Èdɔwɔ̀wɔwo 18
18
Kòrɛ̃tò be èhabɔ̀bɔa ɖoɖo ànyi
1Lè ènu kèawo yomè a, Paolò jo lè Atɛ̀n, eye be yì Kòrɛ̃tò. 2E kpɔ Yudàvi ŋusù ɖe kè wo yɔna be Akilàs-a lè funu. Ŋusùa so Pɔ̃tìo. Ŋusù kèa ku èsrɔ̃a Priskà so Italìa vaa, mu dìdì ò, ɖo èfìɔ Klodìo ɖè ègbè be àmè kèwo ye nyi Yudàviwo keŋu ne jo lè Romà. Paolò yì kpɔ wo, 3eye, ekè e nyi be wo ku Paolò, wo wɔ̀nà èdɔ ɖèka a, wo tùnà gòxɔ̀, Paolò nɔ̀ woabe àxomè, eye be wɔ̀nà èdɔ ku wo. 4Lè jɛ̃gbɔ̃zã ɖè sia ɖè gbèa, Paolò yì jrònà ènyà mè ku àmèwo lè bɔ̀bɔ̀pea, eye e tènàkpɔ be Yudàviwo ku Grikwo woa xɔ̀ yèbe ènyàa.
5Ekè Silà ku Timòteo so Màkedonìa vaa, Paolò sɔ ye ɖokoe na Mawu be àŋɛ̀a dodo koŋu, le ɖù ɖase na Yudàviwo be Yesù ye nyi Kristò. 6Ekè Yudàviwo mu jro la sè yebe ènyàa ò, eye wo le zũ ìa, e hũhũ yebe àwùwo, eye be gblɔ̃ na wo be: “Ènyè yaa, mù gblɔ̃ tɔ̀ nyè vɔ̀; kpɔ̀tɛa lè èkɔ̀ na mì. So gà kèa mèa, mù la yì àmè kèwo mu nyi Yudàvi òawo gbɔ.” 7Ekè Paolò jo lè funua, e yì ŋusù ɖe kè tɔ̀ Titò Yustus àlo Àmè Jɔ̀jɔ̀ɛ a gbɔ. Ŋusù kèa sumɔna Mawu, eye yebe àxomè lè bɔ̀bɔ̀pea gbɔ. 8Krispò, kè nyi bɔ̀bɔ̀pea be ègaa ku yebe àxuedoa keŋu xɔ̀ Tɔhonɔ̀ ji sè. Kòrɛ̃tòtɔ kèwo va sè Paolò be ènyàawo cã xɔ̀ Yesù ji sè, eye wo lè mawusi na wo.
9Paolò kpɔ àvìmènu èzã ɖe mè. E kpɔ Tɔhonɔ̀, eye Tɔhonɔ̀ gblɔ̃ na ɛ̀ be: “Mù gbà vɔ̃ ò; nɔ̀ do àŋɛ̀a; mù gbà ɖo ènu tè ò. 10Đo, mù lè ku wò; àmè ɖekpe mu la sitè ɖo ŋuti wò, la wɔ̀ ènu veve ɖe ku wò ò, ɖo àmè sùgbɔ lè èdù kèa mè nyi tɔ̀ nyè.” 11Paolò nɔ̀ Kòrɛ̃tò èpè ɖèka ku èfã, eye e fiɔna àmèwo, Mawu be ènyàa.
12Wàlɛbɛ kè Galìo nyi Romàtɔwo be èdùjikpɔtɔ lè Akayìa be àgowo jia, Yudàviwo ɖo ègbè du, sitè ɖo Paolò ŋuti. Wo le è, eye wo kplɔ̀ ɛ̀ yì kòjoɖopea. 13Wo gblɔ̃ be: “Ŋusù kèa le trɔ àmèwo be susu, ne woa sɛ̃ Mawu, to èmɔ kè sitè ɖo èsea ŋutia nu.” 14Wàlɛbɛ kè Paolò jro la pò nupo so ènyà kèa ŋutia, Galìo gblɔ̃ na Yudàviwo be: “Yudàviwo, ne ènu gbegble ɖe ye be dosì, àlo àgɔ̀ ɖe ye be jè fifìa, mù la gbɔ̃jì ɖɛ, la sè mìabe ènyàa. 15Vɔ̀a, kè e nyi be ènyà ye mì le dɔ̃ so ènu ɖewo ŋuti, nyikɔ ɖewo, ku mìa ŋutɔwo mìabe èsea ŋutia, mìa ŋutɔwo mì yì kpɔ ɛ̀ gblɔ̃. Mu nyi ènyè ye la ɖo kòjo na mì lè ènu kèawo mè ò.” 16Ekè be gblɔ̃ nènea, e nyà wo to lè kòjoɖopea. 17Woawo keŋu, wo le Sɔstɛn kè nyi bɔ̀bɔ̀pea be èga wàlɛbɛ ŋuaa, wo pò è lè kòjoɖopea be ŋùkɔ̀. Gãkea, Galìo mu sɔ èɖe lè e mè na wo ò.
