Èsea gbìgbɔ̀ hlɛ̃ 1

Mosè be nupo pòpo cucugbãa

1Ènyà kèwo Mosè gblɔ̃ na Izràɛlviwo kpata, lè Yɔrdàn be ètɔ̀a godo, lè Àrabà be zògbè a ji, kpã ŋùkɔ̀ Suf be gbàgàa, lè Paràn, Tofɛl, Labàn, Haserɔt ku Di-Zahav be dùkɔ̃wo dòmèa ye nyi ekèa. 2Ŋùkèkè woeɖèka be àzɔ̃lì ye So Horɛb be ètoa gbɔ, sɔ yì Kadɛ̀s Barnea-nyigbã ji,#1.2 Hɛ̃h 13.26 tùtà Seir be ètoa gbɔ. 3Kè wo to so Ejiptè, èpè èkàgɔ̃a be wètri woeɖèkagɔ̃a be ŋùkèkè cucugbãa jia, Mosè pò nupo na Izràɛlviwo, sɔ zɔ̃ ɖo ègbè kè Tɔhonɔ̀ ɖè na ɛ̀a ji. 4Kè wo ɖù Sihɔ̀n, Àmorìtɔwo be èfìɔ kè nɔ̀nà Hɛsbɔ̀n be èdù mèa ji vɔ̀, eye wo gbà ɖù Ɔg,#1.4 Hɛ̃h 21.21-35; Yos 12.4 Basàn be èfìɔ kè nɔ̀nà Astarɔta, ji lè Edreì-nyigbã ji a,

5kè wo ɖo Mòab-nyigbã ji, lè Yɔrdàn-tɔ̀ a godo a, Mosè tɔ Èse a gɔ̃mè ɖèɖe na wo be:

Izràɛlviwo hɔ̃ jo

6Wàlɛbɛ kè mi nɔ̀ Horɛb be ètoa jia, Tɔhonɔ̀, miabe Mawu a gblɔ̃ na mi be: “Mì lè èto kèa ji fifìa, e dìdì. 7Mì trɔ jo, ne mìa yì Àmorìtɔwo be ètowo gbɔ, ku dùkɔ̃ kèwo keŋu trɔ do wo, lè Àrabà be ànyigbã gbàjàa ji, lè èto gɔ̃mè be ànyigbãwo kpata ji, lè Negeb, lè àvego ku lè àpùa to, lè Kanàn-nyigbãa ji, yì kɔ̀ ɖo Libàn, kaka yì ɖo Efratà be ètɔ̀ gãa nu#1.7 Yos 1.4. 8Kpɔɖa, mù sɔ ànyigbãa na mì: Mì yì, ne mìa sɔ ànyigbã kè Tɔhonɔ̀ fìã àjɔ̀gbè be yè la sɔ na mìa tɔgbewo: Abràham, Izàk ku Yakɔb kudo woabe tɔgbeyɔvi kèwo la jè woa yomè a wɔ̀ mìa tɔ̀.”

Mosè ɖo kòjoɖotɔwo

9Eye mù gblɔ̃ na mì hùe ŋua nu be: “Nyè ɖèka, nyè mu la teŋu dro àgbã#1.9 Tot 18.13-26 kè mì nyia ò. 10Tɔhonɔ̀, mìabe Mawu a na, mì jì do e ji, eye mì sùgbɔ sìgbè jiŋùkusi be wètriviwo nène. 11Tɔhonɔ̀, mìa tɔwo be Mawu ne na, mìa gbà jì ɖo e ji, zè èkà-wìvɔàtɔ̃ kpe, eye ne tusì na mì, ɖo àjɔ̀gbè kè be fìã na mìa nu! 12Leke nyè ɖèka, mù la wɔ̀, la teŋu dro mìabe àjrèwɔ̀wɔ̀wo, mìabe èfũ ɖè na àmèwo ku mìabe tùkaɖawo be àgbãwo ò? 13Mì ɖè ŋusù nyanu, ɖè àɖàŋù, jè àyèwo, so mìabe kɔ̀tawo mè va na mù, ne ma ɖo wo ɖo mìa nu.” 14Mìawo ŋutɔwo, mì ɖo e ŋuti na mù be: 'Ènu kè wò gblɔ̃ be mia wɔ̀a nyɔ!' 15Nène a ye mù sɔ mìabe kɔ̀ta-mègãwo, àmè kèwo ɖo àɖàŋù, eye wo jè àyèawo, sɔ ɖo ŋùkɔ̀nɔ̀tɔwo na mì. Wo nyi àmè èkàwì vɔ àtɔ̃wo be ŋùkɔ̀nɔ̀tɔwo, àmè èkà èvè takpowo be ŋùkɔ̀nɔ̀tɔwo, àmè èkà ci èwowo be ŋùkɔ̀nɔ̀tɔwo, àmè èwowo be ŋùkɔ̀nɔ̀tɔwo ku ènuŋlɔ̀tɔwo na mìabe kɔ̀tawo, ɖo mìa nu. 16E yomè a, mù do ègbè àsi na mìabe kòjoɖotɔwo be: 'Mì la ɖo èto mìa nɔ̀viwo be ènyàwo, eye mì la sɔ jɔ̀jɔɛwɔ̀wɔ, sò ènyà kè àmè sia àmè ɖo ku nɔ̀via, àlo ku àmèjro kè lè e gbɔa. 17Mì mu la kpɔ àmè ŋùku mè, la sɔ sò kòjo ò. Vɔ̀a bòhũa, mì nɔ le èto ɖo ɖèvi, àlo àmè kè mu ɖo ŋusɛ̃ ɖekpe ò, ku àmè gãwo keŋu be ènyà ŋuti, eye mì mu gbà vɔ̃ na àmè ɖekpe ò. Ɖoa, kòjoɖoɖoa, Mawu tɔ̀ ye be nyi. Ne ènyà ɖe sɛ̃ŋu na mì, wunua, mì sɔ ɛ̀ va ɖo ŋùmè na mù, ne ma sè è.' 18Ekèa ŋuti, mù wɔ̀ ɖoɖowo na mì, so ènu kèwo mì ɖo la wɔ̀a ŋuti.

