mi ò,
mì mu gbà tɔ mi àsi ò.
Àfɔ̀ku lè e mè na mì
ɖo mù nyi àmè ɖè ɖovò na Mawu.”
Ne mù ɖèkɔ̀ kpɔ ènu kèawoa,
àpe àdɔ̀mèze lena èzò kaka bìnà mà jìjɔ.
6E nyɔ, mù ŋlɔ̀ ekèa kpata dà ɖɛ.
Nyè mu la bɔ̀nu kpɔ wo ò
eye mù la va ɖo e tèpe na wo.
7Ɖo woabe àgɔ̀jèjewo ŋutia,
àmè kèwo tɔ èzò lifi lè ètowo tamè
eye wo zũ mù lè ètokɔ̃ɛwo jia.
Ɛ̃ɛ, mù la tu ènu kèwo wo wɔ̀
va yì sã be èfɛ̃ na wo kòkòkò.
Ènyè Tɔhonɔ̀ ye gblɔ̃ ɛ̀.
8Tɔhonɔ̀ gblɔ̃ be: “Ne àmèwo kpɔ
vɛ̃kusɛ̃sɛ̃ be èkpò lòlò ɖo èsì nyuɛ̃ ɖe a,
wo gblɔ̃nà be 'mi mu gbà sò è ò
ɖo e la na vɛ̃ àdodoe'.”
Mù la wɔ̀ nènea ke na àpe sumɔ̃viwo
ne nyè mu gbà crɔ̃ wo kpata ò.
9Mù la na jìjimè ɖe la to so Yakɔb mè.
Ɛ̃ɛ so Yudà be kɔ̀ta mè ye
mù la yɔ àpe ètowo be crɔ̃ɖùtɔa lè.
Àmè cãcã nyèwo la sɔ ɛ̀ ɖù crɔ̃
eye sumɔ̃vi nyèwo la sò nɔ̀pe ɖo funua.
10Sarɔ̀n be gbàmè la trɔ zũ ègbɔviwo be ènuɖùpe
eye Akɔ̀r be bàlìa la nyi ènyìwo be èkpa
na dùkɔ̃ nyè kè la ji àpe ŋùmèa.
11Vɔ̀a mì àmè kèwo trɔ ŋùgbe do mù
eye mì ŋlɔ̀be àpe èto kɔ̀kɔ̀ɛa,
mì àmè kèwo le na ènuɖùɖu Gadò vòdu
kè nana èta nyuɛ̃a,
eye mì pònà èɖɛ̀ lè èsɛ vòdu Menì gbɔa!
12Nyè cã, mù la hlɛ̃ mì lè èwi nu
eye mìabe kɛ̃tɔwo la ɖè èta lè mìa nu
lè mìabe èklòwo ji.
Mù yɔ mì, vɔ̀a mì mu tɔ̀ na mù ò,
mù pò nupo, vɔ̀a mì mu ɖoto ò.
Mì wɔ̀ ènu kè mu jè òa,
eye mì yì sɔ ènu kè mù crìa.
13Ekèawo ŋuti Tɔhonɔ̀ gblɔ̃ be:
Àpe sumɔ̃viwo la ɖùnu
vɔ̀a mìa ya, mì la kuàdɔ̀ ku.
Àpe sumɔ̃viwo la nù, vɔ̀a
mìa ya èsìkɔ la tì mì.
Àpe sumɔ̃viwo la nɔ̀ jìjɔɛ mè, vɔ̀a
mìa ya mì la ɖɔ kudo ŋùkpɛ̃.
14Àpe sumɔ̃viwo la do jìjɔɛ
be àpa ku jìmè kɔ̀kɔ̀ɛ,
vɔ̀a mìa ya, mì la do vève sèse
be àpa ku ènu xàxa lè èjì mè.
Ɛ̃ɛ àyè la gbãdo na mì
eye mì la ŋɛ̃.
15Àpe sumɔ̃viwo la sɔ mìabe nyikɔ
sɔ sɛ̃kpɛ̃ gblɔ̃ be “Ne ɖì mìa ŋuti
sìgbè àmè kèa àlo àmè ŋua” nène.
