Èdɔwɔ̀wɔwo 15
15
Àmèdɔ̃dɔ̃awo kpe èta lè Yèruzàlɛm
1Àmè ɖewo so Yudeà va Ãtiokìa, va le fiɔ ènu nɔ̀viwo lè Kristò mè be: “Ne wo mu sòvo na mì, zɔ̃ ɖo Mosè be èkɔ̀doa ji òa, Mawu mu la hlùɛ̃ mì gã ò.” 2Paolò ku Barnabas gbe woabe ènyà, eye wo hɛ̃ ènyà so e ŋuti ŋutɔ. Nɔ̀viwo lè Kristò mè va pò è ɖo ɖèka be, Paolò ku Barnabas kudo nɔ̀vi ɖewo lè Kristò mè so Ãtiokìa, woa yì Yèruzàlɛm ne woa kpɔ *àmèdɔ̃dɔ̃awo ku èhamèmègãwo ɖo ènyàa ŋuti. 3Ekè èhamètɔwo dɔ̃ wo ɖoɖa nènea, wo to Foenikè ku Sàmarìa, lè gblɔ̃ àlekè àmè kèwo mu nyi Yudàvi òawo trɔ èjì mè ɖoa na xɔ̀sètɔ kèwo lè funuawo. Ènyà kèa do jìjɔɛ na woa keŋu ŋutɔ. 4Ekè wo va Yèruzàlɛm-a, xɔ̀sètɔwo ku *àmèdɔ̃dɔ̃ kèwo lè funuawo kudo èhamèmègãwo xɔ̀ wo nyuɛ̃ ɖe, eye wo gblɔ̃ ènu kèwo keŋu Mawu wɔ̀ to woa jia na wo. 5Vɔ̀a Farizìwo be èhamètɔ kèwo xɔ̀ Yesù ji sèawo, sitè gblɔ̃ be: “E jè be woa sòvo na àmè kèwo mu nyi Yudàviwo ò, vɔ̀ xɔ̀ Yesù ji sèawo, woa to na wo be wo ɖo la wɔ̀ ɖo Mosè be èsea ji kòkòkò.” 6Àmèdɔ̃dɔ̃awo ku èhamèmègãwo cã bɔ̀, ne woa do èta gũ ɖo ènyà kèa ŋuti. 7Ekè wo dɔ̃ ènyà so e ŋuti kakaa, Petrò sitè, gblɔ̃ be: “Nɔ̀viwo, mì nya be so gɔ̃mè jèje a, Mawu cã mù lè mìa dòmè, be àmè kèwo mu nyi Yudàvi òawo ne sè Àŋɛ̀nyuɛ̃ a lè ènu nyè, ne woa xɔ̀sè. 8Mawu, kè nya ènu kè lè àmè be èjì mèa, na wo Gbɔ̃gbɔ̃ Kɔ̀kɔ̀ɛ sìgbè lekè be na mia nène, sɔ ɖè è fiɔ be yè xɔ̀ wo. 9Mawu mu do vòvòtoto mi, àmè kèwo nyi Yudàviwo, ku woawo dòmè ò. E lè woabe èjìwo ɖì, ɖo wo xɔ̀ e ji sè. 10Fifìa, nukɛ ŋuti mi le sɔ àgbã kè ji mia ku mia tɔgbewo mi mu teŋu kpe òa, le dro ɖo èta na nukplaviwo, sɔ le do Mawu kpɔ ɖo ò? 11Vɔ̀a, mi xɔ̀sè be, sìgbè lekè Mawu la hlùɛ̃ mi gãa nènea, e la hlùɛ̃ woawo cã gã, to Tɔhonɔ̀ Yesù be màjea mè.”
