Èdɔwɔ̀wɔwo 16
16
Timòteo kpe ɖo Paolò ku Silà ŋuti
1Paolò zɔ̃ èmɔ va ɖo Dɛrbè ku Listrà. *Nukplavi ɖe kè wo yɔna be Timòteoa lè funua. Ènɔa nyi Yudàvi nyɔ̃nù ɖe kè xɔ̀ Yesù ji sè a, eye ètɔa nyi Grikwo. 2Nɔ̀vi lè Kristò mè kèwo lè Listrà ku Ikonìaawo ɖù ɖase nyuɛ̃ so Timòteo ŋuti, 3eye Paolò jro be yèa kplɔ̀ ɛ̀ ɖo ŋuti. E sò èvo na ɛ̀ ɖo Yudàvi kèwo lè àgo ŋuawo jiawo ŋuti, ɖo woawo keŋu nya be ètɔa, Grikwo bè nyi. 4Paolò ku Silà gblɔ̃nà ɖoɖo kèwo ji *àmèdɔ̃dɔ̃awo ku èhamèmègãwo ɖo èkpe lè Yèruzàlɛm a na àmèwo, lè èdù kèwo mè wo le toawo, eye wo biɔna so woa si be woa wɔ̀ ɖo ɖoɖo kèawo ji. 5Nène a, èhamètɔwo be xɔ̀sèa gbà likè kpe è, eye wo le sùgbɔ ɖo e ji gbè sia gbè.
Paolò kpɔ àvìmènu
6Gbɔ̃gbɔ̃ Kɔ̀kɔ̀ɛ a mu ɖè èmɔ na Paolò ku Silà be woa do Mawu be àŋɛ̀a lè Azìa ò. Ekèa ŋutia, wo zɔ̃ èmɔ to Frigìa ku Galatìa be àgowo ji, 7va ɖo Misìa be lipòwo ji. Wo tèkpɔ be yèwoa yì Bitinìa, vɔ̀a, Yesù be Gbɔ̃gbɔ̃ a mu ɖè èmɔ na wo ò, 8eye wo to Misìa, va yì Troa. 9Lè èzã mèa, Paolò kpɔ àvìmènu. Màkedonìa ŋusù ɖe ze ɖo e ji. Ŋusùa nɔ̀tè, le ɖè kuku na ɛ̀ be: “Tɔ̀ wò jɔ̀, va Màkedonìa, ne wòa va do mi àlɔ̀.” 10Ekè Paolò kpɔ àvìmènu kèa vɔ̀a, mi jro la jè èmɔ zè ɖèka, la yì Màkedonìa, ɖo e ze na mi be Mawu ye yɔ mi ne mia yì do Àŋɛ̀nyuɛ̃ a na èdù ŋua mè tɔwo.
Liɖìa trɔ èjì mè lè Fìlipì
11Mi ɖo ètɔ̀jihũ lè Troa, zɔ̃ tɛ̃ɛ, yì Samɔtrakè, eye ekè èŋù kèa, mi yì Neapolìs. 12Mi jo lè funua yì Fìlipì kè nyi èdù gã lè Màkedonìa be àgoa ji, eye be nyi Romàtɔwo be èdùa. Mi nɔ̀ èdù kèa mè ŋùkèkè ɖewo. 13Jɛ̃gbɔ̃zã gbèa, mi to lè èdùa mè yì ètɔ̀ to, àfi kè mi susu be mi la kpɔ kuefãpe lèa. Mi nɔ̀ ànyi, eye mi pò nupo na nyɔ̃nù kèwo va bɔ̀awo. 14Nyɔ̃nù kèawo dòmètɔ ɖèka lè nyi Liɖìa, so Tiatirà eye e sànà àvɔ biɖibiɖi xɔ̀asìwo. E sina Mawu, eye Tɔhonɔ̀ hũ yebe susu be ne le èto ɖo ènyà kèwo Paolò lè gblɔ̃a ŋuti. 15Ekè wo lè mawusi na ye ku yebe àxuedoa vɔ̀a, e ɖè kuku na mi veve ɖe be: “Ne mì kpɔ be mù xɔ̀ Tɔhonɔ̀ ji sè nyàwo a, mì va zɛ̃ àxue nyèa mè.” E zĩ mia ji eye mi lɔ̃ yì nɔ̀ yebe àxuea mè.
