Èsea gbìgbɔ̀ hlɛ̃ 21

Àmèwùwu kè wo mu nya ètɔ na ò a

1Ne wo kpɔ àmèkuku ɖe lè ègbe mè, lè ànyigbã kè Tɔhonɔ̀, mìabe Mawu sɔ le na mìa ji, eye wo mu nya àmè kè wù àmèa ò a, 2mìabe àmèsĩsĩwo ku mìabe kòjoɖotɔwo la to, yì jije dìdimè kè lè àfi kè àmèkukua lèa ku èdù kèwo pòxla funua dòmè. 3Ne wo kpɔ èdù kè àmèkukua gogo wua, èdù ŋua mètɔwo be àmèsĩsĩwo la sɔ ènyìnɔvi kè mu kpɔ wɔ̀dɔ kpɔ ò, eye wo mu do èkɔ̀ga na kpɔ ò a ɖèka. 4Èdùa be àmèsĩsĩwo la kplɔ̀ ènyìnɔvia yì ètɔ̀ wɔ̀ àdã màpu gbèɖe ɖe gbɔ, lè tèpe ɖe kè wo mu dè àgblè ɖo kpɔ, eye wo mu do ènu ɖo kpɔ ò. Wo la ŋɛ̃ èkɔ̀ na ènyìnɔvia lè ètɔ̀ wɔ̀ àdã a mè.

5Eye hũbonɔ kèwo nyi Levì be èviwoa la zɔ̃ va, ɖoa, woawo ye Tɔhonɔ̀, mìabe Mawu cã, ne woa wɔ̀ sɛ̃sɛ̃-dɔ na Tɔhonɔ̀, ne woa nɔ tusì na àmè, lè Tɔhonɔ̀ be nyikɔ mè. Hũbonɔawo be ènu mè-nyà ye sònà ènyàdɔ̃dɔ̃ ku àbìkpa ɖekpekpe be ènyà. 6E yomè a, èdùa mè be àmèsĩsĩ kèwo kpata gogo àmèkukua la klɔ àsi, lè ètɔ̀ wɔ̀ àdã mè, ɖo ènyìnɔvi kè wo ŋɛ̃ èkɔ̀ na a ji. 7Wo la gblɔ̃ be: 'Mu nyi miabe àlɔ̀wo ye kɔ̀ èhũ kèa ɖɛ ò, eye mu nyi miabe ŋùkuviwo ye kpɔ e wɔ̀pe ò. 8Tɔhonɔ̀ sɔ kè Izràɛl dùkɔ̃ kè nyi wò ŋutɔ àpo dùkɔ̃ kè wò xɔ̀ plèa, eye mù gbà gble èɖe mà-nyãtɔ be èhũ kɔ̀ ɖo ànyi ɖo dùkɔ̃ wòa dòmè ò.' Ekè a la ɖè èhũ kɔ̀ ɖɛ be èvuɛ̃ a be èɖi jo lè dùkɔ̃ a ŋuti.

9Nène a, ne mì le wɔ̀ ènu kè jɔ̀ a lè Tɔhonɔ̀ be ŋùmè a, mì la ɖè èɖe mà-nyãtɔ be èhũ kɔ̀ ɖɛ be èɖi a jo lè mìa dòmè.