12Àmèawo keŋu bɔ̀ ènu, eye wo ɖo èto Barnabas ku Paolò. Wo ɖè jèsì ku ŋùdãdɔ kèwo Mawu wɔ̀ to woa ji, lè àmè kèwo mu nyi Yudàvi òawo dòmèawo fiɔ. 13Ekè Paolò ku Barnabas gblɔ̃ ènyàa vɔ̀a, Yakobò xɔ̀ ènyàa gblɔ̃ be: “Nɔ̀viwo, mì ɖo èto mù! 14Simɔ̀n ɖè àlekè Mawu jè ŋùkɔ̀ ɖè è fiɔ be yè sɔ *èɖe lè àmè kèwo mu nyi Yudàvi òawo cã be ènyà mèa fiɔ. Eye be cã àmèwo so woa dòmè, ne woa nyi yèbe dùkɔ̃. 15Ènu kèa sɔ̀gbè, ɖo ènu kè gblɔ̃ɖɛtɔwo ŋlɔ̀ ɖɛa ji be:
16'Ekèa yomè a,
mù la trɔ va,
la gbìgbɔ̀ tù David be gòxɔ kè mùa;
la gbà ɖo yebe èglìkpowo,
eye mù la wɔ̀ ɛ̀, be la nɔ̀tè,
17eye àmè kèwo kpɔ̀tɔ̀awo, la ji Tɔhonɔ̀,
kpe ɖo àmè kèwo mu nyi Yudàvi òawo keŋu ŋuti, ɛ̃ɛ, àmè kèwo ŋuti wo yɔ nyikɔ nyè ɖoawo.
Nène a ye Tɔhonɔ̀ gblɔ̃.
18Nène a ye be wɔ̀ ènu kèawo, zɔ̃ ɖo yebe blèmà mè be ɖoɖowo ji.'
19Yakobò yì e ji be: ènu kè ŋuti mù kpɔ be mu nyɔ be mia do nupo na àmè kèwo mu nyi Yudàviwo ò, vɔ̀ wo le trɔ va Mawu gbɔa yeŋu. 20Mia ŋlɔ̀ ɖoɖa wo kpò be: wo mu gbà ɖù èlã kèwo, wo sɔ savɔ na vòduwo ò; wo mu gbà wɔ̀ gbòlò ò; wo mu gbà ɖù èlã kè mè èhũ cia ò; wo mu gbà ɖù, èhũ ò. 21Đo a, so xoxo hùenua, àmèwo dona Mosè be èsea be àŋɛ̀ lè èdù sia èdù mè, eye wo hlɛ̃nà ɛ̀ lè bɔ̀bɔ̀pewo, lè jɛ̃gbɔ̃zã sia jɛ̃gbɔ̃zã gbè.”
Bɔ̀bɔ̀gãa be xoma a
22Eŋuã, ènyàa jè ŋùmè na àmèdɔ̃dɔ̃awo, èhamèmègãwo ku èhabɔ̀bɔa kpata, eye wo ɖo èkpe e ji be yèwoa ɖè àmè ɖewo lè yèwo dòmè, ne woa dɔ̃ wo, bɔ̀ ɖo Paolò ku Barnabas ŋuti, ɖoɖa Ãtiokìa. Àmè kèawo ye nyi Yudà kè wo yɔna be Barsabas ku Silà#15.22 Àmè ɖìnyiwo: àmè kɔsù, àmè gã, àmè to ŋùkumè. . Wo nyi àmè ɖìnyiwo lè nɔ̀vi Kristòtɔ̀wo dòmè. 23Wo ŋlɔ̀ xoma do àsi na wo, lè gblɔ̃ lè xoma a mè be:
“Mia nɔ̀vi àmèdɔ̃dɔ̃wo ku èhamèmègãwo do ègbè ɖoɖa mì, nɔ̀vi àmè kèwo mu nyi Yudàviwo ò, vɔ̀ nyi mia nɔ̀viwo lè Kristò mè, lè Ãtiokìa, Sirìa ku Kilikìa be àgowo ji. 24Mi sè be, àmè ɖewo so mia gbɔ lè fikè, va do nupo na mì ku ènyà kèwo wo gblɔ̃ na mìawo, sɔ titɔ mì. Mu nyi miawo ye dɔ̃ wo ɖoɖa ò. 25Eŋuã ŋuti ye mia keŋu, mi ɖo èkpe e ji, ɖè àmèwo lè mia dòmè, dɔ̃ wo ɖoɖa mì, bɔ̀ ɖo mia nɔ̀vi ɖèvewo, Barnabas ku Paolò ŋuti, 26àmè kèwo sɔ woabe àgbè na, ɖo mia Tɔhonɔ̀ Yesù Kristò be èdɔa ta. 27Mi dɔ̃ Yudà ku Silà ɖoɖa, ne woawo ŋutɔ woa va gblɔ̃ ɖoɖo kèwo mi ŋlɔ̀ ɖoɖa mìa, ku woawo ŋutɔ be ènuwo. 28Mia ku Gbɔ̃gbɔ̃ Kɔ̀kɔ̀ɛ a, mi kpɔ be mi mu gbà la sɔ àgbã kpɛ̃kpɛ̃ bu ɖo mìa ji, wu *èse veve kèwo gbãnà a ò. 29Woawo ye nyi be: Mì mu la ɖù ènu kè wo sɔ savɔ na vòduwo ò. Mì mu la ɖù èhũ ò. Mì mu la ɖù èlã kè mè èhũ cia ò. Mì mu la wɔ̀ gbòlò ò. Ne mì le *èse kèawo ɖo àsia, e la nyɔ na mì. Mì dagbè.”
