Èsea gbìgbɔ̀ hlɛ̃ 13

Ètodɔ̃ na àmè kè la dɔ̃ àmè ɖo vòdu sɛ̃sɛ̃ mèa

1Mì kpɔ nyuɛ̃ ɖe, ne mìa wɔ̀ ɖo ènyà kèwo keŋu lè èse kè mù sɔ le do àsi na mìa mèa ji. Mì mu la sɔ ènu ɖekpe kpe ò, eye mì mu la ɖè ènu ɖekpe lè e mè ò.

2Ne gblɔ̃ɖɛtɔ ɖe, àlo ènumèkpɔtɔ ɖe so mìa dòmè, eye be gblɔ̃ jèsì ɖe, àlo ŋùdãnu ɖe ɖɛ na mìa, 3ne jèsì, àlo ŋùdãnu kè be gblɔ̃ ɖɛ na mìa va e mèa, ne e gblɔ̃ be: 'Mia kplɔ̀ vòdu bu ɖewo do, ne mia sumɔ woa', vòdu kèawo kè mì mu jèsi òa, 4mì mu la ɖo èto gblɔ̃ɖɛtɔ, àlo ènumèkpɔtɔ ŋua be ènyàwo ò. Ɖoa, Tɔhonɔ̀ mìabe Mawu ye to èmɔ kèa ji, le do mì kpɔ, ne bèa kpɔ be mì lɔ̃ Tɔhonɔ̀ mìabe Mawu ku mìabe èjì blibo, kudo mìabe àmèti bliboa màa. 5Tɔhonɔ̀, mìabe Mawu yomè ye mì la nɔ̀, e ye mì la si, yebe èsewo ye mì la le ɖo àsi. Yebe ègbè ye mì la sè, e ye mì la sɛ̃, e ye ŋuti mì la tɛ ɖo. 6Vɔ̀a, gblɔ̃ɖɛtɔ, àlo ènumèkpɔtɔ kèa yaa, wo la wù ì, ɖoa, e gblɔ̃ ènyà, sɔ do àglajèje àmèwo mè, ɖo Tɔhonɔ̀, Mawu kè kplɔ̀ mì to so Ejiptè, Mawu kè xɔ̀ mì plè so kluvi nyinyi mèa ŋuti. Ŋusù kèa jro la kplɔ̀ mì jo lè èmɔ kè Tɔhonɔ̀, mìabe Mawu ta na mìa ji. Nène a ye mì la ɖè èvuɛ̃ kè be nyia to lè mìa dòmèa yeŋu.

7Ne mìa dòmètɔ ɖe be nɔ̀vi, ŋusùvi kè ènɔa jìa, àlo yebe èvi ŋusùvi, àlo nyɔ̃nùvi, àlo èsrɔ̃a, nyɔ̃nù kè ŋuti be tɛ ɖo kpãmia, àlo yebe èhavi kè lè sìgbè ye ŋutɔ ke nènea, va lè bèbe mè, gblɔ̃ na ɛ̀ be: 'Mia yì sumɔ vòduwo', vòdu kèwo mìa ŋutɔwo cã, mì mu jèsi ò, kèwo mìa tɔwo cã, wo mu jèsi ò, 8lè dùkɔ̃ kèwo gogo mì, àlo kèwo lè àzɔ̀ge, trɔ do mì, so àgo ɖe ji, yì àgo bu ji, lè èdùa mèa, 9mì mu la lɔ̃ ò, mì mu la ɖo èto è ò, mì mu la sè veve na ɛ̀ ò, mì mu la ku ŋuzĩzĩ na ɛ̀ ò, mì mu la xɔ̀ ènyà ɖo e ta ò. 10Vɔ̀ bòhũa, mì ɖo la wù ì godo. Àmè kè be jro la kplɔ̀a be àlɔ̀ ye ɖo la dà èkpe cucugbã tɔ̀awo, eye dùkɔ̃ bliboa kpata la dà èkpe kplɔ̀ ɛ̀ do. 11Mì la pò èkpe è wù, ɖoa, e jro la kplɔ̀ mì jo yì boo, lè Tɔhonɔ̀, mìabe Mawu kè kplɔ̀ to lè Ejiptè-nyigbã ji, àfi kè mì nyi kluviwo lè kpɔa gbɔ. 12Izràɛl dùkɔ̃ bliboa la sè è, eye dùkɔ̃a la vɔ̃; nènea, wo la nɔ̀tè èvuɛ̃ wɔ̀wɔ, to èmɔ ŋua nu, lè mìa dòmè.

13Ne mì sè, lè èdù kèwo Tɔhonɔ̀, mìabe Mawu sɔ na mì, be mìa nɔ̀ woa mèawo dòmètɔ ɖèka mè, wo gblɔ̃ 14be yàkàme ɖewo so mìa dòmè, kplɔ̀ woabe èdùmètɔwo ku ènyà kèa be: 'Mia yì sumɔ vòduwo', vòdu kèwo mì mu jèsi ò a, 15mì kù ènyàa mè kpɔ kito-kito. Ne e mè kɔ̀ be leke be ènu nyɔŋua jɔ̀ nyàwo, lè mìa dòmèa, 16mì la sɔ èwui ɖaɖa wù èdù kèa mètɔwo kpata: mì la crɔ̃ èdùa gbidi ku ènu kèwo keŋu lè e mèawo, eye mì la sɔ èwui wù èdùa mètɔwo be èlãhawo. 17Mì la bɔ̀ èdùa mè be àdɔ̀kùnuwo keŋu ɖo èdùa be ègòdope be dòdò mè. Eye mì la tɔzɔ̀ èdùa keŋu ku yebe àdɔ̀kùnuawo na Tɔhonɔ̀, mìabe Mawu. Èdùa la crɔ̃ gbidi, eye wo mu la gbà gbìgbɔ̀ tù ì gbèɖe ò. 18Mì mu la sɔ ènu kèwo wo la crɔ̃ gbidia dòmètɔ ɖekpe ò. Ne mì zɔ̃ ɖo ɖoɖo kèa jia, Tɔhonɔ̀ be àdɔ̀mèze hɛli-hɛlia nu la fa, eye be la gbà ɖè yebe xòmèfaa fiɔ mì, la na mì la jì ɖo e ji, eye mì la sùgbɔ, sìgbè lekè be fìã àjɔ̀gbè na mìa tɔgbewoa nène. 19Ɖoa, mì sè ètonu na Tɔhonɔ̀, mìabe Mawu a. Mì le yebe èse kèwo kpata mù sɔ na mìa ɖo àsi, eye mì le wɔ̀ ènu kè jɔ̀ a lè Tɔhonɔ̀, mìabe Mawu a be ŋùmè.

Currently Selected:

Èsea gbìgbɔ̀ hlɛ̃ 13: GEN

Highlight

Copy

Compare