2Samuɛl 13
13
Amnɔ̀n kudo Tamàr
1E va e mè be David be ŋusùvi, Àbsàlɔm ɖo nɔ̀vi nyɔ̃nùvi ɖe ke jè tùgbɛ̀jɛ ŋutɔa. Wo yɔna ɛ̀ be Tamàr. Nyɔ̃nùvia be ènu le èjì na Amnɔ̀n, David be èvi ŋusùa. 2Lɔ̃lɔ̃ kè Amnɔ̀n ɖo na ètɔa be nyɔ̃nùvi Tamàr na èta mè bùbu Amnɔ̀n, àleke be e va lè na ɛ̀ sìgbè èdɔlele nène. Ɖo Tamàr gbà lè àlɔ̀ ji, eye mu la nɔ̀ bɔ̀bɔɛ ɖe na Amnɔ̀n be, bèa do àlɔ̀ ètɔa be nyɔ̃nùvia ŋuti ò. 3Amnɔ̀n be èxlɔ̃ ɖe kè jè àyè sùgbɔa lè. E nyi David be fòfo Simèa be èvi, eye wo yɔna ɛ̀ be Yònadàb. 4Yònadàb biɔ Amnɔ̀n be: “Èfìɔvi, nukɛ ŋuti wò le nɔ̀ ŋuzĩzĩme ŋùkèkè kèawo mè lekea ɖo ò? Wò mu jro la gblɔ̃ ɛ̀ na mù ò a?” Amnɔ̀n ɖo e ŋuti be: “Tamàr, Àbsàlɔm be nɔ̀vi-nyɔ̃nùa be ènu ye le le èjì na mù.” 5Yònadàb to na ɛ̀ be: “Wɔ̀ sìgbè àmè kè le le èdɔ̀ nène, ne wòa mlɔ̃ àpo àba ji. Ne ètɔ wò va, la kpɔ wò ɖaa, wò la gblɔ̃ na ɛ̀ be: 'Na ne nɔ̀vi nyè Tamàr bèa va tɔ̀ klàko èvè ɖewo na mù, lè gbɔ nyè, ne bèa sɔ na mù mà-ɖù.'”
6Amnɔ̀n mlɔ̃ ànyi, eye be wɔ̀ sìgbè àmè kè jè èdɔ̀ nène. Èfìɔa va ji ì kpɔ, eye Amnɔ̀n gblɔ̃ na èfìɔa be: “Na ne nɔ̀vi nyè Tamàr bèa va tɔ̀ klàko èvè ɖewo na mù, lè gbɔ nyè, ne bèa sɔ na mù mà-ɖù.” 7David do àŋɛ̀ ɖoɖa Tamàr be: “Yì fòfo wò, Amnɔ̀n gbɔ, ne wòa ɖà ènu na ɛ̀, bèa ɖù.” 8Tamàr yì fòfoa Amnɔ̀n gbɔ, eye be kpɔ ɛ̀ lè ànyi mɔmlɔ̃. Tamàr sɔ mawɔɛ, nyà ɛ̀, eye be tɔ̀ klàko lè Amnɔ̀n be ŋùmè. 9Ekè Tamàr trɔ klàkoa ɖo àgbã mè, lè Amnɔ̀n be ŋùmè a, Amnɔ̀n gbe be yè mu la ɖù ì ò. Amnɔ̀n gblɔ̃ be: “Mì ɖè àmè sia àmè to lè èxɔ̀a mè.” Eye, àmè kèwo keŋu lè Amnɔ̀n gbɔawo to. 10Amnɔ̀n gblɔ̃ na Tamàr be: “Sɔ ènu ɖùɖua va èxɔ̀gã mè na mù, mà-ɖù.” Tamàr sɔ klàko kè be tɔ̀a yì na fòfoa lè èxɔ̀a mè. 11Wàlɛbɛ kè Tamàr sɔ ènu ɖùɖua le na fòfoa, Amnɔ̀n le nɔ̀via, eye be gblɔ̃ na ɛ̀ be: “Tamàr, va ne mia dɔ̃!” 