Èsea gbìgbɔ̀ hlɛ̃ 9

Izràɛl dùkɔ̃a mu jè na bùbu ɖe ò

1Izràɛl-dùkɔ̃, ɖo èto, ne wòa sè. Wò la sò Yɔrdàn be ètɔ̀a egbè, la yì xɔ̀ dùkɔ̃ kèwo sùgbɔ, eye wo sɛ̃ŋu wu wòawo be ànyigbã. Wò la xɔ̀ woabe èdù kèwo ye lòlò, kèwo nyi àgbògbò-dù kèwo be èglìkpawo kɔkɔ yì tɔ kaka jiŋùkusi kea. 2Ànyigbã a jitɔwo nyi dùkɔ̃ jɔ̀ àsu, sɛ̃ŋu kèwo nyi Anàkviwoa. Mì nya ɛ̀, eye mì sè, wo gblɔ̃nà be: 'Àmè kɛ ye la teŋu kpe àkɔ̀ ku Anàk be jìjimèviwo ò#9.2 Kpɔ Hɛ̃h 13.22?' 3Egbèa, mì la kpɔ ɛ̀ jèsi be Tɔhonɔ̀, mìabe Mawu a ŋutɔ ye la xɔ̀ nùkɔ̀ na mì, sìgbè èzò fiɔ̃ ènu nène, la kplɔ̀ mì sò Yɔrdàn be ètɔ̀a. Ye ŋutɔ ye la crɔ̃ wo, ye ŋutɔ ye la pò wo pu ànyi lè ŋùkɔ̀ na mì. Mì la xɔ̀ woabe ènuwo, eye mì la crɔ̃ wo zè ɖèka, sìgbè lekè Tɔhonɔ̀ fìã àjɔ̀gbè na mìa nène.

4Ne Tɔhonɔ̀, mìabe Mawu a le nyà wo lè ŋùkɔ̀ na mìa, mì mu gbà gblɔ̃ lè mìa ɖokoewo mè be: 'Kè mi nyi àmè jɔ̀jɔɛwoa ŋuti ye Tɔhonɔ̀ kplɔ̀ mi va xɔ̀ ànyigbã kèa ɖo' ò. Vɔ̀a, dùkɔ̃ kèawo be èvuɛ̃ wɔ̀wɔ ŋuti ye Tɔhonɔ̀ le nyà wo jo lè ŋùkɔ̀ na mì ɖo. 5Mu nyi be mì nyi àmè jɔ̀jɔɛwo, àlo, mìabe èjì mè kɔ̀, ŋuti ye mì la xɔ̀ woabe ànyigbã lè woa si ɖo ò. Kè dùkɔ̃ kèawo nyi èvuɛ̃wɔ̀tɔwoa ŋuti ye Tɔhonɔ̀, mìabe Mawu a, le xɔ̀ ànyigbãa lè woa si, na mì ɖo. Tɔhonɔ̀ le wɔ̀ ekèa, sɔ le wɔ̀ ɖo yebe àjɔ̀gbè kè be fìã na Abràham, Izàk ku Yakɔb, mìa tɔgbewoa ji. 6E mè ne kɔ̀ na mì be mu nyi be ɖe ye mì lè jɔ̀jɔɛ ŋuti Tɔhonɔ̀, mìabe Mawu a le sɔ ànyigbã nyuɛ̃ kèa le do àsi na mì ò, ɖoa, dùkɔ̃ kè be èkɔ̀ lìaa ye mì nyi.

Sìka-nyìvia: Dùkɔ̃a jè àgɔ̀

7Mì ɖoŋù lekè mì do àdɔ̀mèze na Tɔhonɔ̀, mìabe Mawu a, lè zògbè a jia. So gbè kè gbè mì to so Ejiptè-nyigbãa ji, kaka va na gà kè mè mì va ɖo fikèa, àgla kpò mì le jè do Tɔhonɔ̀. 8Lè Horɛb be ètoa gbɔa, mì do àdɔ̀mèze na Tɔhonɔ̀, eye Tɔhonɔ̀ bijì do mì, kaka jro be yèa crɔ̃ mì ŋutɔ cã. 9Ekè mù yì ètoa ji, ne ma yì xɔ̀ èse be èkpe gbàjà kèwo nyi èzò kè Tɔhonɔ̀ ɖù ku mìa be èkpewoa, mù ci ètoa ji, ŋùkèkè èkà ku èzã èkà, ènu màɖù, ku èsì mànù#9.9 Kpɔ Tot 24:18.

10Tɔhonɔ̀ sɔ èkpe gbàjà èvè kèwo ji Mawu sɔ ye ŋutɔ be àlɔ̀vi ŋlɔ̀ ènu ɖoa na mù. Ènyà kèwo keŋu Tɔhonɔ̀ gblɔ̃ na mì, so ètoa ji, lè èzòa mè, gbè kè gbè be bɔ̀ mìa kpataa lè èkpeawo ji.