Izràɛlviwo be ànùkua mà wɔ̀ lè Kanàn

19Kè mi hɔ̃ jo lè Horɛb be ètoa gbɔa, mi to zògbè gã, ɖo vɔ̃vɔ̃ kèa, kè mìawo ŋutɔwo mì nyaa ji, tùtà Àmorìtɔwo be ètowo gbɔ, sìgbè leke Tɔhonɔ̀, miabe Mawu a ɖo è na mia nène, eye mi va ɖo Kadɛs-Bàrneà#1.19 Hɛ̃h 13.1-14.45. 20Mù gblɔ̃ na mì be: 'Mì va ɖo Àmorìtɔwo be èto kè Tɔhonɔ̀, miabe Mawu sɔ le na mìa gbɔ. 21Kpɔɖa, Tɔhonɔ̀ àpo Mawu sɔ ànyigbã kè lè ŋùku wò mèa na wo. Yì, sɔ ɛ̀ wɔ̀ tɔ̀ wò, sìgbè lekè Tɔhonɔ̀, tɔgbe wòwo be Mawu a fìã yebe àjɔ̀gbè na wòa nène. Mù gbà vɔ̃ ò, eye àdìka mu gbà sò wò ò.' 22Ekèa yomè a, mìa kpata, mì va gbɔ nyè, eye mì gblɔ̃ na mù be: 'Mia dɔ̃ ŋusùwo, ne woa jè ŋùkɔ̀ na mi, ne woa yì sã ŋùku lè ànyigbãa ji, ne woa va pò nupo so èmɔ kè mi la to, ku èdù kèwo mè, mi la toa ŋuti na mi.' 23Mù kpɔ be ekèa nyɔ, eye mù ɖè ŋusù woèvè, lè mìa dòmè, àmè ɖèka so kɔ̀ta ɖe sia ɖe mè. 24Eye àmè kèawo jè èmɔ, yì ètoawo ji#1.24 Hɛ̃h 13.23. Kè wo ɖo Ɛskɔ̀l be bàlìwo mèa, wo sã ŋùku kpɔ funuawo. 25Wo gbã ànyigbãa ji be èkusɛ̃sɛ̃wo ɖo àsi gbɔ̀ va, wàlɛbɛ kè wo trɔ ɖìa, wo gblɔ̃ na mi be: 'Ànyigbã kè Tɔhonɔ̀, miabe Mawu sɔ na mia nyɔ.' 26Vɔ̀a, mìawo ya, mì gbe be yèwo mu la yì ànyigbã a ji ò; mì jè àgla ɖo Tɔhonɔ̀, mìabe Mawu be ɖoɖowo ŋuti. 27Mì lì lihũi, lè mìabe gòxɔwo mè be: 'Ɖe ye Tɔhonɔ̀ crì mi, ŋuti ye be kplɔ̀ mi to so Ejiptè-nyigbã ji ɖo! E jro la do mi àsi na Àmorìtɔwo, ne mia crɔ̃! 28Fikɛ ye mi la gbà yì ò? Mia nɔ̀viwo do vɔ̃vɔ̃ na mi be: 'Dùkɔ̃ gã, kè mètɔwo jɔ̀ àsu gbà sɛ̃ŋu wu mia ye wo nyi; woabe èdùwo nyi àgbògbò be èdù kèwo lòlò kaka tɔ jiŋùkusia. Mi kpɔ Anàkviwo ŋutɔ cã lè èdùawo mè.'#1.28 Hɛ̃h 13.22

