2Samuɛl 6

David be yèa sɔ Zòɖùɖu-Ɖakà a va Yèruzàlɛm

(1Kro 13.4-14)

1David gbà bɔ̀ Izràɛl dùkɔ̃a be gbãdãgbã nyuɛ̃tɔawo kpata, eye woawo keŋu sù àgbètɔ hotu-woeàtɔ̃. 2Àhùakɔ̃ kèa keŋu kplɔ̀ David do, yì Baalè be èdù mè, lè Yudà-nyigbã ji, la yì sɔ Mawu be Zòɖùɖu-Ɖakà kè ŋuti wo yɔ nyikɔ ɖe ɖo, Tɔhonɔ̀ Izràɛlviwo be àhùakɔ̃a be Mawu kè le ɖùfìɔ lè Kèrubimwo jia be nyikɔa#6.2 Kpɔ 1 Sam 6.21; 7.1; Tot 25.22.. 3Wo kɔkɔ Zòɖùɖu-Ɖakà a ɖo kèkevi yeye ɖe ji, eye wo sɔ ɛ̀ so Abinadab be àxue kè lè ètokɔ̃ɛ ɖe tamèa mè. Uzà ku Ahìo, Abinadab be ŋusùviwo ye kù kèkevi yeyea#6.3 Kpɔ 1 Sam 7.1-2.. 4Mawu be Zòɖùɖu-Ɖakà a lè kèkevia ji, eye Ahìo le zɔ̃ lè Zòɖùɖu-Ɖakà a be ŋùkɔ̀. 5David ku Izràɛlviwo kpata le kpɔ jìjɔɛ, eye wo le jròwe, le pò èhũwo, le pò sãŋùguwo, èkà-sãŋùguwo, le ku èzèwo, eye wo le jì kafuhawo lè Tɔhonɔ̀ be ŋùmè. 6Ekè wo ɖo Nakɔ̀n be èlùfupea, ènyì kèwo ye le dɔ̃ Zòɖùɖu-Ɖakà a be kèkeviawo jè ànyi kloe, vɔ̀a, Uzà ɖèbla le Mawu be Zòɖùɖu-Ɖakà a. 7Tɔhonɔ̀ do àdɔ̀mèze do Uzà, ɖo àmè mà bù be wɔ̀na kèa ŋuti, eye Uzà ku lè Mawu be Zòɖùɖu-Ɖakà a gbɔ zè ɖèka#6.7 Kpɔ Gbì 10.8.. 8Ènu kèa bà kɔ̀bɛ na David, eye be ɖo nyikɔ na tèpe kèa be Peres-Uza, ekè gɔ̃mè ye nyi Uzà be èmɔ̃ hũhũ, kaka va na fifì. 9David vɔ̃ Tɔhonɔ̀, gbè ŋua gbè, eye be gblɔ̃ be: “Leke mù la teŋu xɔ̀ Tɔhonɔ̀ be Zòɖùɖu-Ɖakà a ɖo gbɔ nyè ɖo ò?” 10David mu gbà jro, la xɔ̀ Tɔhonɔ̀ be Zòɖùɖu-Ɖakà a va ye ɖokoe gbɔ, lè David be Èdùa mè ke ò. E na be wo ne sɔ ɛ̀ yì ɖo Obɛd-Edɔ̀m, Gat ŋusù ɖe be àxomè. 11Tɔhonɔ̀ be Zòɖùɖu-Ɖakà a nɔ̀ Gat ŋusù, Obɛd-Edɔ̀m be àxomè, wètri ètɔ̃, eye Tɔhonɔ̀ tu sì na Obɛd-Edɔ̀m ku yebe àxuedoa kpata#6.11 Kpɔ 1Kro 26.4-5.

