Galatìatɔwɔ 3
3
Mìa zɔ̃ ɖo èsea ji loo, àlo mìa xɔ̀ Kristò ji sè?
1Oò, mìa Galatìatɔ ènumànyatɔwo! Àmè kɛ ye trɔ susu lè èta mè na mì ò? Mu nyi mìa ŋutɔwo be ŋùkumè ye wo ka Yesù ɖo àtisòga ŋuti lèa? 2Mì na ma biɔ mì ènyà ɖèka kpò sè: Gbɔ̃gbɔ̃ Kɔ̀kɔ̀ɛ kè mì xɔ̀a ɖe, èsea ji ye mì wɔ̀ ɖo, kaka xɔ̀ ɛ̀ loo, àlo àŋɛ̀nyuɛ̃ a ye mì sè, sɔ xɔ̀ ɛ̀ ji sè, eye mì xɔ̀ ɛ̀? 3Ènumànyatɔwo kpò mì nyi lekea? Ekè mì sɔ Mawu be Gbɔ̃gbɔ̃ a tɔ e jia, mìa ŋutɔwo mìabe ŋusɛ̃ mì be yèwoa sɔ wu e nu fifìa? 4Ènu kèwo kpata tèpe mì kpɔa ɖe, ènu gbalowo ye wo nyia? Wo mu la nyi ènu gbalo klua ò ɖe! 5Lekè mì wɔ̀nà ɖo èsea ji ɖoa, ŋuti ye Mawu sɔ Gbɔ̃gbɔ̃ a na mì, be le wɔ̀ ŋùdãdɔwo lè mìa dòmè loo, àlo ekè mì sè yebe ènyà, xɔ̀ e ji sè a ŋuti ye?
6Mawunya gblɔ̃ be: “Wo bù Abràham be e nyi àmè jɔ̀jɔɛ, ɖo e xɔ̀ Mawu ji sè.” 7Ye ŋuti e jè be mìa nya be àmè kèwo si xɔ̀sè lèa, wo nyi Abràham be èviwo. 8Mawunya kpɔ ɛ̀ jè ŋùkɔ̀ be Mawu gbãnà, la wɔ̀ àmè kèwo mu nyi Yudàvi òawo la zũ àmè jɔ̀jɔɛwo, ɖo xɔ̀sè kè lè woa sia ŋuti. Ekèa ŋuti ye be do àŋɛ̀nyuɛ̃ a ɖɛ xoxo na Abràham be: “Wo la tusì na ànyigbã ji dùkɔ̃wo keŋu to ji wò.” 9Ye ŋuti fifìa, wo tusì na àmè kèwo xɔ̀sèa, bɔ̀ ɖo Abràham, xɔ̀sètɔa ŋuti.
10Vɔ̀a, wo sɛ̃kpɛ̃ na àmè kèwo keŋu le èsea ji wɔ̀wɔ ɖo àsi, ɖo wo ŋlɔ̀ ɖo mawunya mè be: “Àmè ɖekpekpe kè mu zɔ̃nà ɖo ènu kèwo keŋu wo ŋlɔ̀ ɖo Èse Xoma a mèa nu ò, eye mu wɔ̀nà ɖo e ji òa, kpɛ̃sɛ̃ lè e ji.” 11Fifìa, e ze peŋu be Mawu mu bùnà àmè ɖekpe be e lè jɔ̀jɔɛ, ne àmèa wɔ̀ kpò ɖo èsea ji ò. Đo Mawunya gbà gblɔ̃ be: “Àmè kè be xɔ̀sè na, be wɔ̀nà ènu jɔ̀jɔɛa, la nɔ̀ àgbè.” 12Vɔ̀a èsea mu sɔ ɖekpe lè xɔ̀sè be ènyà mè ò, ɖo ènu kè wo ŋlɔ̀ so e ŋutia, ye nyi be: “Àmè kè wɔ̀nà ɖo woa jia, la nɔ̀ àgbè.”
13Ekè Kristò trɔ zũ kpɛ̃sɛ̃ ɖo mia tèpe ŋutia, e jo mi lè èsea be kpɛ̃sɛ̃ si, ɖo wo ŋlɔ̀ ɖo mawunyaa mè be: “Àmè ɖekpekpe kè wo ka ɖo àti ŋutia, kpɛ̃sɛ̃ lè e ji.” 14Àleke be, to Kristò Yesù jia, wo la tusì na àmè kèwo mu nyi Yudàvi òawo cã, sìgbè àlekè wo tusì na Abràham nène, eye mi la sɔ xɔ̀sè xɔ̀ Gbɔ̃gbɔ̃ kè Mawu fìãa.
