Èdɔwɔ̀wɔwo 10
10
Kɔrnelìo kpɔ àvìmènu lè Kayizarèa
1Ŋusù ɖe nɔ̀ Kayizarèa; wo yɔna ɛ̀ be Kɔrnelìo. E nyi àhùaga lè gbãdãgbã èkà èvè takpo be èha kè wo yɔna be: “Italìa tɔ̀a” nu. 2Ŋusù kèa dona veve ènu lè Mawu sɛ̃sɛ̃ mè, eye, ye ku yebe àxuedoa keŋu sina Mawu. E nana ènu Yudàvi wɔ̀amènɔ̀wo fàa, eye e fãnàkue na Mawu wè sia wè. 3Gbè ɖèkaa, sìgbè wètrɔ gà ètɔ̃ mè nènea, e kpɔ Mawu be àtikplɔtɔ ɖe peŋu lè àvìmè. *Àtikplɔtɔa ɖo yebe àxomè, yɔ ɛ̀ be: “Kɔrnelìo!” 4Ekè Kɔrnelìo kpɔ àtikplɔtɔa, vɔ̃vɔ̃ ɖo è. E kpɔ ɛ̀ kãa, eye be biɔ ɛ̀ be: “Nukɛ jɔ̀ ò, Tɔhonɔ̀?” Mawu be àtikplɔtɔa ɖo e ŋuti na ɛ̀ be: “Kuefã wòwo ku àdɔ̀mènyuɛ̃ kè wò wɔ̀nà na wɔ̀amènɔ̀wo keŋuã, jè Mawu be ŋùmè, eye be ɖo ŋùku ji wò. 5Fifìa, dɔ̃ àmè ɖoɖa Jope ne woa yì yɔ Simɔ̀n kè wo gbà yɔna be Petròa va. 6E lè ŋusù àgbàzedɔwɔ̀tɔ ɖe kè wo yɔna be Simɔ̀n-a be àxomè, lè àpùta lɔ̀ge.” 7Ekè Mawu be àtikplɔtɔ kè pò nupo ku ìa jo troloa, Kɔrnelìo yɔ yebe sumɔ̃vi èvè, ku gbãdãgbã kèwo wɔ̀nà èdɔ na ɛ̀awo dòmètɔ ɖèka. Gbãdãgbã kèa sɛ̃nà Mawu. 8E hũ ènu kèwo keŋu jɔ̀awo mè na wo, eye be dɔ̃ wo ɖoɖa Jope.
9Yebe èŋù kè gbèa, wo le èmɔ lè yì, eye wàlɛbɛ kè wo le gogo Jope be èdùa, Petrò lia àsãŋu be àyaxɔ̀pe, sìgbè dɔ̃ŋùkusu gà woèvè mè nène, la fãkue. 10Àdɔ̀ wù ì, eye e jro la ɖù ènu. Wàlɛbɛ kè wo le ɖà ènua, e ɖo àvìmè, 11eye be kpɔ jiŋùkusi hũ ɖɛ; ènu ɖe kè lè sìgbè àvɔ gbàjà gã ɖe nènea ɖì so èji gbãnà ànyigbã; yebe èto ènèawo lè sãsã. 12Eye, èlã hamèhamèwo lè e mè: èlã kèwo zɔ̃nà àfɔ̀ ènè ji, ku ekèwo tana lè pòdo ji, kudo ekèwo zrònà lè àya mèawo cã. 13E sè ègbè ɖe gblɔ̃ na ɛ̀ be: “Petrò! Sitè, wù, ne wòa ɖù!” 14Petrò ɖo e ŋuti be: “Kpao, Tɔhonɔ̀! Đo ènu màkɔ̀ màkɔ ku ènu kè la do èdɔ̀ àmèa, be ɖe mu jè ènu mè na mù kpɔ gbèɖe ò!” 15Ègbèa trɔ gblɔ̃ na ɛ̀, zè èvègɔ̃a be: “Ènu kè ŋuti Mawu kɔ̀a, wò ya, mù gbà gblɔ̃ be e nyi ènu màkɔ̀ màkɔ ò.” 16Ènu kèa jɔ̀ zè ètɔ̃. Eŋuã yomè troloa, ènu kè ɖì àvɔ gbàjà gã ɖe a ku ènu kè lè e mèa gbìgbɔ̀ trɔ yì jiŋùkusi zè ɖèka.