Vɔ̀a nyikɔ bu ye wo la yɔ
ɖo àpe sumɔ̃viwo ya ŋuti.
16Ne àmè ɖe jro la tu sìa,
ne tu sì lè ànùkua Mawu a be nyikɔ mè.
Àmè kè la kã àtãŋu lè ànyigbã a jia ne kã ɛ̀
lè ànùkua Mawu a be nyikɔ mè.
Nyàwo, xoxo be ènu xàxawo nu la sò.
Wo la bu lè àpe ŋùku mè.
17Ɛ̃ɛ mù la gbìgbɔ̀ ɖo jiŋùkusi yeye kudo ànyigbã yeye.
Nène a, ènu xoxowo mu la gbà nɔ̀ ànyi ò.
Àmè ɖekpe mu la gbà ɖoŋùku e ji ò.
18Jìjɔɛ donu kudo jìjɔ̀jɔɛ tɛ̀gbɛ̀dò
ye mù la sɔ ɖo woa tèpe na wò.
Yèruzàlɛm la trɔ zũ jìjɔɛ be èdù
eye yebe àmèwo kpata la ɖɔ
kudo jìjɔɛ be àyosòso.
19Mù la kpɔ jìjɔɛ so Yèruzàlɛm ŋuti
eye yebe dùkɔ̃a la nyi jìjɔɛ donu na mù.
Wo mu la gbà sè àvi fãfã ku àpa dodo gbèɖe ò.
20Vifɛ̃ hũkɔ̃ɛ̃ ɖe mu la gbà ku kpàtà ò,
eye àmè sĩsĩ ɖe cã mu la gbà ku kpàtà
ne mu wù yebe àgbèzãwo nu ò.
Nyàwo, ɖèkajɛvi la ɖo
èpè àlɔ̀ ɖèka (100) gbɔ̀xue la ku
eye ne àmè ɖe mu ɖo èpè
àlɔ̀ ɖèka (100) gbɔ̀xue ku òa,
eŋuã kpɛ̃sɛ̃ ye ɖì e ŋuti.
21Wo la tù èxɔ̀wo, la nɔ̀ woa mè.
Wo la dà vɛ̃-gblewo eye
wo la ɖù woabe kusɛ̃sɛ̃wo.
22Wo mu la gbà tù àxuewo ye
àmè buwo la va nɔ̀ woa mè ò.
Wo mu la gbà dà vɛ̃-gblewo ye
àmè buwo la va ɖù woabe kusɛ̃sɛ̃wo ò.
Ɛ̃ɛ àpe dùkɔ̃mèviwo la sĩ ŋutɔ sìgbè àtiwo nène.
Àpe àmè cãcãwo la ɖù woabe àlɔ̀nudɔwo.
23Wo mu la gbà jè àgbàgba gbalo ɖe ò.
Wo mu la gbà jì èvi ye èku la sɔ ɖù kpàtà ke ò.
Ɖo wo la nyi Tɔhonɔ̀ be sìtumewo be jìjimè
eye woabe tɔgbe tɔ̀gbè yɔviwo la nɔ̀ kudo wo.
24Keŋu gbɔ̀xue wo la kè ènu sɔ yɔ mù a,
mù la tɔ̀ na wo.
Eye kaka kè wo kpɔ̀tɔ̀ le pò nupo kea,
mù la ɖoto wo xoxo.
25Gbète kudo àlɛ̃vi la ɖù ènu lè àgbã ɖèka mè;
Jãŋùta la ɖù ègbe sìgbè ènyì ke nène.
Eye hũhũ la nyi èdã be ènuɖùɖu.
Ènu bàɖà ku èkunyànyrã ɖekpe
mu la gbà nɔ̀ àpe èto kɔ̀kɔ̀ɛa ji ò.
Nène a ye Tɔhonɔ̀ gblɔ̃ yeŋu.
Mina Bible © Bible Society of Togo, 2014.