Galatìatɔwɔ 2
2
1Lè èpè woènè yomè a, ènyè ku Barnabas, mi gbà yì Yèruzàlɛm, eye mù kplɔ̀ Titò cã ɖo àsi. 2Mawu ye ɖè è fiɔ mù gbɔ̀xue mù yì. Eye mù sɔ Àŋɛ̀nyuɛ̃ kè mù do na àmè kèwo mu nyi Yudàvi òawo, ɖo ŋùmè na Yèruzàlɛm be Kristòtɔ̀wo, veve ɖe a, mù gbà sɔ ɛ̀ ɖo ŋùmè na woabe àmè ɖìnyiwo. Mù wɔ̀ ekèa, àleke be èdɔ kè mù le wɔ̀ so gà ɖe mè kea, mu gbà zũ ènu gbalo ò. 3Titò kè lè ŋuti nyèa nyi Grik, gãkea, àmè ɖe mu zĩ e ji be ne sò èvo ò. 4Vɔ̀a èhamètɔ àjèɖàtɔ ɖewo to àyèmɔ ji, ɖo èhabɔ̀bɔa mè, le ji èmɔnu be yèwoa gble vòvo kè Kristò Yesù na mia, la wɔ̀ mi, mia zũ ègàmènɔ̀tɔwo. 5Ekè mi ji be nyàwo blibo kè lè àŋɛ̀nyuɛ̃ a mèa ne nɔ̀ gãgã ɖe na mì ŋutia, mi mu lɔ̃ ɖo woabe ènyàa ji klua ò.
6Fifìa, àmè ɖìnyi kèwo bùnà be yèwo nyi ènu ɖe a, mu ɖo àɖàŋù ɖekpe na mù ò. Gãkea, ne wo gbà nyi ènu ɖe cã a, nyè yaa, nyè mu sɔ ɖekpe lè e mè ò, ɖo Mawu ya mu kpɔna àmè be ŋùmè ò. Mù le gblɔ̃ be àmè ɖìnyi ŋuawo mu ɖo àɖàŋù yeye ɖekpe na mù ò. 7Vɔ̀ bòhũa, wo kpɔ ɛ̀ jèsi be èdɔ kè Mawu do àsi na mùa ye nyi be ma do àŋɛ̀nyuɛ̃ a na àmè kèwo mu nyi Yudàvi òawo, sìgbè àlekè be do è àsi na Petrò cã, be e yaa, bèa do è na Yudàviwo a#2.7 Yudàviwo: àmè kèwo sò èvo, àmè kèwo Mawu cã àlo Izràɛl be dùkɔ̃a; àmè kpɔ̀tɛawo nyi àgbàlèwo, àlo àmè kèwo mu nya Mawu ò, àlo kèwo mu sò èvo ò a, àlo Grikwo. nène. 8Đo Àmè kè to Petrò ji wɔ̀ èdɔ lè Yudàviwo dòmèa, e ye ke ye to nyè cã ji nyè, wɔ̀ èdɔ lè àmè kèwo mu nyi Yudàvi òawo dòmè. 9Yakobò ku Kefàs, kudo Yòhanɛ̀s, àmè kèwo wo bùnà sìgbè èhaa be sɔtiwo nènea, wo kpɔ èdɔ kè Mawu sɔ do àsi na mùa jèsi. Wo na ènyè ku Barnabas àsi, sɔ fiɔ be yèwo xɔ̀ mi nyuɛ̃ ɖe. Wo ɖo èkpe e ji be miawo, mia yì àmè kèwo mu nyi Yudàvi òawo gbɔ, ne yèwo cã yèwoa tùtà Yudàviwo gbɔ. 10Ènu kè kpò wo ji so mia gbɔ be mia wɔ̀a ye nyi be mia ɖo ŋùku wɔ̀amènɔ̀ kèwo lè yèwo dòmèa ji, vɔ̀ ènu kèa tututu ye nyè ŋutɔ cã mù wɔ̀ ku vevedonu.