12Tamàr ɖo e ŋuti be: “Aò! Fòfo nyè. Mù gbà do àvũ na mù ò. Àmè ɖe mu wɔ̀nà nène, lè mia de Izràɛl ò. Mù gbà wɔ̀ ŋùkpɛ̃nu ŋua ò. 13E yomè a ɖe, fikɛ ye ènyè ya, mù la sɔ ŋùkpɛ̃ nyèa yì ò? Eye èwò ŋutɔ cã, àmèwo la bù wò, lè Izràɛl ɖo ŋùkpɛ̃-nu wɔ̀tɔwo dòmè. Jo pò nupo ku èfìɔa bòhũ. Mu la gbe be wòa ɖè mù ò.” 14Vɔ̀a, Amnɔ̀n mu jro la ɖo èto è ò. E do àvũ na Tamàr, zĩ e ji, eye be dɔ̃ ku ì. 15So gà ŋua mèa, Amnɔ̀n tɔ Tamàr cìcri. E gbà jo crì Tamàr wu lekè be lɔ̃ ɛ̀ sãa. Eye Amnɔ̀n ɖè ègbè na Tamàr be: “Sitè, ne wòa jo!” 16Tamàr ɖo e ŋuti be: “Gbèɖe! Ne wò nyà mù lekea, e gbà nyrã wu èvuɛ̃ kè wò wɔ̀ fifìa.” Vɔ̀a, Amnɔ̀n gbe be yè mu la ɖo èto Tamàr ò. 17Amnɔ̀n yɔ yebe sumɔ̃vi kè nɔ̀nàa e ŋutia, eye be gblɔ̃ na ɛ̀ be: “Mì ɖè tùgbɛ̀jɛ kèa to lè àxomè na mù, ne mìa tu àgboa lè e yomè!” 18Sumɔvia ɖè è to, eye be tu àgboa do è.
Tamàr do hùɛ̃yiwo be àwù ɖe kè èfìɔvi nyɔ̃nùwo dona, ne wo mu kpɔ ɖè èsrɔ̃ ò a. 19Tamàr kɔ̀ àfi ɖo èta, zɛ̃ yebe àwù nyuɛ̃a, kpla àsi èta, eye be jo ku àbòbo. 20Fòfoa, Àbsàlɔm biɔ ɛ̀ sè be: “Fòfo wò Amnɔ̀n dɔ̃ gbɔ wò ye à? Fifìa, nɔ̀vi nyè, bɔ̀ ènu. Mù gbà na, wo ne sè nyikɔ wò ò. Fòfo wò ye be nyi. Mù wɔ̀ ènu ɖe ò.” So gà ŋua mèa, Tamàr ɖè ye ɖokoe ɖovò ku yebe àkpɔ̃a, lè fòfoa Àbsàlɔm be àxomè, sìgbè nyɔ̃nù kè wo gble ɖɛa nène. 21Ekè èfìɔ David sè ènu kèwo keŋu jɔ̀ a, e bijì veve ɖe. 22Ekè Amnɔ̀n do àvũ na Tamàr, Àbsàlɔm be nɔ̀vi, eye be dɔ̃ e gbɔa, Àbsàlɔm le èkɛ̃ fòfoa Amnɔ̀n, eye be crì ì.
Wo wù Amnɔ̀n eye Àbsàlɔm si
23Èpè èvè yomè a, wo le kpa èfu na àlɛ̃wo lè Àbsàlɔm be àxomè, lè Baal-Hasɔr, kè mu dìdì lè Efràyim be èdùa gbɔ ò a. Àbsàlɔm kpe èfìɔa be ŋusùviwo keŋu. 24Àbsàlɔm va èfìɔa gbɔ, eye be gblɔ̃ na èfìɔa be: “Èfìɔ bùbùtɔ, kpɔɖa sumɔ̃vi wò le ɖè kuku na wò be wo le kpà èfu na yèbe àlɛ̃wo. Èfìɔ bùbùtɔ ku yebe èdùdɔwɔ̀tɔwo ne lɔ̃ jro, be yèwoa kplɔ̀ sumɔ̃vi wò, yì àzã kèa tèpe.” 25Èfìɔ gblɔ̃ na Àbsàlɔm be: “Aò, èvi nyè! Mu nyɔ be mia kpata mia yì àzã kèa mè, ne mia jo va nyi àgbã na wò ò!” Àbsàlɔm zĩ ètɔa ji, vɔ̀ èfìɔa mu lɔ̃ be yèa yì àzãa tèpe ò, gãkea, e tu sì na Àbsàlɔm. 