Wo le Paolò ku Silà do-gà lè Fìlipì
16Mi va le yì kuefãpe gbè ɖèka, eye mi dogò kluvi nyɔ̃nù ɖe kè be lãmè gbɔ̃gbɔ̃ vuɛ̃ ɖe lè, eye kluvia yɔna xɔ̀ na àmèwo. Ekèa hɛ̃nà ègà sùgbɔ vana na àpetɔawo. 17Nyɔ̃nùvi kèa, kpàsà mi ku Paolò do, lè gblɔ̃ ku àpa be: “Àmè kèawo ye nyi Mawu kè lè èji hũia be sumɔ̃viwo. Wo le do hlùɛ̃gã be èmɔa be àŋɛ̀ na mì.” 18Nène a, e nɔ̀ mia yomè, àzã fuu, eye Àdɔ̀mè va ve Paolò gbè ɖèka, eye be trɔ gblɔ̃ na gbɔ̃gbɔ̃ kè lè nyɔ̃nùvia mèa be: “Lè Yesù Kristò be nyikɔ mèa, mù ɖè ègbè na wò, to lè nyɔ̃nùvi kèa mè!” Eye gbɔ̃gbɔ̃a to lè nyɔ̃nùvia mè, wàlɛbɛ ŋua tututu. 19Ekè nyɔ̃nùvia be àpetɔwo kpɔ be mu gbà teŋu hɛ̃ ègà ɖe va na yèwo òa, wo le Paolò ku Silà, eye wo kplɔ̀ wo yì kòjo mè lè èdùmègãwo gbɔ. 20Wo sɔ ènyà ɖo woa ŋuti lè Romàtɔwo be kòjoɖotɔawo gbɔ be: “Àmè kèawo le hɛ̃ hũnyàhũnyà va miabe èdùa mè. Yudàviwo ye wo nyi, 21eye wo le fiɔ èkɔ̀do kèwo miabe *èse gbea. Mia Romàtɔwo, mi mu teŋu xɔ̀ wo ò. Mi mu la teŋu wɔ̀ ɖo woa ji ò.”
22Àmèha bliboa dri ɖo Paolò ku Silà ji, eye kòjoɖotɔwo na be wo zɛ̃ àwù lè wo àmè èvèawo ŋuti, eye wo pò wo ku àtãŋù. 23Ekè wo pò wo nyuɛ̃ ɖe vɔ̀a, wo kplɔ̀ wo yì do ègà, eye wo gblɔ̃ na ègàkpajikpɔtɔa be, ne le ŋùkuvi ɖo woa ŋuti nyuɛ̃ ɖe. 24Ekè e sè nènea, e kplɔ̀ wo yì tu ɖo èxɔ̀ ɖe mè lè ègàkpaa be gòglòpe, jã woabe àfɔ̀wo ɖo àtikpo be àmèviga mè, eye e tu èhɔ̃ do wo. 25Lè èzã dòmè lɔ̀gea, Paolò ku Silà le fãkue, le jìhà, le mlã Mawu, eye ègàmènɔ̀tɔwo le ɖo èto wo. 26Zè ɖèkaa, ànyigbã hũhũ sɛ̃sɛ̃ ɖe, àleke be ègàxɔa be dodoewo hũhũ. Zè ɖèkaa, hɔ̃truawo kpata hũ gbàa, eye kɔ̀sɔ̀kɔsɔ kèwo wo do gàmènɔ̀tɔawo keŋuãwo ŋɛ̃ lè woa ŋuti kɔ̀ ɖɛ. 27Ègàkpajikpɔtɔa dà àvò fɔ̃ so àlɔ̃ mè. Ekè be kpɔ be hɔ̃truawo kpata lè nùvòa, e susu be ègàmènɔ̀tɔawo si jo ye, eye e lìɔ èwui to lè àku mè, la wù ye ɖokoe. 