Èsea ku àjɔ̀gbè kè Mawu fìãa
15Nɔ̀vi nyèwo, mù ji be ma na mì kpɔwɔɛ ɖe so àgbènɔ̀nɔ ŋuti. Mì nya ɛ̀ be, ne àmè ɖe ŋlɔ̀ ènu so àlekè wo la ɖù yebe ècrɔ̃nu ɖoa ɖɛ, eye be ɖo èkpe e ji vɔ̀ kpòa, wo mu gbà teŋu zɛ̃nà e ji ò, àlo sɔna ènyà ɖekpe kpena ɛ̀ ò. 16Fifìa Abràham kudo yebe jìjimè ye Mawu fìã àjɔ̀gbè na; Wo mu gblɔ̃ be: “Na jìjimèwo” sìgbè jìjimè sùgbɔ ye wo wɔ̀ ɛ̀ na nène ò. Vɔ̀a wo be: “Na àpo jìjimè.” Ekè fiɔ be àmè ɖèka tigɔ̃ kpò ye wo wɔ̀ ɛ̀ na. Àmè kèa ye nyi Kristò. 17Ènu kè mù le gblɔ̃a ye nyi be Mawu ɖùzò ku Abràham eye e ɖo èkpe e ji ɖɛ. Èpè èkà èwo takpo ci èwo (430) va yì, gbɔ̀xue èsea va to. Àleke be *èse kèa ma teŋu ɖè zòɖùɖu kèa jo, àlo la na be Mawu be fìãfìãa la zũ ènu gbalo ò. 18Ne e nyi be Mawu be ènu nana kèa so èsea mè ye à, eŋuã, mu gbà nyi fìãfìãa mè be so ò. Vɔ̀a, àjɔ̀gbè fìãfìã ye Mawu sɔ na màje Abràham.
19Fifìa ɖe, nukɛ ŋuti èsea lè ɖo ò? Wo sɔ èsea va, ne bèa na àmè ne jèsi ènu kè nyi àgɔ̀jèje, kaka va sɛ̃ wàlɛbɛ kè jìjimèvi kè be àjɔ̀gbè wo fìã na Abràham a la vaa. Wu ekèa, Mawu be àtikplɔtɔwo ye sɔ èsea na àmè kè nyi àmèdòmèɖotɔa, ye be sɔ va. 20Vɔ̀a àmèdòmèɖotɔ mu nɔ̀nà ànyi na àmè ɖèka kpò ò. Sĩ vɔ̀a, Mawu ya nyi ɖèka gɔ̃ kpò.
Ènu kè ŋuti èsea lè ɖoa
21Èsea sitè ɖo Mawu be fiãfiãwo ŋutia? Klua ò! Ne ŋusɛ̃ lè èsea si, la na àmè la nɔ̀ àgbè a, eŋuã, àmè kè la wɔ̀ ɖo èsea jia, la nɔ̀ jɔ̀jɔɛ. 22Vɔ̀a mawunya gblɔ̃ be xixea keŋu lè èvuɛ̃ be gɔ̃mè, ekèa ŋuti ye fìãfìã kè bɔ̀ ɖo Kristò ji xɔ̀sè ŋutia, nyi àmè kèwo xɔ̀ e ji sèawo tɔ̀.
23Fifìa, gbɔ̀xue Kristò ji xɔ̀xɔ̀sè la vaa, èsea le mi ɖo èkpa mè, tu èhɔ̃ ɖo mia nu, le nɔ̀tè kpɔ gà kè mè Mawu la hɛ̃ Kristò ji xɔ̀xɔ̀sè kèa vaa. 24Nène a, èsea nyi mia jikpɔtɔ, la nɔ kplɔ̀ mi kaka va sɛ̃ wàlɛbɛ kè Kristò vaa, àleke be woa sɔ miabe xɔ̀sè bù mi àmè jɔ̀jɔɛwo. 25Vɔ̀a ekè Kristò ji xɔ̀xɔsèa va fifìa, mi mu gbà lè ènufiɔtɔ ŋua gɔ̃mè ò.
26Đo mìa kpata mì nyi Mawu be èviwo, ekè mì xɔ̀ Kristò Yesù ji sè a. 27Mì, àmè kèwo keŋu wo lè mawusi na a, be mìa wɔ̀ ɖèka kudo Kristò, mì sɔ Kristò do, sìgbè àwù nène. 28Ye ŋutia, vòvòtoto ɖekpe mu gbà lè Yudàvi ku Grik, ègàmènɔ̀tɔ ku àblɔ̀ɖèvi, ŋusù ku nyɔ̃nù dòmè ò. Vɔ̀ bòhũa, mìa keŋu, mì wɔ̀ ɖèka lè èhadodo mè ku Kristò Yesù. 29Ne mì nyi Kristò tɔ̀a, eŋuã mì nyi Abràham be jìjimèviwo, eye mì nyi ènu kè wo fìãa be ècrɔ̃ɖùtɔwo.
Mina Bible © Bible Society of Togo, 2014.