Hàbakuk 1
1
1Mawu ɖè ètodɔ̃ be ènyà fiɔ gblɔ̃ɖɛtɔ Hàbakuk.
Gblɔ̃ɖɛtɔa yɔ Mawu be bèa va xɔ̀ na dùkɔ̃a
2Kaka va na gàkɛ mè, mù la yɔ wò sù,
Tɔhonɔ̀, sɔ biɔ xɔ̀ na àmè ò;
ye wò la ku èto do mù ò?
Mù do àpa ɖo àɖìkunuwɔ̀wɔ ŋuti
co wò mu la hlùɛ̃ mi gã òa?
3Nukɛ ŋuti wò na mù le kpɔ màjɔ̀ màjɔ ɖo ò?
Nukɛ ŋuti wò lɔ̃ le kpɔ miabe gbledoa ɖo ò?
Ènugbletɔ kudo èhlɔ̃dãtɔwo ye trɔ do mù.
Àjrè kudo kòjoɖoɖowo ye kpò ye bɔ.
4Wo tù àfɔ̀ jɔ̀jɔɛ,
jɔ̀jɔɛsòso be ŋutidɔ nyuɛ̃a le ve wo.
Àmènyrãkua le ɖù jɔ̀jɔɛwɔ̀tɔa ji
eye kòjosòso mu gbà lè ò.
Tɔhonɔ̀ be ɖoŋuti: Babɛ̀ltɔwo gbãnà
5Tɔhonɔ̀ gblɔ̃ be:
“Mì le ŋùku ɖo ènu kè le jɔ̀
lè dùkɔ̃wo dòmèa ŋuti,
ne wɔ̀ ŋùdã na mì ne mìa kãyàa!
Ɛ̃ɛ, ŋùdãnu ɖe la jɔ̀ lè mìabe àgbè mè.
Ne wo kã yebe àseŋu na mìa,
mì mu la xɔ̀ ɛ̀ sè ò!
6Mù na èmɔ̃ Babɛ̀lviwo gbãnà,
dùkɔ̃ nyrãku, màku ŋuzĩzĩ;
wo le sã xixea mè gòdòo
le hlà àmèwo be ànyigbãwo.
7Wo jiŋɔ gbà ɖo vɔ̃vɔ̃,
lè ègòyiyi mèa, wo ɖènà ègbè
sɔ xɔ̀nà ènu kè wo jro a.
8Woabe èsɔwo le pu dù sɔ wu blèkpɔ̃ɛwo,
wo bi wu gbète kèwo dànà àdè wètrɔgbɔa.
So dìdìpea, woabe èsɔdotɔwo vana jòo,
wo zrònà sìgbè àmlãkoe kè le ji la jè yebe èlã jia nène.
9Wo va wɔ̀nà ènu bàɖàwo,
wo sɛ̃natamè sɔ gblena ènu.
Wo bɔ̀nà àhùale sùgbɔ,
sìgbè ànyigbã be èkɔkuiwo nène.
10Èfìɔwo nyina àlɔmè ɖènu na wo.
Wo crìnà àgbònùglawo.
Àgbògbò be èdùawo mu dona vɔ̃vɔ̃ na wo ò:
wo lɔna èkɔ sɔ wɔ̀nà kpoku
tɛ ɖo woa ŋuti, sɔ gbãnà wo do ɖèka-ɖèka.
11Wo va yìnà hòo sìgbè èji jàja sɛ̃sɛ̃ɖe nène,
gbà yì kɔ̀nà ɖo àfi bu cã nène.
Woabe ŋusɛ̃ ji kpò wo kãnaɖo:
e ye nyi woabe mawu.”
Gblɔ̃ɖɛtɔa gbà fãyɔ Mawu
12So gbèɖegbèa, èwò ye nyi Tɔhonɔ̀,
wò nyi Mawu nyè, àgbèagbe kè mu kuna òa.
Wo cã Babɛ̀lviwo sɔ le ɖokòjo na mi.
Èwò àkpã sɛ̃sɛ̃ màhuã-màhuã,
wò na wo ŋusɛ̃ sɔ dɔ̃ èto na mi.
13Vɔ̀a, ŋùkuvi wòa kɔ̀ ŋutɔ ne bèa kpɔ èvuɛ̃,
wò mu la teŋu lɔ̃ nɔ̀ gbledo be tèpe ò.
Co, wò sɔ ŋùku dàɖɛ le kpɔ ènu kpò
àmèwo le flù àmè fàa.
Wàlɛbɛ kè àmè nyrãkuwo
le crɔ̃ àmè jɔ̀jɔɛ mànyahũ ɖewoa,
wò mu le gblɔ̃ ènyà ɖe ò.
14Wò le wɔ̀ kudo mi sìgbè ètɔ̀mè lã
ku èlãklìvi kèwo mu ɖo kplɔ̀tɔ ɖe òa nène.
Oò, nukɛ ŋuti ò?
15Babɛ̀lviwo le le àmèwo sìgbè
ètɔ̀mè lã kè wo ɖè lè àkpoŋù nua nène.
Wo kplɔ̀ wo va woabe èɖɔawo mè
eye wo kpɔna jìjɔɛ ŋutɔ.
16Wo wɔ̀nà vɔsa na woabe èɖɔawo,
tɔnazò lifi na wo,
ɖo èɖɔawo ye nana wo ènuɖùɖu
lè gbɔsùsu mè ye wo ɖùnà, sènà vivi.
17Wo la teŋu nɔ̀tè ekèa wɔ̀wɔ gbè ɖèka
na èɖɔawo be zãzã sɔ wù dùkɔ̃wo àɖìku tɔ̀a?
Mina Bible © Bible Society of Togo, 2014.