Ɛstà-G E
E
Èfìɔa ɖè kunù na Yudàviwo
13 Èfìɔ be xoma mè be ènyàwo ye wo gbìgbɔ̀ ŋlɔ̀ leke be:
“Èfìɔ gã Artazɛ̀rzɛs ɖoɖa dùnunɔ̀tɔwo lè nutowo èkà ètɔ̃ ci adrɛ̃ (127) mè be èdù-nyigbãwo mè so Indìa sɔyì Etiopìa, gbà ɖoɖa mia ŋutimɛwo, mi do ègbè na mì loo!
14 Àmèwo sùgbɔ fuu, eji eji sɔwu kè wo kpɔ bùbuwo xɔ̀ so woabe nyuɛ̃wɔ̀namètɔwo be àsi kèke màɖokɔpea mèa, wo trɔ àmè jèagla glo; 15 mu nyi kpò be wo jina èmɔ sɔ gble ènu lè miabe àcɛ̀gɔ̃mènɔ̀tɔwo ŋuti ò, vɔ̀a, màteŋuitɔ kèwo nyi la xɔ̀ ɖo àkɔ, ènu kè ɖo la jè ŋùmèa sù na woa, wo gbà tɔna seblawo ɖo woa ŋutɔwo be nyuɛ̃wɔ̀namètɔwo ŋuti. 16 Mu nyi kpò be wo tutuna àkpedodoa jo lè àgbètɔwo be dòdòmè ò, vɔ̀a sɔ kpea, wo tɛ̃ jɛ̃glɛ̃ kudo àmè kèwo mu ɖo ènyuɛ̃ be numèyìyi ɖekpe òa be glojo glojo wɔ̀wɔwoa, wo susuna be yèwo la si jo lè kɛ̃tɔa be ènyàsòso vuɛ̃a nu, e hati kè nyi Mawu tɔ̀a, àmè kè jrònà ènuwo keŋu mè màjìjɔ màjìjɔ.
17 Eji ejia, àmè gbogbo kèwo lè àcɛ̀kpàkpa nu ye ɖo èxlɔ̃ kèwo ŋuti wo dojì ɖoa be wo la le èdɔawo ɖo àsi, wo tànàsi woa ɖokoe ye wo dona ŋùklɛ̃ na wo. Wo la teŋu kɔ̀ ɖemànyatɔ be èhũ ɖɛ eye wo la yì jè gbegble bàɖàwo mè fàa. 18 Nyàwoa, èxlɔ̃ kèawo teŋu blè èfìɔ jɔ̀jɔɛwo to woabe àmè fùflu ku àjè ɖàɖà kèwo hɛ̃nà èvuɛ̃ vaa ji. 19 Ɛ̃ɛ, èzãnuɖùtɔ kèawo, kèwo zãna woabe ŋusɛ̃ lè èmɔ vuɛ̃a jia, jènà àgɔ̀ sùgbɔ. Mì la teŋu ŋɔjè e mè lè miabe kɔ̀do ɖewo be pòpo mè, àlo lè ènu kèwo le jɔ̀ fifìa cã mè fàa. 20 Lè hùe kèwo gbãnà nua, mi la hlùɛ̃do ne mia kplɔ̀ miabe fìɔdua va ètocɔ̃ànyi gbɔ, ɖo e la ɖè àlè na àmèwo kpata. 21 Ekèa ŋuti, mi la wɔ̀ ɖɔ̀lìɖɔliwo, so ènyàti kèwo wo la sɔ va mia jrò e mè kpɔ tɛ̀gbɛ̀ ku gogo ɖo e ŋuti zɔ̃ sù.
