Àɖàŋùɖètɔ 3
3
Gàmè lè na ènu ɖekpekpe ènu
1Lè xixe kèa mèa, gàmè lè na ènu ɖekpekpe eye ènu sia ènu ɖo yebe gàmè.
2Gàmè lè na èvijìji
eye gàmè lè na èku,
gàmè lè na ènudodo
eye gàmè lè na nukuyàya.
3Gàmè lè ne woa wù
eye gàmè lè ne woa dà èdɔ̀,
gàmè lè ne woa gbã ènu
gàmè lè ne woa tù èxɔ̀.
4Gàmè lè na àvifãfã
eye gàmè lè na ènukòko,
gàmè lè na èfũlòlo
eye gàmè lè na jìjɔɛ kpɔkpɔ.
5Gàmè lè ne woa kãkã èkpewo
eye gàmè lè ne woa bɔ̀ èkpewo
Gàmè lè ne woa kplasi èkɔ̀ na àmèhavi
eye gàmè lè ne woa gbe ekèa wɔ̀wɔ.
6Gàmè lè ne woa ji ènu ne woa kpɔ ɛ̀
eye gàmè lè ne woa bu ènu,
gàmè lè ne woa kpɔ ènu ji
eye gàmè lè ne woa sɔ ènu dãŋùgbe.
7Gàmè lè ne woa zɛ̃ ènu
eye gàmè lè ne woa tɔ̃ ènu,
gàmè lè ne woa bɔ̀nu
eye gàmè lè ne woa pò nupo.
8Gàmè lè ne woa lɔ̃
gàmè lè ne woa crì,
gàmè lè ne woa wɔ̀ àhùa
eye gàmè lè ne woa wɔ̀ ŋuti fàfa.
9Àlè kɛ ye lè àgbàgba kè èdɔwɔ̀tɔ le jèa mè ò? 10Mù le ŋùku ɖo èdɔ kè Mawu sɔ do àsi na àgbètɔ lè ànyigbã jia ŋuti. 11Mawu ŋutɔ nana ènu sia ènu vana lè yebe gàmè nyuɛ̃ mè. E ye na àgbètɔ èjro la nya hùenu kè va yìa kudo kè gbãnàa ɖodu. Co, mu la teŋu nya ènu kèwo keŋu Mawu le wɔ̀a ò. 12Nène a, mù nya be nyɔna ɖèka kè lè e sia ye nyi be, bèa kpɔ jìjɔɛ ne bèa ɖù àgbè. 13Ne àmè ɖe ɖù gbà nù eye be kpɔ gomè lè yebe èdɔwɔ̀wɔ mèa, Mawu be ènunana ye. 14Mù nya be ènu kè Mawu wɔ̀a nɔ̀nà ànyi kaka sɔ yì. Ènu ɖe mu lè woa sɔ kpe àlo woa ɖè to lè e mè ò. Eye Mawu wɔ̀nà ɛ̀ ne woa ɖo bùbu na ɛ̀. 15Ènu kè le jɔ̀ egbè kudo ènu kè la va jɔ̀awo kpata nyi ènu kèwo jɔ̀ va yì xoxoa. Mawu trɔ le wɔ̀ ènu kè jɔ̀ va yì xoxo xòxòa.
Èku nyi ènu sia ènu be vɔ̀vɔnu
16Mù gbà kpɔ cã be: màjɔ̀ màjɔ wɔ̀wɔ xɔ̀ àzìkpe ɖo fikè wo ɖo la wɔ̀ ɖo èse ji lèa, eye màjɔ̀ màjɔ gbà lè fikè wo ɖo la wɔ̀ (sò) jɔ̀jɔɛ lèa. 17Mù gblɔ̃ na ɖokoe nyè be: “Mawu la ɖokòjo na àmè kè le wɔ̀ nyuɛ̃a kudo àmè kè le wɔ̀ vuɛ̃ a cã. Nyàwo gàmè lè na ènu sia ènu, eye e la ɖokòjo na miabe wɔ̀nawo ɖèka-ɖèka.” 18Sɔ kùɖo àgbètɔ ŋutia, mù gblɔ̃ na ɖokoe nyè be: “Mawu le ji la kpɔ yebe ŋutete ne bèa ɖèfiɔ ɛ̀ be e lè sìgbè èlã ke nène.” 19Ɛ̃ɛ àgbètɔ be vɔ̀vɔnu lè sìgbè èlãtɔ̀ ke nène: àgbè gbɔ̃gbɔ̃ ɖèka ŋùkumè ye lè woa mè, eye woa kpata jè na èku. Àgbètɔ mu to èlã ŋuti ò, ɖo àgbèa mu ɖo gɔ̃mèsèse ɖekpe ò. 20Àgbè ɖekpekpe ɖo vɔ̀vɔnu ɖèka ŋùkumè: ènu àgbèagbèwo kpata so ànyigbã kè wo sɔ wɔ̀ woa mè, eye woa kpata la gbìgbɔ̀ trɔ yì ànyigbã a mè. 21Àmè ɖekpe mu lè la gblɔ̃ be: àgbètɔ be gbɔ̃gbɔ̃a la yì ji eye èlã be gbɔ̃gbɔ̃a la ci èdò lè ànyigbã mè ò. 22Mù le do è jèsi be nyɔna ɖèka kè lè àgbètɔ sia ye nyi be bèa ɖù àgbè lè yebe èdɔwɔ̀wɔ mè. Ɖo àmè ɖekpe mu la na ɛ̀ èmɔ̃nu ne bèa kpɔ ènu kè la va jɔ̀ lè yebe ŋùgbedòmè ò.
Mina Bible © Bible Society of Togo, 2014.