Paolò hɛ̃ ènyà ku Petrò lè Ãtiokìa
11Ekè Kefàs va Ãtiokìaa, mù sitè ɖo e ŋuti àgbãŋùgbà, hɛ̃ ènyà kudo è, ɖo e wɔ̀ ènu ɖe kè mu sɔ̀gbè ò. 12Gbɔ̀xue àmè ɖewo la so Yakobò gbɔ vaa, Petrò ɖùnà ènu kudo àmè kèwo mu nyi Yudàvi òawo. Vɔ̀ ekè àmè kèawo va kpòa, e ɖè ye ɖokoe ɖo àzɔ̀ge, eye mu gbà ji be yèa ɖù ènu kudo àmè kèwo mu nyi Yudàviwo a ò. E le vɔ̃ àmè kèwo gblɔ̃ be, e jè be àmè bèa sò èvoa. 13Èhamètɔ bu kèwo nyi Yudàviwo cã dɔ̃ yebe blamùtumùnu kèa ji, àleke be Barnabas ŋutɔ cã wɔ̀ blamùtumùnu kèa kudo wo. 14Vɔ̀ ekè mù kpɔ be ènu kè wo wɔ̀a mu sɔ̀gbè ɖo nyàwo kè lè àŋɛ̀nyuɛ̃ a mèa ji òa, mù gblɔ̃ na Kefàs lè woa keŋu be ŋùmè be: “Ne èwò kè nyi Yudàvi, le nɔ̀ àgbè sìgbè àmè kè mu nyi Yudàvi òa nènea, nukɛ ŋuti wò la zĩ àmè kèwo mu nyi Yudàvi òawo ya ji be woa nɔ̀ àgbè sìgbè Yudàviwo nène ò?”
Xɔ̀sè ye hlùɛ̃nà Yudàvi ku àmèwo kpata gã
15Nyàwo, mi nyi Yudàviwo so jɔ̀jɔmè. Mu nyi àmè mà nyi Yudàvi, èvuɛ̃wɔ̀tɔwo ò. 16Mi nya be wo mu ɖènà kunù na àmè, to èsea be èdɔwɔ̀wɔwo ji ò. Vɔ̀ bòhũa, to Kristò Yesù ji xɔ̀xɔ̀sè ji. Ye ŋutia, miawo ŋutɔ cã mi xɔ̀ Yesù Kristò ji sè, ne woa ɖè kunù na mi, ɖo ekèa ŋuti. Mu nyi to èsea be èdɔwɔ̀wɔwo mè ò, ɖo wo mu teŋu ɖè kunù na àmè ɖekpe to èsea be èdɔwɔ̀wɔwo mè ò. 17Vɔ̀ ekè mi le jè àgbàgba be woa ɖè kunù na mi, ɖo mi wɔ̀ ɖèka kudo Kristò, ne e va ze be miawo cã mi wɔ̀na èvuɛ̃a, eŋuã, ènyàa mu jo fiɔ be Kristò dɔ̃ èvuɛ̃ jia? Gbèɖe! 18Ne mù trɔ yì èse kè mù trɔ ŋùgbe do a gbɔa, eŋuã, mù le gblehùɛ do ɖokoe nyè. 19Lè èsea tɔ̀ gomèa, mù zũ àmè kuku ne ma nɔ̀ àgbè na Mawu bòhũ. 20Ènyè kudo Kristò ye wo ka ɖo àtisòga ŋuti. Ye ŋuti fifìa, mu gbà nyi ènyè ŋutɔ ye lè àgbè ò, vɔ̀a Kristò ye lè àgbè lè mè nyè. Àgbè kè mù lè, lè ŋutilã mè fifìa, Mawu be Èvi kè lɔ̃ mù, eye e sɔ ye ɖokoe na ɖo ta nyèa be ji xɔ̀sè mè ye mù lè è ɖo. 21Nyè mu le gbe Mawu be màjea ò; ɖo ne wo la kpɔ jɔ̀jɔɛ nyinyi to èsea mèa, eŋuãa, Kristò ku gbalo.
Mina Bible © Bible Society of Togo, 2014.