Hàbakuk 2
2
1Mù la nɔ̀ àpe èzãɖiaxɔa mè,
mù la nɔ ɖia lè àgbògbò be èkpa ji,
nɔ kpɔ ènu kè Mawu la gblɔ̃ na mù a
kudo ɖoŋuti kè e la na èhùɛjèje nyèawo.
2Nène a ye Tɔhonɔ̀ gblɔ̃ na mù be:
“Ŋlɔ̀ ènu kè mù le ɖèfiɔ wòa,
ta ɛ̀ ɖo èkpe kpàkpawo ji
ne woa teŋu hlɛ̃ ɛ̀ bɔ̀bɔɛɖe.
3Àvìmènu ɖe kè ɖo yebe gàmèa ye.
E mlì gbãnà blɛ̀wù, mu nyi àjè be ènyà ò.
Ne e ci ŋùgbea, nɔ̀tè kpɔ e sinu,
ɖo e la va emè godo,
yebe gàmèa kpò ye la sù gbɔ̀xue.
4Ŋlɔ̀: Àmè kè ɖo susu bàɖàa, buna yebe ŋusɛ̃.
Vɔ̀ àmè kè wɔ̀ ànùkua na Mawu a,
lè jɔ̀jɔɛ eye nènea, e ɖo àgbè.
5Nyàwo, vɛ̃ sànà àmè
ègòyitɔa mu teŋu nɔ̀nà kpo ò,
e kèkènà èhlò mè sìgbè kuwode nène.
Sìgbè èku nènea, ènu mu sùnà ɛ̀ ò.
E hlànà dùkɔ̃ pòpuwo kpata,
eye e bɔ̀nà dùkɔ̃wo ɖodu na ye ɖokoe.
6Dùkɔ̃ kèwo ji be ɖù a,
sɔna ènyà ɖo e ŋuti ɖodu.
Wo gblɔ̃nà ènyà màjè ètowo.”
Gbledo be ènyàwo
“Ènyà kè wo la gblɔ̃a ye nyi be:
Gbledo kɛ ye nyi ekèa na mì!
Mì le hlà àmè buwo be àdɔ̀kùnuwo.
Kaka va na gà kɛ mè ò?
Mìabe èfɛ̃wo gbà le jì ɖo eji kpe è!
7Àmè kèwo do ègà na mìa,
la va xa mì kplà, eye wo la hũhũ mì,
woawo cã, wo la hlà mìabe ènuwo.
8Ɖo wò cã wò hlà dùkɔ̃ sùgbɔ be ènuwo:
ɛ̃ɛ tututu, dùkɔ̃ kèwo kpɔ̀tɔ̀a, la hlà wò cã.
Nyàwoa, mì kɔ̀ èhũ ɖɛ, wɔ̀ àɖìkunu ku
àmèwo, èdùwo kudo dùmèviwo!
9Gbledo kɛ ye nyi ekèa na mì!
Mì xɔ̀ àmèwo be àlè na mìabe èhlɔ̃wo,
eye mì susu be yèwo lè tèpe nyuɛ̃
sɔ xe èmɔ̃ na gbledo ɖe a?
10Mìabe ɖoɖowo la do ŋùkpɛ̃ mìabe èxlɔ̃wo:
dùkɔ̃ sùgbɔ be cɔ̃crɔ̃a le hɛ̃ gbledo va mìa ŋutɔ ji.
11Ɖo èkpewo ŋutɔ cã la dohùɛ do mì,
eye èxɔ̀tiwo ye la na mì ɖoŋuti.
12Gbledo kɛ ye nyi ekèa na mì!
Mì le tù èdù kudo èdù be èkɔwo
lè èhlɔ̃dãdã ku màjɔ̀ màjɔ mè.
13Dùkɔ̃wo le jè àgbàgba gbalo
sɔ le wɔ̀ èdɔ kè èzò la va fiɔ̃a.
Mu nyi àhùadù Tɔhonɔ̀a gbɔ ye ekèa soa?
14Ɛ̃ɛ wo la nya Tɔhonɔ̀ be gogo
nènea ye gogo kèa la ɖɔ ànyigbã a
sìgbè àlekè àpù ɖɔ kudo èsìa nène.
15Gbledo kɛ ye nyi ekèa na mì!
Mì cakana àhà mu àmè na mìa haviwo
woabe àma ne ze lè àmèdòmè.
16Mìa ŋutɔ ye èŋù la kpɛ̃
eye mì mu la kpɔ gogo ò!
Mìa ŋutɔ cã mì nù, ne mìa ci àma!
Tɔhonɔ̀ la kpe yebe àdɔ̀mèze be kɔpòa na mì,
eye mìabe bùbua la trɔ zũ ŋùkpɛ̃ na mì.
17Ɖo èhlɔ̃dãnu kèwo mì wɔ̀ lè Libàn
va yìa, la trɔ jè mìa ji.
Mì crɔ̃ ègbemèlãwo sã
fifìa, ègbemèlãwo cã la do vɔ̃vɔ̃ na mì!
Ènu kèa la jɔ̀, ɖo mì kɔ̀ èhũ ɖo ànyi;
eye mì gbà sɛ̃tamè ku ànyigbã,
èdù kudo woabe dùmèviwo.
18Nukɛ ye wo la sɔ kpèli kè wo ɖoa, sɔ wɔ̀ ò?
Gàkpo kpò ye wo sɔ wɔ̀ wo
eye nyàwo ɖekpe mu lè woa nu ò.
Jìdo kɛ ye gbɛ̀dɛ kè wɔ̀ ɛ̀a
la teŋu sɔ dà ɖo e ji ò?
19Gbledo kɛ ye nyi ekèa na mì!
Mì le gblɔ̃ na àtikpàkpa be: 'Fɔ̃!'
Le gblɔ̃ na èkpetataa kè mu la teŋu pò nupo òa be: 'Sitè!'
Co mì nya be wo mu la teŋu ɖè ènyà ɖekpe gblɔ̃ na mì ò.
Ne wo fã sìka kudo klòsalò do wo cã a,
àgbè ɖekpe mu lè woa mè ò!
20Vɔ̀a, Tɔhonɔ̀ nɔ̀ ànyi ɖo yebe mawuxɔ kɔ̀kɔ̀ɛa mè.
Ènu sia ènu ne bɔ̀nu kpoo lè yebe ŋùkɔ̀!”
Mina Bible © Bible Society of Togo, 2014.