Zòɖùɖu-Ɖakà kɔ̀kɔ̀ɛa va Yèruzàlɛm

(1Kro 15.25—16.3)

12Àmèwo va gblɔ̃ na èfìɔ David be: “Mawu be Zòɖùɖu-Ɖakà a na be Tɔhonɔ̀ tusì na Obɛd-Edɔ̀m ku yebe àxuedoa, kudo ènu kèwo keŋu nyi ye tɔ̀awo.” Ekèa yomè a, David yì na wo kɔkɔ Mawu be Zòɖùɖu-Ɖakà a, so Obɛd-Edɔ̀m be àxomè, va David be Èdùa mè ku jìjɔɛ. 13Ekè Tɔhonɔ̀ be Zòɖùɖu-Ɖakà a drotɔwo ɖè àfɔ̀ àdɛ̃a, David sɔ ènyì-su do àmì ɖèka ku ènyì-vi do àmì ɖèka savɔ. 14David mu do àwù bu, tovò na hũbonɔwo be dàbla kè wo sɔ àlɛ̃ŋudà-vɔ wɔ̀a ò, eye be le ɖu èwè ku yebe ŋusɛ̃. 15David ku Izràɛl dùkɔ̃ bliboa, sɔ Tɔhonɔ̀ be Zòɖùɖu-Ɖakà a le yì Yèruzàlɛm, lè jìjɔɛ kpɔkpɔ, àyo sòso mè, eye wo sɔ èzèwo le kafu Mawu.

16Vɔ̀a, wàlɛbɛ kè Tɔhonɔ̀ be Zòɖùɖu-Ɖakà a le ɖo David be Èdùa mèa, Mikàl, Saolò be nyɔ̃nùvia va kpɔ flɛsɛ̀ nu, eye be kpɔ èfìɔ David le ɖu èwè, le tro, lè Tɔhonɔ̀ be ŋùmè. Ekèa na be Mikàl crì èfìɔ David veve ɖe, lè yebe èjì mè. 17Wo sɔ Tɔhonɔ̀ be Zòɖùɖu-Ɖakà a va ɖo nɔ̀pe kè David jràɖo ɖɛ na ɛ̀, lè gòxɔ kè be na wo tù na Tɔhonɔ̀ be Zòɖùɖu-Ɖakà a. Ekèa yomè a, David wɔ̀ vɔsa blibowo, ènumème vɔ̀sawo ku ŋuti fàfa vɔ̀sawo na Tɔhonɔ̀. 18Ekè David wɔ̀ ènumème vɔsa ku ŋuti fàfa vɔsaawo vɔ̀a, e tusì na dùkɔ̃a lè Tɔhonɔ̀, ŋusɛ̃kpatatɔa be nyikɔ mè. 19E yomè a, David na wo mã klàko, ède vivi be kekè ku vɛ̃-ku sia sia be kekè na àmè sia àmè, lè àmèhaa dòmè, na Izràɛl dùkɔ̃a keŋu, ŋusù ku nyɔ̃nùwo kpata, na àmè ɖekpekpe, eye dùkɔ̃a keŋu trɔ jo, àmè sia àmè yì yebe àxomè.

20Ekè David trɔ yì àxomè, la yì na sìtu yebe àxuedoa, Mikàl, Saolò be èvia to va dogò David, eye be gblɔ̃ na ɛ̀ be: “Egbèa, Izràɛl be èfìɔa do bùbu ye ŋutɔ ɖokoe ŋuti, wàlɛbɛ kè be le klo ènu lè ye ɖokoe ŋuti, le ɖè àma lè yebe gɔ̃mènɔ̀tɔwo be sumɔ̃vi-nyɔ̃nùwo be ŋùmè, sìgbè lekè yàkàmewo wɔ̀nàa nène!”

21David ɖo e ŋuti na Mikàl be: “Ekèa, mù wɔ̀ ɛ̀, sɔ do bùbu Tɔhonɔ̀ kè cã mù, Tɔhonɔ̀ kè be ŋùmè mù jè, wu ètɔ wò, ku ètɔ wò be àxuedoa keŋu, Tɔhonɔ̀ kè sɔ mù ɖofìɔ ɖo yebe dùkɔ̃a nua, Tɔhonɔ̀ ŋua ye mù ɖuwè na, sɔ na ɛ̀ bùbu. 22Mù la gbà bɔ̀bɔ̀ ɖokoe nyè wu nènea, eye mù la gbà ɖè ɖokoe nyè kpɔ̀tɔ̀ lè ŋùku nyè mè, vɔ̀a, lè sumɔ̃vi kèwo be ènyà wò le gblɔ̃a gbɔa, lè woabe ŋùmè a, bùbu la nɔ̀ ŋuti nyè.” 23Eye Mikàl, Saolò be nyɔ̃nùvia mu jì èvi, kaka be ku ò.

Currently Selected:

2Samuɛl 6: GEN

Highlight

Copy

Compare