Èsea gbìgbɔ̀ hlɛ̃ 14

Ècɔ be èkɔ̀nu ɖewo

1Èviwo mì nyi na Tɔhonɔ̀, mìabe Mawu. Mì mu la do àbì mìa ɖokoewo ŋuti, eye mì mu la plɔ ŋùgonu, la sɔ wɔ̀ ècɔ ò#14.1 Kpɔ Lev 19.28; 21.5; Yer 41.5. 2Kè mì nyi dùkɔ̃ kè ŋuti wo kɔ̀ na Tɔhonɔ̀, mìabe Mawu a ŋutia, mìawo ye Tɔhonɔ̀ cã, ne mìa trɔ zũ dùkɔ̃ kè nyi ye ŋutɔ be dùkɔ̃, lè dùkɔ̃ kèwo keŋu lè ànyigbã jiawo dòmè#14.2 Kpɔ Tot 19.5; Tit 2.14; 1Pet 2.9.

Èlã kèwo nyi èkɔ̀a ku kèwo wo teŋu ɖùa

3Mì mu la ɖù ènu nyɔŋu ɖekpe ò#14.3 Kpɔ Lev 11.1-23. 4Èlã kèwo mì teŋu ɖùawo ye nyi ekèawo: ènyì, àlɛ̃ ku ègbɔ, 5èpè ɖèka àzò ɖèka, èzĩ, èsèe, àvũgbɛ, àyɔ̀-gbɔ, ètomè-gbɔ, ègbemè-gbɔ. 6Èlã kèwo kpata be fèsu mè fɛ̃ ɖo èvè, eye wo gbìgbɔ̀ trɔ ɖùnà ènu kè wo mìa, mì teŋu ɖù wo. 7Vɔ̀a, lè kèwo trɔ ɖùnà ènu kè wo mìawo dòmèa, mì mu la ɖù ekèawo ò: èsɔ èkpovènɔ̀, ègbemè-zũi, ètomè-hlɔ̃màdɛ̃, ɖoa, wo gbìgbɔ̀ trɔ ɖùnà ènu kè wo mìa, vɔ̀a, wo mu ɖo fèsu lè àfɔ̀ nu ò. Mì mu la ɖù wo ò. Woa ŋuti mu kɔ̀ ò. 8Mì mu la ɖù èhã cã ò, ɖoa, e ɖo fèsuwo vɔ̀a, mu trɔ ɖùnà ènu kè be mìa ò. Èlã kè be ŋuti mu kɔ̀ ò a, ye be nyi na mì. Mì mu ɖo la ɖù èlã ŋuawo, àlo woabe kuku ò.

9Lè ètɔ̀mè-lãwo dòmèa, ekèwo mì teŋu ɖùawo nyi: ekèwo keŋu ɖo àjà ku ècroa, mì kpɔ èmɔ la ɖù wo. 10Vɔ̀a, ekèwo mu ɖo àjà ku ècro ò a, mì mu la ɖù wo ò, ɖoa, woa ŋuti mu kɔ̀ ò.

11Mì teŋu ɖù xèvi kèwo ŋuti kɔ̀awo kpata. 12Vɔ̀a, xèvi kèwo mì mu la ɖù ò a, ye nyi ekèawo: èhɔ̃, àpùmè-hɔ̃, àmlãkoe, 13àvàkò ku e hati vòvòvòwo, 14àkpàfiɔ̃ ku e hati vòvòvòwo, 15tatabòli, àzexe, àpùmè-hɔ̃ne, ku àvàkò vòvòvòwo hati, 16àzexe, kpokpò, fãvi-hũto, 17àkpàfiɔ̃ ku e hatiwo keŋu, 18èglò ku e hatiwo keŋu, àgùtɔ.

19Èlãklìvi kèwo ɖo àwàda, eye woa ŋuti mu kɔ̀ ò a, mì mu la ɖù wo ò. 20Vɔ̀a, mi teŋu ɖù èlã kèwo ɖo àwàda, eye woa ŋuti kɔ̀awo kpata.

