Èdɔwɔ̀wɔwo 19
19
Paolò yì Efesò
1Wàlɛbɛ kè Apolòs lè Kòrɛ̃tòa, Paolò to èdùa be èto nyigbãa ji, va ɖo Efesò. E kpɔ *nukplavi ɖewo lè funua. 2E biɔ wo be: “Ekè mì xɔ̀ Yesù ji sè a, mì xɔ̀ Gbɔ̃gbɔ̃ Kɔ̀kɔ̀ɛ a?” Wo ɖo e ŋuti na ɛ̀ be: “Mi mu sè kpɔ gbèɖe be, Gbɔ̃gbɔ̃ Kɔ̀kɔ̀ɛ ɖe lè ò.” 3Paolò biɔ wo be: “Eŋuã mawusi kɛ ye wo lè na mì ò?” Wo ɖo e ŋuti na ɛ̀ be: “Yòhanɛ̀s be mawusi ye wo lè na mi.” 4Paolò gblɔ̃ na wo be: “Yòhanɛ̀s lè mawusi na àmè kèwo lɔ̃, ɖɔ̀lì èdɛ̃awo, e gblɔ̃ na dùkɔ̃a be woa xɔ̀ àmè kè jè yè yomè a ji sè, àmè kèa ye nyi Yesù.” 5Ekè wo sè ekèa, wo na wo lè mawusi na wo, lè Tɔhonɔ̀ Yesù be nyikɔ mè. 6Ekè Paolò sɔ yebe àlɔ̀ ɖo woa jia, Gbɔ̃gbɔ̃ Kɔ̀kɔ̀ɛ a, va woa ji, eye wo do ègbè buwo, lè gblɔ̃ ènyà kè Mawu to na woa. 7Woa kpata, wo la sù àmè woèvè.
8Paolò yìnà bɔ̀bɔ̀pea, eye, wètri ètɔ̃ sɔ̃ŋua, e pònà nupo ku èjì ɖèɖe, so Mawu be èfìɔɖùɖua ŋuti, wɔ̀nà ènu sia ènu ne àmèawo woa sè e gɔ̃mè nyàwo. 9Gãkea, àmè ɖewo trìto lè woa dòmè. Wo dona èvlo èmɔ kè nu Tɔhonɔ̀ jro be woa nɔ̀ àgbè ɖoa, lè dùkɔ̃a be ŋùkɔ̀. Ekèa ŋutia, Paolò jo lè woa gbɔ, kplɔ̀ nukplaviawo, eye be jrònà ènyàa mè ku wo gbè sia gbè lè Tiranɔ̀ be bɔ̀bɔ̀pea#19.9 Tiranɔ̀ be ènukplape: tèpe kè ye Tiranɔ̀ fiɔna ènu ŋɔ̀ŋlɔ̃ lèa ye Paolò haya ne Mawu be èdɔa so gà ɖèka sɔ yì gà ènè gbè sia gbè.. 10E wɔ̀ ekèa, èpè èvè, àleke be àmè kèwo keŋu lè Azìa be àgowo jiawo, Yudàviwo ku Grikwo, sè Tɔhonɔ̀ be ènyàa.
