Àɖàŋùɖètɔ 4
4
Xixea ɖɔ kudo àmètɛtɛɖoto
1Mù gbà do jèsì màjɔ̀ màjɔ kèwo keŋu lè ànyigbã jia. Tɛtɛ ɖotowo lè àfiwo kpata. Àvi fãfãwo, vɔ̀, àmè ɖekpe mu lè la ɖo àsi àkɔ na wo ò. Ɖo ŋusɛ̃a lè àmè kè le tɛ àmè ɖotoa ɖèka si kpò. Eye àmè ɖe mu lè la ɖo àsi àkɔ na wo ò. 2Lè tɔ nyè gomèa, àmè kèwo kuawo tɔ̀ nyɔ wu àmè kèwo lè àgbèawo tɔ̀. 3Eye àmè kè wo mu kpɔ jì òa, tɔ̀ gbà nyɔ sɔ wu àmè kukuwo kudo àgbèagbèwo tɔ̀. Ɖo mu kpɔ màjɔ̀ màjɔ kèwo lè ànyigbã jia ɖekpe ò.
4Mù gbà kpɔ cã be: àmèwo le do nupo na woa ɖokoe eye wo le hlɔ̃ la to woa haviwo ŋuti. Ekèa cã mu ɖo gɔ̃mèsèse ɖekpe ò, e la nyɔ wu be woa pu dù kplɔ̀ àya pòpo do! 5Nyàwo be nyi be hɔ̃vi kè mu le wɔ̀ ènu ɖekpe òa, la ku àdɔ̀ku. 6Vɔ̀, èjɛ̃ gbɔ̃gbɔ̃ viɖe cã nyɔ wu woa pu dù kplɔ̀ àya pòpo do, zè gbɔ̀ zè èvè.
7Mù gbà kpɔ sùkunɔ̀nu wɔ̀wɔ ɖe. 8Ekèa nyi ŋusù ɖèka pɛɛ. Mu jì èvi kaka la va ɖo nɔ̀vi ò. E wɔ̀nà èdɔ mà gbɔ̃jɛ̃, yebe jro ye nyi be bèa ɖo àdɔ̀kùnɔ̀ drì. Co e va biɔ ye ɖokoe sè be: “Àmè kɛ ye mù le wɔ̀ èdɔa na ò? Àmè kɛ ŋuti mù le gbe jìjɔɛ dodo na ɖokoe nyè ɖo ò?” Ekèa cã mu ɖo gɔ̃mèsèse ò, ɖo e nyi àgbè nɔ̀nɔ bàɖàa. 9Àmè èvè be èdunɔ̀nɔ nyɔ wu àmè ɖèka tɔ̀. Ne wo kpli woabe ŋusɛ̃ ɖo èdua, woabe èdɔ la ɖè àlè na wo wu. 10Ne àmè ɖèka jè ànyi a, àmè vègɔ̃a la le è sitè. Vɔ̀ àmè kè ɖèka lèa tɔ̀ la nyrã wu. Ɖo ne e jè ànyi a, àmè ɖekpe mu la nɔ̀ funu la le è sitè ò. 11Nène a ke ye ne àmè èvè mlɔ̃ ànyi a, wo la teŋu le zòzo na woa nɔ̀nɔwo; vɔ̀ leke àmè ɖèka la teŋu le zòzo na ye ɖokoe ɖo ò? 12Wo la teŋu yì xa àmè kè lè ɖèkaa fàfaɖe, vɔ̀ ne wo lè èvèa wo la teŋu wɔ̀ àvũ. Èkà kè wo sɔ èkàvi sùgbɔ gbĩa, mu sònà kaba ò.
13Ɖèkajɛ wòamènɔ̀ ɖe kè nyana ènua, xɔ̀ àsì wu èfìɔ hɔ̃vi sĩsĩɖe kè mu nya àlekè wo biɔna ètopòɖo òa. 14Nyàwo ye be nyi ne e tɔ̀ be ɖèkajɛa gbà to lè gàkpamè va ɖù èfìɔ ŋutɔ cã a, àlo e gbà tɔ ènu biɔ biɔ lè yebe èfìɔdua mè ŋutɔ cã. 15Mù kpɔ ɛ̀ do jèsi be: lè ànyigbã jia, àmè sia àmè la nɔ̀ ɖèkajɛ kè va le xɔ̀ èfìɔzìkpea lè èfìɔ xoxoa sia ji. 16E le trɔ dùkɔ̃ gbogbo ɖewo be ŋùkɔ̀nɔ̀tɔ. Co àmè kèwo la va jè dùkɔ̃amènɔ̀tɔwo yomè a, wo mu la gbà kpɔ jìjɔɛ lekea ò. Ekèa cã mu ɖo gɔ̃mèsèse ò, ɖo e nyɔ wu be woa pu dù kplɔ̀ àya pòpo do.
E la nyɔ wu be wo mu gbà fìã àjɔ̀gbè na Mawu ò
17Kpɔ ɖokoe wò ji ne ènu kè wò la yì wɔ̀ ne wò yì Mawu be àxomèa! Yì ne wòa yì sè ènu kpò. Ekèa nyɔ wu be wòa yì savɔ sìgbè àlekè hɔ̃viwo yì wɔ̀nà ɛ̀a nène. Nyàwoa, wo mu nyana be ènu bàɖà ye yèwo le wɔ̀ ò.
Mina Bible © Bible Society of Togo, 2014.