Èsea gbìgbɔ̀ hlɛ̃ 30

Izràɛlviwo la trɔ gbɔ̀ va Tɔhonɔ̀ gbɔ

1Eye, ne ènu kèawo keŋu jò ɖo ji wò, sìgbè sìtu, àlo kpɛ̃sɛ̃ kèwo mù sɔ ɖo ŋùkɔ̀ na wòa nènea, wò la ɖè susu, wàlɛbɛ kè wò la nɔ̀ dùkɔ̃ kèwo keŋu dòmè Tɔhonɔ̀, àpo Mawu a la kplɔ̀ wò yìa. 2Wò la trɔ gbɔ̀ va Tɔhonɔ̀ àpo Mawu a gbɔ ku àpo èjì blibo, àpo àmèti bliboa, eye èwò ku èvi wòwo, mì la sè ètonu na Tɔhonɔ̀. Mì la zɔ̃ ɖo ɖoɖo kèwo keŋu mù sɔ le do àsi na mì egbèa ji. 3Eye, ne wò trɔ gbɔ̀ vaa, Tɔhonɔ̀, àpo Mawu a la gbìgbɔ̀ trɔ àpo àgbè, e la kɔ̀ àdɔ̀mè ɖo ŋuti wò, e la gbìgbɔ̀ bɔ̀ àpo dùkɔ̃a ɖodu, so dùkɔ̃ kèwo keŋu dòmè Tɔhonɔ̀, àpo Mawu kã mì hlɛ̃ ɖoa mè. 4Ne kaka xixea be ènukpòpe ke wo kplɔ̀ wò yì cã a, funua ke ye Tɔhonɔ̀, àpo Mawu a la yì bɔ̀ àpo dùkɔ̃a ɖodu lè, eye be la kplɔ̀ wò va. 5Tɔhonɔ̀, àpo Mawu a la yì kplɔ̀ wò gbɔ̀ va ànyigbã kè nyi tɔgbe wòwo tɔ̀ sãa ji, eye be la nyi tɔ̀ wò; Tɔhonɔ̀ la na, wò la jì ɖo e ji, lè nyɔna mè, eye mìabe dùkɔ̃a la sùgbɔ wu mìa tɔgbewo. 6Tɔhonɔ̀, àpo Mawu la sò èvo na àpo èjì, gbà wɔ̀ ɛ̀ na àpo jìjimèviwo cã, àleke be wòa lɔ̃ Tɔhonɔ̀, àpo Mawu, ku àpo èjì blibo ku àpo àmèti bliboa, ne wòa nɔ̀ àgbè. 7Eye Tɔhonɔ̀, àpo Mawu la kɔ̀ kpɛ̃sɛ̃ kèawo kpata ɖo àpo kɛ̃tɔ kèwo la sɔ àmè cìcri tĩ yo wò mèa ji. 8Wàlɛbɛ ŋua, èwò yaa, wò la nɔ ɖo èto Tɔhonɔ̀, àpo Mawu be ègbè, eye wò la nɔ zɔ̃ ɖo yebe ɖoɖo kèwo keŋu mù sɔ le do àsi na wò egbèa ji. 9Tɔhonɔ̀, àpo Mawu a la na nyɔna la kplɔ̀ àpo wɔ̀nawo keŋu do, wàlɛbɛ kè àpo àdɔ̀mèviwo la nɔ sùgbɔ ɖo e ji kpe èa. Tɔhonɔ̀ àpo Mawu la na èlã wòwo la nɔ jì ɖo e ji, àpo àgblè mè nukuwo la nɔ flãŋu, eye Tɔhonɔ̀ la sɔ jìjɔɛ, nɔ kɔ̀ nyɔna ɖo ji wò, sìgbè lekè be sɔna jìjɔɛ, kɔ̀nà ɛ̀ ɖo tɔgbe wòwo jia nène. 10Ɖoa, wò la nɔ ɖo èto Tɔhonɔ̀, àpo Mawu a be ègbè, eye wò la le yebe èse kèwo ye wo ŋlɔ̀ ɖo xoma kèa mèa ɖo àsi, ne wò trɔ gbɔ̀ va Tɔhonɔ̀ gbɔ ku àpo èjì blibo, kudo àpo àmèti bliboa.