26Àbsàlɔm gbà gblɔ̃ na ètɔa be: “Ekè èfìɔ bùbùtɔ ŋutɔ mu la teŋu yì ò a, ne ɖè èmɔ̃ be fòfo nyè Amnɔ̀n ne kplɔ̀ mi yì jro!” Èfìɔa biɔ Àbsàlɔm be: “Nukɛ ŋuti Amnɔ̀n la yì ku wò ɖo ò?” 27Ekè Àbsàlɔm zĩ èfìɔa jia, èfìɔ David na be Amnɔ̀n ku èvia-ŋusùwo keŋu ne yì àzãa ɖùpea ku Àbsàlɔm. 28Àbsàlɔm ɖè ègbè na yebe sumɔ̃viwo be: “Mì hũ ŋùkuvi nyuɛ̃ ɖe. Ne Amnɔ̀n gbe mu àhà, eye be le kpɔ jìjɔɛ, eye mù gbe ɖè ègbè na mì be: 'Mì wù Amnɔ̀n!' Kpòa, mia wù ì. Mì mu gbà vɔ̃ ò. Ènyè ye le ɖo è na mì. Èjì ne nɔ̀ mìa si, eye mìa wɔ̀ kãlì!” 29Àbsàlɔm be sumɔ̃viwo zɔ̃ ɖo woa àpetɔ be ɖoɖo ji, eye wo wù Amnɔ̀n. Èfìɔ be èvi-ŋusùawo keŋu sitè, tìkpo, lia woabe èsɔàkɛtɛwo ji, eye wo si jo.
30Wàlɛbɛ kè èfìɔ be èviawo lè èmɔ̃ ji, gbãnàa, ènyà va ɖo èfìɔa be èto mè be: “Àbsàlɔm wù èfìɔa be èvi-ŋusùwo kpata, eye ɖekpe mu ci àgbè ò.” 31Eye èfìɔa sitè, zɛ̃ yebe àwùwo, eye be mlɔ̃ ànyi ɖo ànyigbã. Yebe èdùdɔnunɔ̀tɔwo cã zɛ̃ woabe àwùwo, eye wo trɔ do è. 32Vɔ̀a, David be fòfo, Simèa be èvi, Yonadàb kè ènu, gblɔ̃ be: “Àpetɔ nyè, bùbùtɔ, mù gbà xɔ̀sè be wo wù yèbe èvi-ŋusùwo kpata ò. Amnɔ̀n ɖèka kpò ye ku. Àbsàlɔm ŋutɔ gblɔ̃ be ye ɖo ènu kèa wɔ̀wɔ, so kaka gbè kè gbè Amnɔ̀n do àvũ na yè nɔ̀vi nyɔ̃nù Tamàr, eye be dɔ̃ e gbɔa ke. 33Ekèa ŋutia, àpetɔ nyè, èfìɔ bùbùtɔ mu gbà sè veve be yèbe èvi, èfìɔvi-ŋusùwo keŋu ku ò. Kpao! Amnɔ̀n kpò ye ku.” 34Eye Àbsàlɔm ya si jo.
Kè ɖèkajɛ kè nyi èmɔ̃jikpɔtɔa kɔ ŋùmè yì jia, e kpɔ àmèha gã ɖe, so yebe ŋùgbedòmè, to ètoa be àxàda mè gbãnà. 35Yonadàb gblɔ̃ na èfìɔa be: “Kpɔɖa, èfìɔ bùbùtɔ, èvi wòwo ye nyi ekèawo gbãnà. Lekè ènuwo yì ɖoa, kpò ye sumɔ̃vi wòa va gblɔ̃ na wò.” 36Yonadàb mu kpɔ ɖè ènu lè ènyàa mè gbɔ̀xue èfìɔ be èviawo va ɖo ò. Ekè wo wo ku àvia, èfìɔ ku yebe ŋutimeawo cã wo ku àvi hèhèhè. 37Ekè Àbsàlɔm sia, e yì ci Amihur be èvi, Talmaì kè nyi Gɛsur be èfìɔa gbɔ. Wàlɛbɛ ŋua, David lòfũ na èvia kè kua.
Àbsàlɔm trɔ gbɔ̀
38Kè Àbsàlɔm sia, e yì Gɛsur, eye be nɔ̀ funua èpè ètɔ̃. 39Àdɔ̀mè kè le ve David ɖo Àbsàlɔm ŋutia va le ɖiɖi kpɔ̀tɔ̀, ekè àkɔ le fa na ɛ̀a.
Currently Selected:
2Samuɛl 13: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