Àhùale nyɔ̃nù ɖèɖe

10Ne mì to, yì kpe àkɔ ku mìabe kɛ̃tɔ, eye Tɔhonɔ̀, mìabe Mawu sɔ ɛ̀ do àsi na mìa, ne mì kplɔ̀ àhùalewoa, 11ne, lè àhùalewo dòmèa, mìa dòmètɔ ɖe kpɔ tùgbɛ̀jɛ nyuɛ̃ ɖe kè be ènu jɔ̀jì na ɛ̀, eye be jro la ɖèa, 12ŋusùa la kplɔ̀ ɛ̀ ɖo yebe àxomè; tùgbɛ̀jɛa la lũ èta, e la ɖè fèsu, 13e la ɖè àwù kè lè e ŋuti, gà kè mè wo kplɔ̀ ɛ̀ àhùalea ɖɛ, eye be la ci ŋusùa be àxomè. E la fã ètɔa ku ènɔa, wètri ɖèka sɔ̃ŋu; e yomè a, ŋusùa la ɖè è, e la dɔ̃ e gbɔ, eye nyɔ̃nùa la nyi èsrɔ̃a. 14Vɔ̀, ne e va va e mè be yebe ènu mu gbà jɔ̀jì na ŋusùa ke ò a, ŋusùa la ɖè àsi lè e ŋuti, be la jo, lè e ɖokoe si. Wo mu la sɔ sà, la xɔ̀ ègà, àlo, la sɔ kpɔ àlè ò, ekè e nyi ŋusùa be èsrɔ̃ va yìa ŋuti.

Èvi cucugbãa be jèna

15Ne ŋusù ɖe ɖo èsrɔ̃ èvè, eye be lɔ̃ ɖèka, vɔ̀a mu lɔ̃ èvègɔ̃a ò a, ne èvèawo jì ŋusùviwo na ɛ̀, eye kè jè ŋùkɔ̀a nyi nyɔ̃nù kè mu lɔ̃ ò a be èvia, 16gbè kè gbè ŋusùa la mã yebe ècrɔ̃nuwo na ŋusùvi èvèawoa, mu la teŋu xɔ̀ ŋusùvi àmègãxo kè nyi nyɔ̃nù kè mu lɔ̃ ò a be èvia be jènaa, lè e si, sɔ na nyɔ̃nù kè be lɔ̃a be èvia ò. 17Vɔ̀a, e ɖo la kpɔ ŋusùvi cucugbãa be àmègãxo nyinyi jèsi na nyɔ̃nù kè mu lɔ̃ ò a be èvia bòhũ, ne bèa sɔ yebe ècrɔ̃nua kpata be mamã tèpe èvè sɔ na àmègãxoa. Ŋusùvi ŋua, kè nyi èvitɔa be ŋusù mè nɔ̀nɔ be nuku cucugbãa be jèsìa ɖo la xɔ̀ èvi cucugbã be jèna.

Ŋusùvi jè àgla

18Ne ŋusù ɖe ɖo ŋusùvi jè àgla ɖe, kè mu ɖona èto ètɔa, àlo ènɔa ò, ne wo pò nupo na ɛ̀, vɔ̀a be gbe be yè mu la sè ò a, 19eŋuã, ètɔa ku ènɔa la le è, la kplɔ̀ ɛ̀ yì èdùmè-mègãwo gbɔ, lè woabe èdùa be àgbonu, lè kòjoɖope. 20Wo la gblɔ̃ na àmèsĩsĩawo be: 'Kpɔɖa, miabe ŋusùvi kèa nyi àmè jè àgla kè mu sènà ètonu na mi ò; e nɔ̀nà àgbè bàɖà, ɖùnà ènusu, eye be nùnà àhà mu!' 21Èdùa mètɔwo kpata la pò èkpe è wù. Nène a, mì la ɖè èvuɛ̃ jo lè mìa dòmè; ne Izràɛlviwo kpata sè èa, vɔ̃vɔ̃ la ɖo wo.

Àmè kè wo do èkà ève na a

22Ne àmè ɖe wɔ̀ èvuɛ̃, eye wo dohùɛ do è, eye mì gblehùɛ do è, do èkà ève na ɛ̀, ɖo àti ŋutia, 23yebe kukua mu la nɔ̀ àtia ŋuti, èzã la do, èŋù la kè ò. Mì ɖo la ɖì ì, gbè ŋua gbè ke, ɖoa, àmè kè wo ka ɖo àti ŋutia nyi Mawu be kpɛ̃sɛ̃. Mì mu la na ànyigbã kè Tɔhonɔ̀, mìabe Mawu sɔ wɔ̀ ècrɔ̃nu na mìa bèa trɔ mà-kɔ̀ mà-kɔ ò.

Currently Selected:

Èsea gbìgbɔ̀ hlɛ̃ 21: GEN

Highlight

Copy

Compare