Mawu be ènyàa mu lè dìdìpe ò

11Ɛ̃ɛ, èse kè mù sɔ le do àsi na wò egbèa, mu sɛ̃ŋu na wò wu nu ò. E ji wɔ̀wɔ ɖo mu glo wò ò. 12Èsea mè-nyàwo mu lè jiŋùkusi, ne woa gblɔ̃ be: “Àmè kɛ la yì jiŋùkusi, la yì sɔ ɛ̀ va na mi, ne mia sè emè, ne mia wɔ̀ ɖo e ji ò?” 13Eye mu lè àpù godo cã, ne woa gblɔ̃ be: “Àmè kɛ la sò àpùa, la yì e godo, la sɔ ɛ̀ va na mi, ne mia sè emè, àleke be mia wɔ̀ ɖo e ji ò? 14Ɛ̃ɛ, ènyàa mu dìdì lè gbɔ wò ò, e gogo wò, e lè ènu mè na wò, eye be gbà lè èjì mè na wò, àleke be wòa teŋu wɔ̀ ɖo e ji.

Cã àgbè

15Kpɔɖa, egbèa, mù sɔ àgbè ku nyɔna, èku ku àyàɖùɖu le ɖo ŋùmè na wò. 16Ègbè kè ènyè ya, mù le ɖè na wò egbèa ye nyi be wòa lɔ̃ Tɔhonɔ̀, àpo Mawu a; wòa zɔ̃ lè yebe èmɔwo ji, wòa le yebe èsewo ɖo àsi; wòa wɔ̀ ɖo yebe ɖoɖowo ku yebe èkɔ̀dowo ji. Ne wò wɔ̀ ɖo woa jia, wò la nɔ̀ àgbè, wò la jì ɖo e ji, eye Tɔhonɔ̀, àpo Mawu a la tusì na wò lè ànyigbã kè ji wò le yì, ne bèa trɔ zũ tɔ̀ wòa ji. 17Vɔ̀a, ne èjì wò trã èmɔa, ne wɔ̀ mu ɖo èto ò, ne wò ɖè àsi lè ɖokoe wò ŋuti, eye wo kplɔ̀ wò yì le do èta gũ na vòduwo, eye wò le sɛ̃ woa, 18mù le kã àtãŋu na mì egbè be: mì la crɔ̃ gbidi-gbidi, eye mì mu la nɔ̀ àgbè dìdi lè ànyigbã kè ji mì le yì, ne bèa trɔ zũ mìa tɔ̀, ne mì sò Yɔrdàn be ètɔ̀a ò.

19Mù le tà jiŋùkusi ku ànyigbã na mì, egbè be: àgbè ku èku ye mù sɔ le ɖo ŋùmè na mì; ekèawo ye nyi sìtu ku kpɛ̃sɛ̃. Cã àgbè, àleke be èwò ku àpo jìjimèviwo, mìa nɔ̀ àgbè; 20wò la lɔ̃ Tɔhonɔ̀, àpo Mawu a, wò la ɖo èto yebe ègbè, ne wòa tɛ ɖo e ŋuti. Nène a ye wò la wɔ̀, ne wòa nɔ̀ àgbè, ne wòa nɔ̀ àgbè dìdi, lè ànyigbã kè be àjɔ̀gbè Tɔhonɔ̀ fìã be yè la sɔ na Abràham, Izàk ku Yakɔb, tɔgbe wòawo ji.

Currently Selected:

Èsea gbìgbɔ̀ hlɛ̃ 30: GEN

Highlight

Copy

Compare