Èdɔwɔ̀wɔwo 11
11
Petrò pò nupo lè Yèruzàlɛm be èhabɔ̀bɔa be ŋùkɔ̀
1 *Àmèdɔ̃dɔ̃awo ku nɔ̀vi kèwo lè Yudeà wo sè be àmè kèwo mu nyi Yudàvi òawo cã xɔ̀ Mawu be ènyàa ji sè. 2Ekèa ŋuti ye wàlɛbɛ kè Petrò trɔ yì Yèruzàlɛm-a, nɔ̀vi kèwo ye sò èvoawo, dohùɛ do è. 3Wo biɔ ɛ̀ be: “Nukɛ ŋuti ye wò yì àmè kèwo mu sò èvo òawo gbɔ, yì ɖù ènu ku wo ɖo ò?” 4Petrò xɔ̀ ènyàa, ɖè lekè ènuwo yì ɖoa mè na wo, lè woabe dɛnu. 5E gblɔ̃ na wo be: “Jope ye mù lè, le fãkue, wàlɛbɛ kè mù kpɔ àvìmènu ɖe a. Ènu ɖe lè sìgbè àvɔ gbàjà gã ɖe nène, ɖì so jiŋùkusi va kaka gbɔ nyè, eye yebe to ènèawo lè sãsã. 6Eye ekè mù le ŋùkuvi ɖo e ŋuti nyuɛ̃ ɖe a, mù kpɔ èlã kèwo zɔ̃nà àfɔ̀ ènè ji, ègbemèlãwo, èlã kèwo tana lè pòdo jiawo ku ekèwo zrònà lè àyamèawo vòvòvòwo lè e mè. 7Mù sè ègbè ɖe kè gblɔ̃ na mù be: 'Petrò, sitè, wù ne wòa ɖù!' 8Mù ɖo e ŋuti be: 'Kpao, Tɔhonɔ̀! Đo ènu màkɔ̀ màkɔ ku ènu kè dona èdɔ̀ àmèa, èɖe mu ɖo ènu mè na mù kpɔ ò.' 9Ègbèa, gbà gblɔ̃ na mù, zè èvègɔ̃a so jiŋùkusi be: 'Ènu kè ŋuti Mawu kɔ̀a, wò ya, mù gbà gblɔ̃ be e nyi ènu màkɔ̀ màkɔ ò.' 10Zè ètɔ̃ ye ènu kèa jɔ̀. Eŋuã yomè a, àvɔ gbàjà gãa ku ènu kèwo keŋu lè e mèawo gbà trɔ yì jiŋùkusi. 11Gà ŋua mè tututua, àmè ètɔ̃ ɖewo va àxue kè mè mi lèa mè. Kayizarèa ye wo dɔ̃ wo so ɖoɖa mù. 12Gbɔ̃gbɔ̃ a gblɔ̃ be ma kplɔ̀ wo do, nyè mu gbà vɔ̃ ò. Nɔ̀vi àdɛ̃ kèwo mì le kpɔ lè fikèa, kplɔ̀ mù yì Kayizarèa, eye mia kpata mi ɖo Kɔrnelìo be àxomè. 13Eye ŋusùa ɖè lekè be kpɔ Mawu be àtikplɔtɔ ɖe va yebe àxomè ɖoa mè na mù. *Àtikplɔtɔa gblɔ̃ na ɛ̀ be: 'Dɔ̃ àmè ɖoɖa èdù kè wo yɔna be Jopea mè, ne woa yì yɔ Simɔ̀n, kè wo gbà yɔna be Petròa va. 14E la gblɔ̃ ènyà kè la na wò ku àxuedo wòa keŋu, mì la gãa, na wò.' 15Ènyàa kpò ye mù le gblɔ̃ wàlɛbɛ kè Gbɔ̃gbɔ̃ Kɔ̀kɔ̀ɛ a ɖì va woa ji, sìgbè àlekè be ɖì va mia ji, lè gɔ̃mèjèje a nène. 16Eye mù ɖoŋù ènyà kè Tɔhonɔ̀ gblɔ̃a be: 'Yòhanɛ̀s sɔ èsì lè mawusi na àmèwo; vɔ̀ mìawo yaa, Gbɔ̃gbɔ̃ Kɔ̀kɔ̀ɛ ye Mawu la sɔ lè è na mì.' 17Ne Mawu sɔ ènu nana kè tututu be sɔ na mi, wàlɛbɛ kè mi xɔ̀ Tɔhonɔ̀ Yesù ji sè a, na àmè kèawo cã a, àmè kɛ ye mù nyi, ne ma sitè ɖo Mawu ŋuti ò?” 18Ekè wo sè ènyà kèa, woabe èjì jè e mè eye wo kafu Mawu be: “Mawu na, àmè kèwo mu nyi Yudàvi òawo cã trɔ èjì mè, ne woa teŋu nɔ̀ àgbè!”
