Ɛstà-G B
B
Cɔ̃crɔ̃a be èdù-se
14 Xomaa mè be ènyàwo lè leke: “Èfìɔ gã Artazɛ̀rzɛs le ŋlɔ̀ ekèa ɖoɖa dùnunɔ̀tɔwo ku dùjikpɔtɔ, woabe ŋutimɛwo, àmè kèwo lè èdù-nyigbã èkà ètɔ̃ ci adrɛ̃ (127) so Indìa sɔ yì Etiopìa.
15 Ènyè kè kèkènà àpe fìɔɖùɖu gã ɖo dùkɔ̃ fuwo ji gbàkudo àpe hɔ̃hlɔ̃ ɖo ànyigbã bliboa jia, nyè mu ji be àcɛ̀kpàkpa be jajra ne kplɔ̀ mù ò, vɔ̀a ku ègaɖùɖu lè ènyuɛ̃ jiji na àmè mè tɛ̀gbɛ̀ le ɖɔ̀ɖɔ̀ɖo nyuɛ̃ɖe mèa, mù ɖo be ma le àpe àcɛ̀gɔ̃mènɔ̀tɔwo be àgbèa ɖotè tɛ̀gbɛ̀, hũnyàhũnyà mànɔ̀ emè, gbà wɔ̀ be fìɔdua la nɔ̀ kɔ̀ ŋùkumè fɛɛ kaka yì yebe lipòwo to, gbìgbɔ̀ ŋutifafa kè àmèwo kpata le kpɔ èmɔ naa jràɖo.
16 Ke mù biɔ ènyà so àpe àɖàŋùɖotɔwo gbɔ be ma nya àlekè woa sùtè ɖope kèawoa, mìa dòmètɔ kè ɖìnyi lè nunyanya mè, àmè kè ɖo jicici nyuɛ̃tɔwo ku ànùkua jè ègàa, àmè kè xɔ̀ bùbu nyikɔ be nutomèhuɛ̃yi èvègɔ̃ lè fìɔdua mèa, nyi Hamàn, 17 e ɖè na mi be lè kɔ̀ta kèwo lè ànyigbã ji kpata dòmèa, àkɔ̀jɔ̀kpli kɛ̃tɔtɔ̀ ɖe jo caka le sɔ yebe èsewo le kpe àkɔ dùkɔ̃ ɖe sia ɖe, àmèwo le gbe èfìɔa be èse dodowo fɛ̀ɛ àleke be jiɖùɖu ŋua le gla ku ènyà jɔ̀jɔɛsòso àgɔ̀ɖemàjea, mu ɖo la nɔ̀ ànyi ò. 18 Eŋua kè mi kpɔ be dùkɔ̃ kèa kɔkɔɖɔkɔ kpòe le sitè ɖo àmè sia àmè ŋuti tɛ̀gbɛ̀do eye be nɔ̀nà àzɔ̀ge le zã àgbè zɔ̃ ɖo yebe èse èdù butɔ̀wo jia eye be crìnà miabe ènyà gbɔ jo yì wɔ̀ ènu màye màye nyrãkuwo ŋutɔ ŋutɔa, eye ekèa ne fìɔdua mu gbà kpɔ èkèlili òa, 19 ye ŋuti mù le do èse be àmè kèwo be nyikɔ mì la xɔ̀ so Hamàn, kè lè èdùmènyawo nu eye e le wɔ̀ cãmì gã be èdɔ na mua be ŋɔ̀ŋlɔ̃a mèa, mì crɔ̃ wo kpata gbidi gbidi, woabe nyɔnùwo, ɖèviwo cã, to woabe kɛ̃tɔwo be èwui nu ŋuzĩzĩmàkutɔ̀ ku ŋùkumèblɔ̀kɔ̀ màwɔ, lè wètri woèvègɔ̃ kè tɔ̀ Àdar be ŋùkèkè woènɛ̀gɔ̃a gbè, 20 nènea ye àmè kèwo sɔ àti sɔ le do àtamè na mi èsɔ̀ va yì ku egbèa, ne wo tutu wo ku àdã dãŋùgbe ɖo ègũ glòbòwo mè lè ŋùkèkè ɖèka mè vɔ̀a, woa kãɖoji na mi lè èsɔ̀mè sɔ so èdùmènyawo be èkèlili mɛmlɛ̃ so ènyà, tìtɔ̀titɔ mànɔ̀ e mèa ŋuti.
Currently Selected:
Ɛstà-G B: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.