17Petrò le biɔ ye ɖokoe, ènu kè be kpɔ lè àvìmè ŋua be gɔ̃mè, vɔ̀a, mu sè e gɔ̃mè ò. Wàlɛbɛ kè be le bù ì kpɔa, àmè kèwo Kɔrnelìo dɔ̃ ɖoɖaawo lè biɔ Simɔ̀n be àxomè ta, kaka va ɖo àgboa ji. 18Wo kɔ ègbè yìji le biɔ be: “Fikèa ye Simɔ̀n kè wo yɔna be Petròa va zɛ̃ a?” 19Petrò kpɔ̀tɔ̀ lè bù ètamè so àvìmènu kè be kpɔa ŋuti, vɔ̀a, Gbɔ̃gbɔ̃ a gblɔ̃ na ɛ̀ be: “Kpɔɖa, ŋusù ɖewo#10.19 Mawu be xoma xoxo ɖewo be: àmè ɖewo ɖèka ɖe ya be àmè èvè. va le ji wò. 20Sitè, ɖì ne wòa kpàsà wo do, eye mù gbà vɔ̃ ò, ɖo ènyè ye dɔ̃ wo ɖoɖa.” 21Petrò ɖì va kpɔ àmèawo, eye be gblɔ̃ na wo be: “Ènyè ye nyi àmè kè mì le jia, nukɛ ŋuti mì va fikèa ɖo ò?” 22Wo ɖo e ŋuti na ɛ̀ be: “Àhùaga Kɔrnelìo ye dɔ̃ mi ɖoɖa. Ŋusù kèa, àmè nyuɛ̃ be nyi; e sina Mawu, eye Yudàviwo keŋu ɖùnà ɖase nyuɛ̃ so e ŋuti. Mawu be àtikplɔtɔ ɖe ze ɖo e ji, eye be gblɔ̃ na ɛ̀ be ne yɔ wò va yebe àxomè, ne bèa ɖo èto ènyà kè wò la gblɔ̃ na ɛ̀a.” 23Petrò kplɔ̀ wo ɖo àxuea mè, na wo dɔ̃pe.
Yebe èŋù kè gbèa, e jè èmɔ ku wo. Nɔ̀vi kèwo lè Jopeawo dòmètɔ ɖewo kpàsà ɛ̀ do. 24Wo ɖo Kayizarèa, ŋùkèkè ètɔ̃gɔ̃a gbè. Ekè Kɔrnelìo, nɔ̀tè kpɔ woabe vavaa, e yɔ yebe àxomètɔwo, ku yebe èxlɔ̃ vevewo bɔ̀. 25Wàlɛbɛ kè Petrò le ɖo àxuea mèa, Kɔrnelìo to va kpe è, jè èklò ɖo yebe àfɔ̀ nu, be do èta gũ na ɛ̀. 26Vɔ̀ Petrò le è sitè, gblɔ̃ na ɛ̀ be: “Sitè, àgbètɔ ye nyè cã mù nyi.” 27Eye, wàlɛbɛ kè be le kã àseŋu kudo èa, wo ɖo àxuea mè. Kè Petrò kpɔ be àmè sùgbɔ bɔ̀ ɖo funua, 28e gblɔ̃ na wo be: “Mì nyà nyuɛ̃ ɖe be, lè mia Yudàviwo be *èse mèa, Yudàvi mu ɖo la do èha ku àmè kè mu nyi Yudàvi òa gbèɖe ò; mu ɖo la ɖìsà, yì e gbɔ cã ò. Vɔ̀a, Mawu ɖè è fiɔ mù, fifì be nyè mu ɖo la yɔ àmè ɖekpe be àmè màɖì àmè, àlo àmè kè nyè ma teŋu do èha ku ò. 29Eŋuã ŋuti ye wàlɛbɛ kè wò yɔ mùa, nyè mu bù ì kpɔ, gbɔ̀xue va ò. Fifìa, ènyà kè ŋuti wò yɔ mù ɖoa, to è na mù.” 30Kɔrnelìo ɖo e ŋuti be: “Ŋùkèkè ètɔ̃ tututu ye nyi ekèa, mù lè àpe àxomè, lè wètrɔ gà ètɔ̃ mè lɔ̀ge, le fãkue. Troloa, ŋusù ɖe va ze lè ŋùkɔ̀ na mù, do àwù ɖe kè le dàzòa. 31E gblɔ̃ na mù be: 'Kɔrnelìo, Mawu sè kuefã wòawo, eye e ɖoŋù àdɔ̀mènyuɛ̃ kèwo wò wɔ̀nà na wɔ̀amènɔ̀woa. 32Ekèa ŋutia, dɔ̃ àmè ɖoɖa Jope, ne wòa yɔ Simɔ̀n kè wo gbà yɔna be Petròa va. Èlãgbàzedɔwɔ̀tɔ Simɔ̀n kè be àxue lè àpùtaa gbɔ ye bè zɛ̃.' 33Mù dɔ̃ àmè ɖoɖa wò zè ɖèka, be woa yɔ wò va, eye wò lɔ̃, va nyàwo. Fifìa miawo keŋu ye nyi ekèa, lè Mawu be ŋùmè, la sè ènu kè Mawu dɔ̃ wò be wòa gblɔ̃ na mia.”