Paolò va to Ãtiokìa
18Paolò nɔ̀ Kòrɛ̃tò àzã sùgbɔ. E yomè a, e sìa nɔ̀viwo lè Kristò mè, eye be ɖo ètɔ̀jihũ ku Priskà kudo Akilàs, jo yì Sirìa. Gbɔ̀xue be la jè èmɔa, e lũ èta lè Kɛ̃ŋukrèa, ɖo àtãŋu ɖe kè be kã na Mawu a ŋuti. 19Ekè wo va Efesòa, Paolò gble Priskà ku Akilàs ɖo funua. Ye ŋutɔ yì bɔ̀bɔ̀pea, yì jrò ènyà mè ku Yudàviwo. 20Yudàviwo ɖè kuku na ɛ̀ be ne nɔ̀ yèwo gbɔ vi ɖe kpe è, vɔ̀a, mu lɔ̃ ò. 21Wàlɛbɛ kè be la jo lè woa gbɔa, e gblɔ̃ na wo be: “Ne Mawu jro a, mù la trɔ va mìa gbɔ, gà bu mè.” Eye e ɖo ètɔ̀jihũ mè lè Efesò, jo. 22Ekè be jè àgo lè Kayizarèaa, e yì do ègbè na èhabɔ̀bɔa lè Yèruzàlɛm, eye be yì Ãtiokìa. 23E nɔ̀ funua vi ɖe, gbɔ̀xue jo. E to Galatìa ku Frigìa be àgowo ji, ɖèka ɖèka, lè do ŋusɛ̃ *nukplavi kèwo keŋu lè àgo ŋuawo jia.
Apolòs yì Efesò ku Kòrɛ̃tò
24Yudàvi ŋusù ɖe kè wo yɔna be Apolòs, eye wo jì ì lè Alɛksãdrìa, va Efesò. E nyi xomanyatɔ, eye be nya mawunya nyuɛ̃ ɖe. 25Wo fiɔ ɛ̀ èmɔ kè ji Tɔhonɔ̀ jro be woa nɔ̀ àgbè lèa, eye Gbɔ̃gbɔ̃ a be èzò lè e mè. E dona Yesù be àŋɛ̀nyuɛ̃ a, fiɔna ènu àmèwo, eye ènu kèwo keŋu be gblɔ̃nàawo sɔ̀nà gbè pɛpɛpɛ. Vɔ̀a Yòhanɛ̀s be mawusi lèle ŋuti kpò ye be mɔ̀nu jè. 26E pònà nupo ku èjì ɖèɖe lè bɔ̀bɔ̀pea. Ekè Priskà ku Akilàs sè ènyà kèwo be le gblɔ̃a, wo dɔ̃ ɛ̀ ɖo ŋuti, eye wo ɖè Mawu be èmɔa mè na ɛ̀ tututu. 27Ekè Apolòs jro la yì Akayìa à, nɔ̀viwo lè Kristò mè do è ŋusɛ̃, eye wo ŋlɔ̀ xoma ɖoɖa *nukplavi kèwo lè funuawo, ne woa xɔ̀ ɛ̀ nyuɛ̃ ɖe. Ekè e ɖo funua, e kpe ɖo xɔ̀sètɔ sùgbɔ ŋuti, to Mawu be màje mè. 28Đo e pònà nupo ku ŋusɛ̃, sɔ ɖènà ɛ̀ fiɔ Yudàviwo, lè àgũ tòpò be wo le trã èmɔ. E ɖènà ɛ̀ fiɔ wo lè mawunya xoma a mè be Yesù ye nyi Kristò.
Mina Bible © Bible Society of Togo, 2014.