11Ŋùkèkè èkà ku èzã èkà yomè ye Tɔhonɔ̀ sɔ èkpe èvè kèwo nyi zòɖùɖu be èkpeawoa na mù. 12E yomè a Tɔhonɔ̀ gblɔ̃ na mù be: 'Sitè, ne wòa ɖì kaba so fikèa, ɖo dùkɔ̃ wòa jè èvuɛ̃ gãɖe mè. Mù sɔ ɖoɖo ku àzɔ̃lì kè dùkɔ̃ kè wò ɖè to so Ejiptè a la zɔ̃a, do àsi na woa, mu dìdì ò. Gãkea wo gbà trã èmɔ xoxo, jo lè ɖoɖo kèa ji vɔ̀. Wo srè ègà sɔ wɔ̀ legba!' 13Eye Tɔhonɔ̀ gblɔ̃ na mù be: 'Mù kpɔ be dùkɔ̃ kèa, èkɔ̀ lìa na ɛ̀ nyàwo! 14Ɖè àsi lè ŋuti nyè, ma crɔ̃ wo, ne ma tutu woabe nyikɔ jo lè xixea mè! Vɔ̀a, èwò ya, mù la sɔ wò wɔ̀ dùkɔ̃ gãɖe kè la sùgbɔ, eye be la sɛ̃ŋu wu woa. 15Ekèa yomè a, mù trɔ ɖì so ètoa ji, èto kè kpata le bìzòa, eye mù le zòɖùɖu be èkpe gbàjà èvèawo ku àlɔ̀ èvè. 16Eye mù kpɔ be mì wɔ̀ èvuɛ̃ ɖo Tɔhonɔ̀, mìabe Mawu ŋuti, ekè mì srè ègà, sɔ ta ènyìvi na mìa ɖokoea. Tɔhonɔ̀ na mì ɖoɖo kèwo ji mì la zɔ̃a, vɔ̀a, mì gbà trã èmɔ xoxo. 17Ekèa ŋuti, mù kɔ èkpe èvèawo yìji, sɔ wo xla ɖo ànyi ku àlɔ̀ èvè, gbã wo lè mìabe ŋùku mè#9.17 Kpɔ Tot 32.19.

Sìka-nyìvia: Mosè blìbɔ̀ ɖo dùkɔ̃a ta

18Mù gbà sɔ ŋùmè cɔ̃ ànyi lè Tɔhonɔ̀ be ŋùmè ke, sìgbè sãa nène, ènu màɖù, èsì mànù, ŋùkèkè èkà, èzã èkà, ɖo èvuɛ̃ kèwo keŋu mì wɔ̀ lè Tɔhonɔ̀ be ŋùmè, sɔ le jè àgɔ̀ do èa ŋuti. 19Mù vɔ̃ Tɔhonɔ̀ be èjìbibi ku yebe àdɔ̀mèze kè be do do mì, kaka be yèa crɔ̃ mì. Vɔ̀a, hùe ŋua nua, Tɔhonɔ̀ gbà ɖo èto mù ke. 20Tɔhonɔ̀ do àdɔ̀mèze veve ɖe do Arɔ̀n cã, eye be jro la crɔ̃ ɛ̀; ekèa na be mù ɖè kuku ɖo Arɔ̀n cã ta. 21Èvuɛ̃ kè mì wɔ̀, ekè nyi ènyìvia, mù sɔ ɛ̀, mù tɔ ɛ̀ èzò, gbã ɛ̀, tù ì, be mè, eye mù lɔ àfia kɔ̀ ɖo ètɔ̀ wɔ̀ àdã kè le ɖì so ètoa jia mè.

22Lè Tàberà, lè Masà, lè Kivrɔ̀t-Tavaa#9.22 Kpɔ Hɛ̃h 11.3-1; Tot 17.1-7; Hɛ̃h 11.31-34mì do àdɔ̀mèze na Tɔhonɔ̀. 23Eye, kè Tɔhonɔ̀ ɖo mì ɖoɖa, lè Kadɛs-Bàrneà#9.23 Kpɔ Hɛ̃h 13.26 cã a, be: 'Mì ɖo àsi ànyigbã kè mù sɔ na mìa jia', mì jè àgla ɖo Tɔhonɔ̀, mìabe Mawu be ègbè kè be ɖè na mìa ŋuti. Mì mu dojì ɖo e ŋuti ò, eye mì mu ɖo èto yebe ègbè ò. 24So kaka gbè kè gbè mù jèsi mìa ke, mì le jè àgla ɖo Tɔhonɔ̀ ŋuti.

25Eye mù blìbɔ̀ na Tɔhonɔ̀, ŋùkèkè èkà, èzã èkà sɔ̃ŋu, wàlɛbɛ kè mù sɔ ŋùmè cɔ̃ ànyi ɖo yebe ŋùkɔ̀a, ɖoa, Tɔhonɔ̀ gblɔ̃ be yè la crɔ̃ mì. 26Mù fãkue na Tɔhonɔ̀ be: “Tɔhonɔ̀ Mawu, mù gbà crɔ̃ dùkɔ̃ wò kè nyi wò ŋutɔ àpo àdɔ̀kùnu kè wò xɔ̀ plè lè àpo gogo mè, eye wò ŋutɔ wò ɖè to lè Ejiptè ku àpo àlɔ̀ sɛ̃sɛ̃ ò! 27Ɖoŋù sumɔ̃vi wòwo Abràham, Izàk ku Yakɔb. Mù gbà kpɔ dùkɔ̃ kèa be ètamèsɛ̃sɛ̃, yebe xɔ̀sè màɖo ku yebe èvuɛ̃wɔ̀wɔ gbɔ ò. 28Mù gbà ɖè èmɔ na àmèwo, ne woa gblɔ̃ lè ànyigbã kè ji wò kplɔ̀ mi soa be: 'Tɔhonɔ̀ mu tɛŋu kplɔ̀ wo yì ànyigbã kè be àjɔ̀gbè be fìã na woa ji ò. E crì wo, ŋuti ye be kplɔ̀ wo to lè Ejiptè, ne bèa yì wù wo, lè zògbè a ji.' 29Gãkea, dùkɔ̃ wò ye wo nyi, eye wo nyi wò ŋutɔ àpo ècrɔ̃nu kè wò vlũ àbɔ sɛ̃ŋu wòa, sɔ ɖè to lè Ejiptè-nyigbã ji.”

Currently Selected:

Èsea gbìgbɔ̀ hlɛ̃ 9: GEN

Highlight

Copy

Compare