Skevà be èvi-ŋusùwo
11Mawu wɔ̀nà ŋùdãdɔ tɔ̀xɛwo to Paolò ji, 12àleke be, ne wo sɔ dukùvi, àlo àvɔ kè tɔ Paolò ŋutia ɖo èdɔ̀nɔ̀ ɖe jia, yebe èdɔ̀a jènà e mè, eye, ne gbɔ̃gbɔ̃ vuɛ̃ lè àmè ɖe mèa, e tona lè àmèa mè. 13Yudàvi ɖewo lè, sãnà so èdù ɖe mè yìnà èdù bu mè, nyànà gbɔ̃gbɔ̃ vuɛ̃wo to lè àmèwo mè. Woawo cã, wo va tɔ Tɔhonɔ̀ Yesù be nyikɔ yɔyɔ ɖo àmè kèwo mè gbɔ̃gbɔ̃ vuɛ̃wo lèawo ji. Wo gblɔ̃nà na gbɔ̃gbɔ̃ vuɛ̃awo be: “Mù ɖè ègbè na mì, mì to lè Yesù kè be àŋɛ̀ Paolò le do a be nyikɔ mè!” 14Yudàviwo be * mawunɔ gã, Skevà be èvi-ŋusù adrɛ̃ cã lè wɔ̀ ènu kèa. 15Vɔ̀a, gbɔ̃gbɔ̃ vuɛ̃ a gblɔ̃ na wo be: “Mù nya àmè kè nyi Yesùa, eye mù jèsi Paolò cã, vɔ̀a mìawo yaa, àmè kɛ ye mì nyi ò?” 16Eye ŋusù kè be lãmè gbɔ̃gbɔ̃ vuɛ̃ a lèa, jè woa ji, eye, ekè yebe hɔ̃hlɔ̃ wu woa kpata, woa tɔ̀a, e pò wo kaka, do àbì woa ŋuti, ɖè wo ɖo àma, eye wo si to lè àxuea mè. 17Kè Yudàvi ku Grik kèwo keŋu lè Efesòawo sè ènu kè jɔ̀ a, vɔ̃vɔ̃ jè woa keŋu ji, eye wo kafu Tɔhonɔ̀ Yesù be nyikɔ. 18Wo àmè kèwo xɔ̀ Yesù ji sèawo dòmètɔ sùgbɔ va hũ woabe èvuɛ̃wo mè, eye wo gblɔ̃ ènu gbegble kèwo wo wɔ̀ va yìawo, lè àgũ tòpò. 19Ŋùdãnuwɔ̀tɔ sùgbɔ fɔ̀nà woabe xomawo va, eye wo tɔna wo èzò lè àmèwo keŋu be ŋùmè. Wo bù xoma kèawo be homè kpɔa, wo kpɔ be e la yì klòsalò-ga hotu èwì vɔ àtɔ̃. 20Nène a ye, to Tɔhonɔ̀ be ŋusɛ̃ mèa, Mawu be Ènyàa le sĩ lè àmèwo mè, eye be le ɖùji ku ŋusɛ̃.
Èzĩ tɔ̀ lè Efesò
21Lè ènu kèawo yomè a, Gbɔ̃gbɔ̃ a na Paolò ɖo è be, yèa to Màkedonìa ku Akayìa, yì Yèruzàlɛm. E gblɔ̃ be: “Ne mù yì funua, mù ɖo la va yì kpɔ Romà cã ɖa.” 22Eŋuã, e dɔ̃ àmè kèwo dona ɛ̀ àlɔ̀awo dòmètɔ èvè ɖoɖa Màkedonìa: Timòteo ku Erastò. Ye ŋutɔ ci Azìa funua vi ɖe. 23Gà ŋua mè lɔ̀ge ye èzĩ gã ɖe tɔ̀ lè Efesò, ɖo èmɔ kè ji Tɔhonɔ̀ jro be woa nɔ̀ àgbè lèa ŋuti.
24Ŋusù klòsalò-dɔwɔ̀tɔ ɖe, kè be nyikɔ nyi Demetrìoa, sɔna klòsalò tùnà vòdu kè wo yɔna be Artemìs-a be èxɔ̀viwo, sànà. Èdɔ kèa hɛ̃nà àlè sùgbɔ vana na yebe àɖàŋùdɔwɔ̀tɔwo. 25Ŋusù kèa va yɔ àmè kèwo wɔ̀nà èdɔ kudo èawo, kudo èdɔ kèa hati wɔ̀tɔ kèwo lè èdùa mèawo bɔ̀, eye be gblɔ̃ na wo be: “Mia tɔ̀wo, mì nya be èdɔ kèa ye hɛ̃nà ègà va na mi. 26Vɔ̀ mì le kpɔ, eye mì gbà le sè ènu kè ye Paolò kèa le dosìa: e dɔ̃ àmè sùgbɔ, le titɔ susu na wo, to yebe nupo pòpo mè. Mu nyi Efesò lè fikèa ɖèka kpò be le wɔ̀ ɛ̀ lè ò, vɔ̀a, lè Azìa bliboa vɔ̀ kloe, kpe do, ɖo e gblɔ̃nà na àmèwo be vòdu kèwo mi sɔ àlɔ̀ wɔ̀awo mu nyi ènu kèwo wo la sɛ̃ ò. 27Ne mi mu nya wɔ̀wɔ òa, mu nyi miabe èdɔa ɖèɖe kpò ye be la gble ò. Vɔ̀a, àmè ɖe mu la gbà sɔ bùbu na vòdu gã, Artemìs be èxɔ̀a cã ò, eye vòdu kèa ŋutɔ kè àmè kèwo lè Azìa bliboa ku àmè kèwo lè xixea keŋu mèawo sɛ̃nàa, mu la gbà ɖo nyiɖìɖi ɖe ke ò.” 28Ekè wo sè ènyà kèa, wo do àdɔ̀mèze, eye wo do àpa be: “Efesòtɔwo be Artemìs ye nyi gãa!” 29Eye èdùa kpata tɔ̀zĩ, dri ɖo èdùa be ètakpepea. Wo le Màkedonìatɔ, Gayò ku Aristarkò kèwo lè zɔ̃ èmɔ ku Paolòa, dɔ̃ wo yì funua. 30Paolò jro la yì àfi kè dùkɔ̃a bɔ̀ ɖoa, vɔ̀a, àmè kèwo xɔ̀ Yesù ji sèawo gbe na ɛ̀.