Ãtiokìa be èhabɔ̀bɔa be dodoe
19Àyà do na àmè kè jɔ̀ wàlɛbɛ kè wo wù Stefanɔ̀a, na be xɔ̀sètɔwo kãhlɛ̃. Àmè ɖewo lè woa dòmè, hũ yì ci kaka Foenikè. Àmè ɖewo cã yì èdù kè lè ètɔ̀dòmèkɔ̃ɛ̃ kè wo yɔna be Kipròa jia mè. Àmè buwo yì èdù kè wo yɔna be Ãtiokìaa mè, eye Yudàviwo ɖèɖe kpò ye wo dona Mawu be àŋɛ̀a na. 20Gãkea, Kipròtɔ ku Kirenètɔ ɖewo lè woa dòmè, wàlɛbɛ kè wo yì Ãtiokìaa, wo tɔ Tɔhonɔ̀ Yesù be àŋɛ̀a dodo na Grikwo cã. 21Tɔhonɔ̀ kpe ɖo woa ŋuti, be àmè sùgbɔ fuu xɔ̀sè, trɔ va Tɔhonɔ̀ gbɔ. 22Kè Yèruzàlɛm be èhabɔ̀bɔa, sè ènyà kèa, wo dɔ̃ Barnabas ɖoɖa Ãtiokìa. 23Ekè be va kpɔ Mawu be màjea be èdɔwɔ̀wɔa, e jɔ̀jì na ɛ̀, e do ŋusɛ̃ woa keŋu be woa nɔ̀ Tɔhonɔ̀ yomè goŋu-goŋu, eye woa wɔ̀ ànùkua na ɛ̀. 24Barnabas nyi àmè jɔ̀jɔɛ ɖe kè Gbɔ̃gbɔ̃ Kɔ̀kɔ̀ɛ a ɖɔ fuu, eye yebe xɔ̀sè likè. To e jia, àmè sùgbɔ xɔ̀ Tɔhonɔ̀a ji sè.
25Eŋuã yomè a, Barnabas yì èdù kè wo yɔna be Tarsòa mè, la yì kplɔ̀ Saolò. 26Ekè e kpɔ ɛ̀a, e kplɔ̀ ɛ̀ va Ãtiokìa, eye wo àmè èvèawo nɔ̀ èhabɔ̀bɔa gbɔ èpè ɖèka, eye wo fiɔ ènu àmè sùgbɔ fuu. Ãtiokìa, funua ye àmèwo yɔ xɔ̀sètɔwo lè cucugbã be “Kristòtɔ̀wo.” 27Gà ŋuawo mèa, Mawu be gblɔ̃ɖɛtɔ ɖewo so Yèruzàlɛm va Ãtiokìa. 28Àmè kè wo yɔna be Agabòs lè woa dòmèa sitè. Gbɔ̃gbɔ̃ Kɔ̀kɔ̀ɛ a na be gblɔ̃ be àdɔ̀ gã ɖe la va to lè xixea kpata mè. Ekèa va e mè nyàwo lè Klodìo#11.28 Klodìo: nyi èfìɔ kè be hùenu àdɔ̀ to lè, lè èpè èkà ci àdɛ̃ ku èkà ci ènyi dòmè lè ànyigbã be àkpa vòvòwo jia. be hùenu. 29Eye nukplaviawo ɖo è be àmè sia àmè ne na ènu kè ji be kpea, ne yèwoa sɔ ɛ̀ ɖoɖa nɔ̀vi kèwo lè Yudeà wo, la sɔ do wo àlɔ̀. 30Wo wɔ̀ ɛ̀ nènea, eye wo sɔ ɛ̀ ɖoɖa èhamèmègãwo lè Yudeà, to Barnabas ku Saolò ji.
Mina Bible © Bible Society of Togo, 2014.