Ɛstà-G A
A
Àmègã Màrdokìa be drɔ̃kuku
1 Lè èfìɔ gã Artazɛ̀rzɛs be fìɔɖùɖu be èpè èvègɔ̃a mèa, lè wètri kè tɔ̀ Nisàn be ŋùkèkè cucugbãa mèa, Màrdokìa, Yairò be èvia kudrɔ̃. E nyi Simeìa be èvi, Kisaìa be èvi so Bɛnyamìn be kɔ̀ta mè. 2 E nyi Yudàvi, nɔ̀nà Suzè be èdùmè; e nyi àmè kpɛ̃kpɛ̃ ɖìnyi le wɔ̀ sumɔvi-dɔ lè èfìɔ-xomè. 3 E nyi àhùale kèwo Nèbùkàdnɛzà, Babɛ̀l be èfìɔa, kplɔ̀ so Yèruzàlɛm be dòmètɔ ɖèka, ɖodu ku Yekonìa, Yudeà be èfìɔa. 4 Màrdokìa be èdrɔ̃a ye kè: “Troloa, àpadodo ku zĩgìdi, èjiɖègbè ku ànyigbã hũhũ, hũnyàhũnyà va ɖì lè ànyigbã ji. 5 Kpòa, èhɔ̃drìbà gã èvèwo zɔ̃ va, wo sɔ̀gbè na èkãmètète. Wo fã ku zĩzĩ gãaɖe; 6 ku woabe zĩzĩa, dùkɔ̃ ɖe sia ɖe va sɔ̀gbe na àhùa wɔ̀wɔ àleke be bèa kpe àhùa ku dùkɔ̃ jɔ̀jɔɛwo. 7 Vìvìti ku ànyicɔ̃cɔ̃ be ŋùkèke, xìxà xixa ku èji cici, hèhè le àkɔ ku hũnyàhũnyà gãɖe lè ànyigbã ji. 8 E titɔ dùkɔ̃ jɔ̀jɔɛ bliboa keŋu, le vɔ̃ yebe sukpawo; wo le blago ɖɛ ɖo cɔ̃crɔ̃ ŋuti; 9 wo le na àle na Mawu. Fifìa, ètɔ̀ gbàjà ɖe, èsì gbogbo ɖea, le to so àpa kèa mè sìgbè be e to so èsìjɔ̀pe gãɖe mè nène. 10 Kɛ̃klɛ̃ ɖe ze, sɔ kpe èwèa. Eŋua èhiãfonɔ̀wo fɔ̃ eye wo crɔ̃ àmè ŋùkutawo.
11 Kè e fɔ̃ so àlɔ̃ mèa, Màrdokìa kè kudrɔ̃ kèa eye be kpɔ ènu kè Mawu ɖo ɖɛ be yè la wɔ̀a, e sɔ ɛ̀ ɖo yebe èjì mè eye kaka na èzãdodoa, e jro be yèa ŋɔjè e mè.
12 E yomèa, Màrdokìa xɔ̀ ɖìɖoemè lè fìɔ-xomè ku Gàbatà kudo Tarà, èfìɔ be ŋutimɛ, kobonɔ̀ èvè kèwo kpɔna fìɔsaa ji. 13 Ekè e sè wo pònu so woabe sebla eye e tèkpɔ be yèa ŋɔjè ènu kè wo ɖoa mè: e va nya be wo ji la do àsi ɖoɖa èfìɔ Artazɛ̀rzɛs gbɔ. E sãma wo na èfìɔa. 14 Èfìɔa na wo pò kobonɔ̀ èvèawo ku àtãŋù eye kè wo hũ e mè be nyàwo yea, wo kplɔ̀ wo yì àmèwùpe. 15 Èfìɔa na wo ŋlɔ̀ jɔ̀ɖomè kèawo sɔ ɖoŋùku woa ji; Màrdokìa cã ŋlɔ̀ wo ɖɛ. 16 E yomèa, èfìɔ ɖè ègbè na Màrdokìa be ne ci ànyi sɔ wɔ̀ sumɔvi-dɔ lè fìɔsa mè eye e sɔ ènunana sugbɔ sɔ ɖo ènukè be wɔ̀a be tèpe na ɛ̀. 17 Vɔ̀a Hamàn#1.17 Nyikɔ kèa teŋu nyi fikè wo jì ì lèa àlo nyikɔa be gɔ̃mè ɖèɖe nyi Mɛ̀wɔ̀glòjòa, Hàmadatò be èvia cã lè funu: e nyi èfìɔ be cãmì ɖèka. E xà ɖo èfìɔ be kobonɔ̀ èvèawo ŋuti, le ji èmɔ sɔ gble ènu lè Màrdokìa ku yebe dùkɔ̃a ŋuti.
Currently Selected:
Ɛstà-G A: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.