31Paolò be èxlɔ̃ ɖewo nyi Azìa be èfìɔ be ènujikpɔtɔwo; wo do àŋɛ̀ ɖoɖa ɛ̀ be mu gbà yì ò. 32Wàlɛbɛ ŋuaa, kè àmè ɖewo lè àpa ji, le gblɔ̃ ekèa, àmè buwo le gblɔ̃ èbu, eye àmè kèwo bɔ̀awo kpata flù lè ènyàa mè. Àmè gbogbotɔawo mu nya ènu kè ŋuti wo va bɔ̀ ɖo ò. 33Àmè ɖewo ɖè ènyàa mè na àmè ɖe kè tɔ̀ Àlɛ̀ksãdrò kè Yudàviwo ɖè ɖo ŋùkɔ̀a. Àlɛ̀ksãdrò mì àsi na wo be woa ɖo èto ne yèa ɖè yè ɖokoe nu. 34Vɔ̀a, ekè wo kpɔ be Yudàvi ye be nyia, woawo keŋu, wo tɔ àpa dodo ku ègbè ɖèka, kaka na sìgbè gàpòpo èvè sɔ̃ŋu nène, be: “Efesòtɔwo be Artemìs ye nyi gãa!”
35Èdùa be xomaŋlɔ̀tɔa va teŋu fa àmèha a, eye be gblɔ̃ be: “Nɔ̀vi nyè Efesòtɔwo, àmè kɛ ye lè mia dòmè, lè fikè, kè mu nya be Efesò be èdù kèa nyi vòdu gã Artemìs be èxɔ̀ ku yebe kpèli kè gɛ̃ so jiŋùkusia be nɔ̀pe ò? 36Àmè ɖe mu teŋu gbe ekèa ò. Ye ŋutia, mì gbɔ̃jì ɖɛ, ne mì mu gbà wɔ̀ ènu ɖekpe, èta mè mà bù ò. 37Àmè kèwo mì kplɔ̀ va fikèawo mu wɔ̀ àgɔ̀jènu ɖekpe do miabe vòdu ò, wo mu gblɔ̃ bùsu-nya ɖo e ŋuti ò. 38Ne Demetrìo ku yebe àɖàŋùdɔwɔ̀tɔ kèwo bɔ̀ ɖo e ŋutiawo ɖo ènyà ɖe ɖo àmè ɖe ŋutia, kòjoɖo-zãgbèwo lè. Kòjoɖotɔwo cã lè. Mì yì sãma àmèa lè kòjo mè, lè funua. 39Ne ènyà bu ɖe lè mìa sia, èdùa la bɔ̀ lè èdù takpepea, la gblɔ̃ ɛ̀. 40Ne mì mu nya wɔ̀wɔ òa, wo la be èdùa ye mì le gble, ɖo ènu kè jɔ̀ egbèa ŋuti. Ènu kè jɔ̀ fifìa mu ɖo gɔ̃mè sèse ɖe ò. Mì ma teŋu kpɔ ènyà-jɔ̀-nyà ɖe sɔ ɖè ènu kè ŋuti mì bɔ̀ fifìa gɔ̃mè ò.” 41Ekè e gblɔ̃ ènyà kèa, e na àmèha a kãkã.
Mina Bible © Bible Society of Togo, 2014.