22 Nyàwo nènea ye Hamàn, Hàmadatɔ̀s be èvia, Màkedonìa-tɔ ɖe, klua lè èvò na Pɛrsìaviwoa, lè àzɔ̀ge sãgãa lè miabe àdɔ̀mènyuɛ̃a ŋuti, e ɖù miabe àmèjrowɔ̀wɔ be àlè; 23 e dogò èxlɔ̃jèje kè mi zãna ku dùkɔ̃ bliboa kaka mi ɖo nyikɔ na ɛ̀ be “ètɔ àlo mia tɔ” eye e va nyi fìɔzìkpea be tòmèhùɛ̃yi èvègɔ̃ kè be ŋùkɔ̀ àmèwo kpata dona èta gũ lè. 24 Vɔ̀a mu ɖù yebe gãglo wɔ̀wɔa ji ò, e ɖo ŋùkuvi tè sɔ gbĩ àcɛ̀ ku àgbèa lè mia si; 25 to àjèɖàɖa àmèbàtɔ̀ ɖe jia, e biɔ mia ŋutɔ miabe hlùɛ̃tɔ ku nyuɛ̃wɔ̀tɔ Màrdokìa be èku kudo miabe fìɔdua be èvèdonamètɔ àgɔ̀ɖemàjetɔ Ɛstà be cɔ̃crɔ̃ gbàkudo woabe dùkɔ̃ bliboa cã. 26 To èmɔ kèawo ji nyàwoa, e susu be ne yè ɖè mi ɖo àzɔ̀gea yè la sɔ Pɛrsìa be fìɔdu gãa jo na Màkedonìatɔwo. 27 Vɔ̀a miawo ya, mi kpɔ be Yudàviwo, kèwo ye èsegbletɔ ji be yèa crɔ̃a, wo mu nyi ènu kpòtoewɔ̀tɔwo ò; bòhũa, wo le woa ɖokoewo goŋu to èse kèwo sɔ̀gbè ŋutɔawo ji; 28 Wu ekèa, wo nyi Mawu àgbèagbea be èviwo, jihũitɔ gã ŋutɔa, àmè kè le kpàcɛ̀ na fìɔdua ku jɔ̀jɔɛsòso ɖo mia ta sìgbè ɖo mia tɔgbewo ta nène lè èmɔ nyuɛ̃tɔwo nu.
29 Ye ŋutia mì la wɔ̀ ènu nyuɛ̃ɖe ne mì mu zɔ̃ ɖo xoma kè Hamàn, Hàmadatɔ̀s be èvia, ɖo ɖoɖa mìa ji ò, 30 ɖoa wo ka woawo be wɔ̀tɔa ɖo àti ŋuti lè Suzè be àgbonu ku yebe àxuedoa kpata. Mawu, ènu ɖe sia ɖewo be jiɖùtɔa, sò èto dɔ̃dɔ̃ jɔ̀jɔɛ be kòjo na ɛ̀ tèmàtɔ. 31 Ku nuŋlɔ̀ɖɛ be xoma kèa be ɖèɖèsia lè tèpe sia tèpea, mì na Yudàviwo ne woa vò fɛ̀ɛ sɔ jè woa ŋutɔwo woabe kɔ̀dowo yomè; 32 mì do àlɔ̀ wo ne àmè nène kèwo la kpe ènyà kudo wo lè xìxàxixa be hùe ɖe nua, woa tù àsi wo ɖoɖa lè wètri woèvègɔ̃ kè tɔ Àdar be ŋùkèkè woètɔ̃gɔ̃a gbè, lè ŋùkèkè ɖèka mè. 33 Ɖoa Mawu kè zãna yebe àcè lè xixe kplògòdòa mèa, sɔ ŋùkèkè ŋua trɔ yɛyìwuwu na wo lè kɔ̀ta cãcã be cɔ̃crɔ̃a tèpe. 34 Ye ŋutia mìawo cã, lè miabe àzãgbèwo dòmèa, mì nɔ ɖù ŋùkèkè gãa kèa to yɛyìwuwu ɖe sia ɖewo ji, 35 àleke be, fifì ku tɛ̀gbɛ̀dòa, e la nyi gãgã be ŋùkuɖoɖoji na mì kudo Pɛrsìatɔwo be èhadotɔwo, vɔ̀a bèa nyi cɔ̃crɔ̃ be ètoklã na àmè kèwo blana èse ɖo mìa ŋutia. 36 Èdù sia èdù àlo èdù-nyigbã ɖe sia ɖe trɔ do kèwo ye mu la wɔ̀ ɖo èsedodo kèawo ji òa, la crɔ̃ lè èwui nu àlo lè èzò nu; e la trɔ zũ àhlùanu mu nyi na àgbètɔviwo ɖèɖe kpò ò, vɔ̀a kpɛ̃sɛ̃nu na ègbemèlãwo ku xèviwo cã sɔ tɛ̀gbɛ̀dò.
Currently Selected:
Ɛstà-G E: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.