28Vɔ̀a, Paolò do àpa sɛ̃sɛ̃ ɖe be: “Mù gbà wɔ̀ ènu veve ku ɖokoe wò ò! Mia keŋu mi lè fikèa” 29Ègàkpajikpɔtɔa biɔ be woa sɔ kãligbɛ̃ va na yè, eye e ɖèbla, ɖo èxɔ̀a mè. Vɔ̃vɔ̃ ɖo è, bè le hũhũ tìtìtì, va jè Paolò ku Silà be àfɔ̀wo nu. 30Ègàkpajikpɔtɔa kplɔ̀ wo to, biɔ wo be: “Àmègãwo, nukɛ ye jè be ma wɔ̀ ne woa hlùɛ̃ mù gã ò?” 31Wo ɖo e ŋuti na ɛ̀ be: “Xɔ̀ Tɔhonɔ̀ Yesù ji sè, eye wo la hlùɛ̃ wò ku àpo àxuedoa gã.” 32Wo gblɔ̃ Tɔhonɔ̀ be ènyàa na ye ku àmè kèwo keŋu lè yebe àxomèawo. 33Nène a, lè èzãa be gàpòpo ŋua ke mèa, ègàkpajikpɔtɔa kplɔ̀ wo, yì klɔ woabe àbìawo na wo, eye wo lè mawusi na ye ku yebe àxomètɔwo keŋu, zè ɖèka. 34E kplɔ̀ Paolò ku Silà va yebe àxomè, eye e na wo ènu, wo ɖù. Èjì jɔ̀ ye ku yebe àxomètɔwo ŋutɔ, be yèwo xɔ̀ Mawu ji sè.
35Ekè èŋù kèa, kòjoɖotɔawo dɔ̃ èkpòvitɔwo ɖoɖa, ɖè ègbè na wo be: “Mì ɖè àsi lè àmè ŋuawo ŋuti, ne woa jo.” 36Nène a, ègàkpajikpɔtɔa gblɔ̃ na Paolò be: “Kòjoɖotɔawo gblɔ̃ ɖoɖa be woa ɖè àsi lè mìa ŋuti, ne mìa yì. Mì to va yì fifìa, lè fàfa mè.” 37Vɔ̀a, Paolò gblɔ̃ na èkpòvitɔawo be: “Wo mu ɖo kòjo na mi ò, vɔ̀a, wo pò mi lè àgũ dòmè, eye wo do mi ègà, sĩ vɔ̀a, Romà be èdùmèviwo mi nyi. Nukɛ ŋuti ye fifìa, wo jro be yèwoa ɖè àsi lè mia ŋuti, lè wawla mè ɖo ò? Gbèɖe, woawo ŋutɔwo kpò ye la va ɖè mi to!” 38Èkpòvitɔawo yì gblɔ̃ ènyàa na kòjoɖotɔawo, vɔ̀a, ekè wo sè be Romà be èdùmèviwo ye Paolò ku Silà nyia, vɔ̃vɔ̃ ɖo wo. 39Nène a, wo yì ɖè kuku na wo. Wo kplɔ̀ wo to, eye wo biɔ so woa si be woa jo lè èdùa mè. 40Ekè Paolò ku Silà to lè ègàkpaa mèa, wo va yì Liɖìa be àxomè, wo kpɔ nɔ̀viwo lè Kristò mè lè funua, wo do jìpò na wo eye wo jo.
Mina Bible © Bible Society of Togo, 2014.