30Àmèdɔ̃dɔ̃awo jè èmɔ ɖota Ãtiokìa. Ekè wo ɖo funua, wo bɔ̀ èhamètɔawo keŋu, eye wo sɔ xoma a na wo. 31Ekè wo hlɛ̃ xoma a, èjì jɔ̀ wo, ɖo, ènyà kèwo lè xoma a mèawo do ŋusɛ̃ wo. 32Yudà ku Silà cã a, Mawu be gblɔ̃ɖɛtɔwo ye wo nyi. Wo pò nupo na nɔ̀viwo lè Kristò mè ku ènyà sùgbɔ, sɔ do wo ŋusɛ̃. 33Wo nɔ̀ funua, àzã ɖewo, eye èhamètɔwo gbà trɔ, ɖo wo ɖoɖa àmè kèwo ye dɔ̃ wo ɖoɖaawo gbɔ, eye wo gblɔ̃ na wo be woa sɔdè, èmɔ ji ne kɔ̀ na wo, [ 34Vɔ̀a Silà ɖo e be yè la ci funua#15.34 Hɛ̃hlɛ̃ kèa mu lè mawunya xoma xoxo ɖewo mè ò. .] 35Paolò ku Barnabas ci Ãtiokìa, eye wo ku àmè sùgbɔ buwo fiɔna ènu àmèwo, sɔ lè do Tɔhonɔ̀ be Àŋɛ̀nyuɛ̃ a.
Paolò ku Silà be èmɔ zɔ̃zɔ̃
36Lè àzã ɖewo yomè a, Paolò gblɔ̃ na Barnabas be: “Na mia yì kpɔ mia nɔ̀viwo lè èdù kèwo mè mi do Tɔhonɔ̀ be àŋɛ̀ lèawo keŋu mè, ne mia kpɔ lekè wo lèa ɖa.” 37Barnabas jro be yèwoa kplɔ̀ Yòhanɛ̀s kè wo yɔna be Markòa ɖo àsi. 38Vɔ̀a, Paolò mu lɔ̃ ɖo e ji ò, ɖoa, Markò trɔ lè woa yomè sãa, lè Pãfilìa, eye mu wɔ̀ èdɔa yì e ji ku wo ò. 39Paolò ku Barnabas dɔ̃ ènyà kèa kaka wo ma lè woa nɔ̀nɔwo ŋuti. Barnabas kplɔ̀ Markò ɖo ŋuti, eye wo ɖo ètɔ̀jihũ yì Kiprò. 40Paolò kplɔ̀ Silà ɖo ŋuti, eye, kè èhamètɔwo sɔ wo do àsi na Tɔhonɔ̀ be màjea vɔ̀a, wo so jè èmɔ. 41Paolò to Sirìa ku Kilikìa, lè do ŋusɛ̃ èhabɔ̀bɔawo.
Mina Bible © Bible Society of Togo, 2014.