Petrò pò nupo lè Kɔrnelìo be àxomè
34Petrò xɔ̀ ènyà gblɔ̃ be: “Mù kpɔ fifì nyàwo, be Mawu mu dona vòvòtoto àmèwo dòmè ò. 35Vɔ̀ bòhũa, lè dùkɔ̃ ɖè sia ɖè mèa, àmè kè ɖona sìsi na ɛ̀, eye be wɔ̀nà ènu jɔ̀jɔɛa, àmè ŋua ye jènà ŋùmè na ɛ̀. 36Mawu do yebe àŋɛ̀a ɖoɖa Izràɛl be dùkɔ̃a, àŋɛ̀nyuɛ̃ kè nana fàfaa to Yesù Kristò kè nyi àmèwo keŋu be Tɔhonɔ̀a ji. 37Wàlɛbɛ kè Yòhanɛ̀s gblɔ̃ Mawunya, eye be lè mawusi na àmèwo yomè a, mì nya ènu kè jɔ̀ lè Galileaa, gbɔ̀xue gbà va jɔ̀ to Yudeà be àgowo keŋu jia. 38Mì nya àlekè ye Mawu sɔ Gbɔ̃gbɔ̃ Kɔ̀kɔ̀ɛ a be ŋusɛ̃ ɖo Yesù Nazarɛttɔ̀a jia. Mì gbà nya lekè Yesù to àfiwo keŋu, wɔ̀ nyuɛ̃ na àmèwo, dà èdɔ̀ na àmè kèwo keŋu ji Àbòsam ɖùawo, ɖoa, Mawu lè kudo è. 39Ènu kèwo keŋu be wɔ̀ lè Yudàviwo be ànyigbã ji ku Yèruzàlɛm-a, mi kpɔ wo. Wo wù ì, wàlɛbɛ kè wo ka ɛ̀ ɖo àtisòga ŋutia. 40Mawu fɔ̃ ɛ̀ so èku, lè yebe ŋùkèkè ètɔ̃gɔ̃a gbè, eye be ɖè ye ɖokoe fiɔ àmèwo. 41Mu nyi dùkɔ̃a keŋu ye be ɖè è fiɔ ò, vɔ̀ mi, àmè kèwo Mawu cã ɖɛ, be mia nyi yèbe ɖàsèfowo, mi, àmè kèwo ɖù, gbà nù ku ì, wàlɛbɛ kè Mawu fɔ̃ ɛ̀ so èku va àgbè a yomè. 42Sɔ wu ekèa, e ɖè ègbè na mi be mia do Àŋɛ̀nyuɛ̃ a na dùkɔ̃wo, ne mia ɖù ɖase be yè nyi àmè kè Mawu cã, ne bèa ɖo kòjo na àmè àgbè-àgbèwo ku àmè kukuwo. 43E ye gblɔ̃ɖɛtɔwo keŋu ɖù ɖase na be: 'Àmè kèwo la xɔ̀ e ji sè a, Mawu la sɔ woabe èvuɛ̃wo kè wo, to yebe nyikɔ ji.'”
Àmè kèwo mu nyi Yudàvi ò a, xɔ Gbɔ̃gbɔ̃ Kɔ̀kɔ̀ɛ a
44Petrò mu kpɔ wu yebe nupoa nu, gbɔ̀xue Gbɔ̃gbɔ̃ Kɔ̀kɔ̀ɛ a ɖì jè àmè kèwo lè ɖo èto èawo keŋu ji ò. 45Kè xɔ̀sètɔ kèwo nyi Yudàviwo, eye wo kpàsà Petrò doawo kpɔ àlekè Gbɔ̃gbɔ̃ a ɖì ɖo àmè kèwo mu nyi Yudàvi òawo jia, wo kã yàa. 46Đo wo sè àmèawo lè pò nupo lè ègbè kèwo wo mu sè òawo mè, lè kafu Mawu. Petrò xɔ̀ ènyàa gblɔ̃ be: 47“Àmè ɖe teŋu gbe be wo mu gbà lè mawusi na àmè kèawo, àmè kèwo xɔ̀ Gbɔ̃gbɔ̃ Kɔ̀kɔ̀ɛ sìgbè lekè miawo cã mi xɔ̀ ɛ̀a nène ò a?” 48Eye e ɖè ègbè be woa lè mawusi na wo, lè Yesù Kristò be nyikɔ mè. Eŋuã yomè a, wo ɖè kuku na ɛ̀ be ne nɔ̀ yèwo gbɔ ŋùkèkè ɖewo.
Mina Bible © Bible Society of Togo, 2014.