Ɛstà-G 7
7
Hamàn be èku
1 Èfìɔa ku Hamàn va la ɖù àzã kudo èfìɔsrɔ̃a. 2 Lè ŋùkèkè èvègɔ̃ ŋua mèa, lè àzãɖùɖua be nuwuwua, èfìɔa gblɔ̃ na Ɛstà be: “Ɛ̃hɛ̃ àleke ò, èfìɔsrɔ̃ Ɛstà? Nukɛ ye nyi àpo biɔbiɔa ò? E le sù àsi wò. Ekɛ nyi àpo jojro ò? Ne e la nyi àpe èfìɔdua be màmamè ŋutɔ cãa, wò la xɔ̀ ɛ̀.” 3 Èfìɔsrɔ̃a ɖo e ŋuti, gblɔ̃ be: “Ne mù kpɔ ɖàgbè lè èfìɔ gbɔa, wo ne sɔ àgbè nyèa kè mù; àpe jijia ye nyi ekèa, kudo dùkɔ̃ nyè tɔ̀a, àpe biɔbiɔa yekè. 4 Nyawo yea, wo sà mi, nyè ŋutɔ ku àpe dùkɔ̃a, sɔ na cɔ̃crɔ̃, hahla, àmè lele, mia ku miabe èviwo ne mia trɔ zũ sumɔviwo ku kòsìwo; vɔ̀a mù wɔ̀ be èto ku na mù, ɖo àmègbletɔ ŋua hati mu jè na èfìɔa be àwa mè ò.” 5 Èfìɔa gblɔ̃ be: “Àmè kɛ ye xà wɔ̀ ènu kèa màa?” 6 Ɛstà ɖoeŋuti be: “Kɛ̃tɔ ɖe! Hamàn ye, vuɛ̃wɔ̀tɔ kèa!'
Troloa Hamàn titɔ lè èfìɔ ku èfìɔsrɔ̃a be ŋùkumè. 7 Èfìɔa sitè lè àzãɖùkplɔ̃a kɔ̀, jo yì èkpa mè. Hamàn tɔ àfɔ̀lele na èfìɔsrɔ̃a, ɖo e kpɔ be yè gbɔ la va nyrã. 8 Gà kè mè èfìɔa trɔ gbɔ̀ so èkpa mèa, Hamàn le srè le kocìa ji le fã yɔ èfìɔsrɔ̃. Zè ɖèka, èfìɔa gblɔ̃ be: “Eŋua gbà sɔ kpea, wò ji be yèa gble èsrɔ̃ nyèa cã ŋuti lè àpe àxomè!'. Kè e gblɔ̃ ènyà kèa troloa, wo va cɔ̃ ènu ŋùmè na Hamàn.
9 Fifìa Bugatàn, èfìɔa be kobonɔ̀awo dòmètɔ ɖèka, gblɔ̃ na èfìɔ be: “Tututu, àtikpo kè Hamàn na wo tù dàɖɛ ɖo Màrdokìa ŋutia, àmè kè ɖè ènyà kè kù ɖo èfìɔa ŋuti to va yì; e nyi àtikpo ɖe kè yìji àbɔglìgo èkà ciwo (50) lète lè Hamàn be àxomè!” Èfìɔa gblɔ̃ be: “Wo ne do èkà ève na ɛ̀ ɖo e ŋuti!” 10 Eye wo do èkà ève na Hamàn ɖo àtikpo kè wo ɖo ɖɛ ɖo Màrdokìa ŋutia nu. Gà ŋua mè ye èfìɔa be èjìbibia jè e mè.
Currently Selected:
Ɛstà-G 7: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.