Ezayà 58
58
Lekè wo la jè Mawu be ŋùmè ɖoa: Ènubabla kudo jɛ̃gbɔ̃zã
1Do àpa lelele, mù gbà le ɖokoe wò ò.
Àpo ègbè ne ɖì sìgbè èkpɛ̃-tɔ̀ nène.
Gblɔ̃ dùkɔ̃ nyèa be èkãsĩsĩwo na ɛ̀.
Ɖè Yakɔb be àxuedo be àgɔ̀jèjewo na ɛ̀.
2Gbè sia gbè, wo jina ènu mè kpɔ
lè gbɔ nyè ne woa nya ènu kè
mù le sùsu so woa ŋutia.
Wo ɖì dùkɔ̃ kè lɔ̃nà jɔ̀jɔɛ wɔ̀wɔ
eye e le yebe Mawu be èsea ɖo àsia.
Wo biɔna mù jɔ̀jɔɛ sòso nyuɛ̃wo
eye wo jina be ma dɔ̃ gogo yèwo kpe è.
3Co wo gblɔ̃nà be: “Nukɛ ŋuti
mi le blanu ne wò mu le kpɔ mi ò,
mi le bɔ̀bɔ̀ mia ɖokoe vɔ̀,
wò mu le nya ɛ̀ cã ò?”
Eye mù ɖo e ŋuti gblɔ̃ be:
“Ne mì le blanùa, mì gbà wɔ̀nà mìabe èdɔwo
eye mì sɛ̃na tamè ɖo mìabe sumɔ̃viwo ŋuti.
4Eye ne mì le blanùa, mì wɔ̀nà àjrè
eye mì dànà èkɔ̃ kudo àmèwo.
Mì mu blana ènu sìgbè lekè e jè,
ne mì jro la kɔ mìabe ègbèwo yì ji na Mawu nène ò.
5Ènubabla kè jɔ̀nàjì na mù a ɖì ekè mì le wɔ̀
lè ŋùkèkè kè ji mì le bɔ̀bɔ̀ mìa ɖokoe lèa?
Mì dona èta gũ sìgbè àɖakosu nène,
sɔna èfũlòvɔwo tànà, yì mlɔ̃na ɖiɖɔɛ mè.
Ekèa ye mì le yɔ be ènubabla,
ŋùkèkè kè jè ŋùmè na mù a?
6Ènubabla kè jɔ̀nàjì na mùa ye nyi ekèa be:
Woa ɖè ègà àmè kè wo do ègà ɖo kunù jia,
woa ɖè yebe kɔ̀kùtia jo,
woa na vòvo àmè kè wo le zĩ ɖo ànyi a,
gbà wua, woa ŋɛ̃ kɔ̀gawo kpata.
7Wòa ma nuɖùɖu wòa kudo àmè kè àdɔ̀ le wùa.
Sɔ kpea, wòa ma nɔ̀pe wòa kudo àmè kè mu ɖo dɔ̃pe òa,
wòa do àwù na àmè kè ci àmaa.
Mù gbà ɖèkɔ̀ lè hawòvi be hiãhiãwo ŋuti ò.
8Nène a ye àpo kɔ̀kɔ̀ɛ la kɔ̀
sìgbè èwè be totomè nène.
Àpo èdɔ nyuɛ̃wo la xɔ̀ ŋùkɔ̀ na wò
eye Tɔhonɔ̀ be gogo la tu ŋùgbe na wò.
9Ne wò yɔ Tɔhonɔ̀a, e la tɔ̀ na wò,
ne wò do àpa a, e la gblɔ̃ be: “Ènyè ye kè!”
Ne wò ŋɛ̃ kɔ̀gawo kpata jo lè àxue wòa mè,
wò ɖè ŋùklɛ̃ dodo be wɔ̀nawo jo
eye wò na àsà ègejinyawoa,
10ne wò ma ènuɖùɖu wòa kudo àmè kè àdɔ̀ le wù,
ne wò na ènuɖùɖu àmè kè le ku àdɔ̀ kua,
nènea, àpo kɔ̀kɔ̀ɛa la kɔ̀ lè vìvìti mè
eye èzã wòa la nɔ̀ sìgbè dɔ̃ŋùkusu jàse nène.
11Tɔhonɔ̀ ŋutɔ la nyi àpo kplɔ̀tɔ tɛ̀gbɛ̀.
E la na wò ènuɖùɖu,
la gbà do wò ŋusɛ̃ lè kaka zògbè ji ke.
Wò la nɔ̀ sìgbè àbɔ kè wo
le wu èsì ɖo àmèhùenua nène,
sìgbè èsìdo kè le srà tɛ̀gbɛ̀a nène.
12Wò la trɔ tù èglìkpo doxo wòawo.
Wò la trɔ li èxɔ̀wo ɖo gbèɖegbè be dodoeawo ji.
Eye wo la yɔ wò be:
“Dùkɔ̃ kè trena èglì zɛ̃zɛ̃wo
eye e gbà jrànà èdù mè be èmɔ̃wo ɖoa.”
13Ne wò gbìgbɔ̀ àfɔ̀ ɖè yì ŋùgbe lè jɛ̃gbɔ̃zã gbè
eye wò tɔtè àjɔwo dodo lè ŋùkèkè kɔ̀kɔ̀ɛ nyèa jia,
ne wò yɔ jɛ̃gbɔ̃zã be “Jɔ̀gbè nyuɛ̃”
eye wò yɔ Tɔhonɔ̀ be ŋùkèkèa be “Bùbu ŋùkèkèa”,
eye wò le do bùbu e ŋuti le na àsà àfɔ̀ɖèɖe kpòtoewo,
àjɔdodowo kudo àjrè wɔ̀wɔwoa;
14Nène a ye wò la kè ɖo nyɔna wòa ŋuti lè Tɔhonɔ̀ mè.
Mù la kplɔ̀ wò sìgbè èjiɖùtɔ nène
kudo àhùakèkevi yì ànyigbã be tèpe yì ji hũiwo.
Mù la ɖè ètɔ wò Yakɔb be ècrɔ̃nuwo fiɔ wò.
Ɛ̃ɛ, Tɔhonɔ̀ ye gblɔ̃ ɛ̀.
Mina Bible © Bible Society of Togo, 2014.