21Mì mu la ɖù èlã kè kua ò. Mì la sɔ na àmèjro kè lè èdùa mèa, ne bèa teŋu ɖù ì fàa, àlo, mìa sɔ ɛ̀ sà do àmèjrowo, ɖoa, dùkɔ̃ kè ŋuti wo kɔ̀ na Tɔhonɔ̀, mìabe Mawu a ye mì nyi. Mì mu la ɖà ègbɔvi, lè ènɔa be ànɔsi mè ò#14.21 Kpɔ Tot 23.19.

Ènu mamã èwogɔ̃a

22Èpè sia èpèa, mì la nɔ ɖè ènu kèwo mì do, eye wo mìɔ̃ ɖo mìabe àgblèwo mèa be nukuwo kpata be mamã èwogɔ̃a. 23Mì la ɖù mìabe èlù, mìabe àhà yeye, mìabe àmì, mìabe ènyì, mìabe àlɛ̃ ku mìabe ègbɔwo be èvi cucugbãawo lè Tɔhonɔ̀, mìabe Mawu be ŋùkɔ̀, lè tèpe kè be cã be yèa sɔ yèbe nyikɔ ɖoa#14.23 Kpɔ Lev 27.30-33.. Nène a ye mì la wɔ̀, la kpla lekè mì la nɔ vɔ̃ Tɔhonɔ̀, mìabe Mawu a ɖoa gbè sia gbè. 24Ne èmɔ kè mì la zɔ̃, la sɔ àgblèmè-nukuawo be mamã èwogɔ̃a yìa dìdìa, ne tèpe kè Tɔhonɔ̀, mìabe Mawu a cã be yèa sɔ yèbe nyikɔ ɖoa mu sɔ̀ lè mìabe nɔ̀pea gbɔ ò a, ne Tɔhonɔ̀, kɔ̀ sìtu sùgbɔ ɖo mìa jia, 25eŋuã, mì la sɔ nuku èwogɔ̃a dɔ̀lì ku ègà; mì la miɔ̃ ègàa ɖo àlɔ̀ mè, eye mì la yì tèpe kè Tɔhonɔ̀, mìabe Mawu cã a. 26Ne mì ɖo funua, mì la sɔ ègàa plè ènu kè mì jro a, sìgbè ènyì, àlɛ̃, àlo ègbɔ, àhà vivi, àlo àhà sɛ̃sɛ̃ ku ènu ɖekpekpe kè gbe jro mì kpòa; mì la ɖù ì, lè funua ku mìabe àxuedoa keŋu, lè jìjɔɛ kpɔkpɔ mè, lè Tɔhonɔ̀, mìabe Mawu a be ŋùkɔ̀. 27Mì mu gbà ŋlɔ̀be Levì kèwo lè mìabe èdùwo mèa ò, ɖoa, wo mu mã ànyigbã ɖekpe, àlo, ècrɔ̃nu ɖekpe ku mì ò.

28Èpè ètɔ̃ sia èpè ètɔ̃a, mì la ɖè mìabe nukuwo kpata be mamã èwogɔ̃, èpè ètɔ̃gɔ̃a tɔ̀a ɖo vò, vɔ̀a, mì la sɔ ɛ̀ ɖo mìabe èdùa mè. 29Eye, Levì kèwo mu mã ànyigbã, àlo ècrɔ̃nu ɖekpe ku mì ò a ku àmèjrowo, ècɔɛviwo kudo àhòsì kèwo ye lè mìabe èdùwo mèa, la va xɔ̀ ènu kè kpata la gbe sù wo kpòa, ne Tɔhonɔ̀, mìabe Mawu a ne tusì na mì, lè ènu kèwo keŋu mì la wɔ̀a mè.

Currently Selected:

Èsea gbìgbɔ̀ hlɛ̃ 14: GEN

Highlight

Copy

Compare