29Mù gblɔ̃ na mì be: 'Mì mu gbà hũhũ ò; mì mu gbà vɔ̃ wo ò! 30Tɔhonɔ̀, mìabe Mawu kè le zɔ̃ lè ŋùkɔ̀ na mìa, la wɔ̀ àhùa ɖo mìa ta, sìgbè leke mìa ŋutɔwo, mì kpɔ, be wɔ̀ ɛ̀ na mì, lè Ejiptè, 31ku zògbè a ji, àfi kè mì kpɔ Tɔhonɔ̀, mìabe Mawu a kɔkɔ dùkɔ̃ kèa, sìgbè lekè èvi-tɔ la kɔkɔ èvia lè èmɔ kè mì zɔ̃, kaka va ɖo tèpe kèa nène.' 32Gãkea, mì mu dojì ɖo Tɔhonɔ̀, mìabe Mawu ŋuti ò. 33Tɔhonɔ̀ kè le zɔ̃ lè ŋùkɔ̀ na mì, lè èmɔa ji, jina àfi kè mì la do àsàɖa ɖoa na mì, nɔ̀nà èzò kè be sɔ kplɔ̀nà mìa mè, èzã mè, eye be nɔ̀nà lilikpo babla mè, dɔ̃ŋùkusu mè.

34Tɔhonɔ̀ sè ènyà kèwo mì gblɔ̃nàa. E do àdɔ̀mèze, eye be kã àtãŋu be: 35'Àmè kèawo dòmètɔ ɖekpe, jìjimè vuɛ̃ kèa mètɔ kui ɖèka mu la kpɔ ànyigbã nyuɛ̃, kè be àjɔ̀gbè mù fìã be mù la sɔ na mìa tɔwo, 36tovò na Kàlɛb, Yefunè be èvia ŋuti ò. E ye kpò ye la kpɔ ɛ̀, eye mù la sɔ ànyigbã kè ji be ɖo àfɔ̀a na ye ku yebe jìjimèviwo. Ɖoa, e kplɔ̀ Tɔhonɔ̀ do ku èjì blibo.' 37Tɔhonɔ̀ bijì do nyè ŋutɔ cã, ɖo mìa ŋuti, eye be gblɔ̃ be: 'Wò ŋutɔ cã, àfɔ̀ wò mu la ɖo ànyigbã kèa ji ò! 38Vɔ̀a, Yosùa kè nyi, Nun be èvi kè lè gbɔ wòa ya, la yì. Do è ŋusɛ̃, ɖoa, e ye la sɔ ànyigbãa wɔ̀ ècrɔ̃nu na Izràɛlviwo. 39Eye mìabe èvi kèwo mì le gblɔ̃ be wo la lea, mìabe èvi kèwo mu kpɔ le jèsi ènyuɛ̃ le èvuɛ̃ gbɔ òa, woawo ya, wo la yì. Woawo ye mù la sɔ ɛ̀ na. Woawo ye la ɖo àsi e ji. 40Vɔ̀a, mìawo ya, mì trɔ tùtà zògbè a, ne mìa jè plãŋùpòfɛ̃ be àpùa be èmɔa!'

41Eye mì ɖo e ŋuti na mù be: 'Mi wɔ̀ èvuɛ̃ do Tɔhonɔ̀! Mi la jè èmɔ, la yì wɔ̀ àhùa, ɖo lekè Tɔhonɔ̀, miabe Mawu ɖo è na mia nu. 'Ekèa yomè a, mìa dòmètɔ ɖe sia ɖe sɔ yebe àhùawɔ̀nuwo, eye mì susu be, yèwo la teŋu yì ètoa ji bɔ̀bɔɛ ɖe. 42Eye Tɔhonɔ̀ gblɔ̃ na mù be: 'Gblɔ̃ na wo be: Mì mu gbà yì ò! Mì mu gbà wɔ̀ àhùa ò, ɖoa, nyè mu lè mìa dòmè ò. Mì mu gbà, na, mìabe kɛ̃tɔwo ne ɖù mìa ji ò!' 43Mù gblɔ̃ ɛ̀ na mì, gãke, mì mu ɖo èto mù ò. Mì jè àgla ɖo Tɔhonɔ̀ be èsewo ŋuti, mì trì èto, eye mì lia ètoa. 44Ekèa na be Amɔrìtɔ kèwo ye nɔ̀nà ètoa jiawo to va dogò mì, eye, sìgbè leke ànyiwo kplɔ̀nà àmè do a nènea, wo nyà mì ɖonu, eye wo kã mì hlɛ̃, so Seir, kaka va kɔ̀ ɖo Hɔrmà#1.44 Hɛ̃h 14.45. 45E yomè, kè mì trɔ gbãnàa, mì fã àvi lè Tɔhonɔ̀ be ŋùkɔ̀, vɔ̀a Tɔhonɔ̀ mu ɖo èto mì ò; mu kè ènu do e mè na mì ŋutɔ cã ò. 46Ekèa na be mì ci Kadɛ̀s dìdiɖe.

Currently Selected:

Èsea gbìgbɔ̀ hlɛ̃ 1: GEN

Highlight

Copy

Compare