2Samuɛl 12

Ɖo David be àhasìwɔ̀wɔ ŋuti

1Tɔhonɔ̀ dɔ̃ gblɔ̃ɖɛtɔ Natàn ɖoɖa David. Natàn yì èfìɔa gbɔ, eye be gblɔ̃ na David be: “Ŋusù èvè lè èdù ɖe mè. Àmè ɖèka nyi àdɔ̀kùnɔ̀. Èvègɔ̃a nyi wɔ̀amènɔ̀. 2Àdɔ̀kùnɔ̀a ɖo àlɛ̃ ku ènyì sùgbɔ. 3Wɔ̀amènɔ̀a mu ɖo ènu ɖe, tovò na àlɛ̃nɔvi ɖe kè be plèa ò. Wɔ̀amènɔ̀a le nyì àlɛ̃vi ɖèka tigɔ̃a, eye àlɛ̃via le sĩ ku wɔ̀amènɔ̀a be èviwo, lè wɔ̀amènɔ̀a be àxomè. Àlɛ̃via ɖùnà kpɔ̃nɔ kè wɔ̀amènɔ̀a ɖùnàa, eye be nùnà nyìnɔsi kè wɔ̀amènɔ̀a nùnàa. Àlɛ̃via mlɔ̃na wɔ̀amènɔ̀a be àxàda mè, eye àlɛ̃via lè na wɔ̀amènɔ̀a sìgbè ye ŋutɔ èvia nène. 4Gbè ɖèkaa, àmèjro ɖe va zɛ̃ àdɔ̀kùnɔ̀ a. Vɔ̀a àdɔ̀kùnɔ̀ a mu dojì le ye ŋutɔ be àlɛ̃wo dòmètɔ ɖe, àlo, ènyìwo dòmètɔ ɖe, la sɔ wɔ̀ ènu ɖùɖu na àmèjroa ò. Àdɔ̀kùnɔ̀a va le wɔ̀amènɔ̀a be àlɛ̃nɔvia sɔ wɔ̀ ènu ɖùɖu na àmèjroa.”

5David bijì, eye be do àdɔ̀mèze gã ɖe do àdɔ̀kùnɔ̀ a, eye be gblɔ̃ na Natàn be: “Mù ta Tɔhonɔ̀ be ŋusù kè wɔ̀ ènu kèa jè na èku! 6Ekè e nyi be èjì mu lè àdɔ̀kùnɔ̀ a si ò, eye be wɔ̀ ènu kèa, e ɖo la sɔ àlɛ̃nɔvi ènè, va ɖo ekè be sɔa tèpe.” 7Natàn ɖo e ŋuti na David be: “Èwò ye nyi ŋusù kè wɔ̀ ènu kèa! Tɔhonɔ̀, Izràɛl be Mawu ye gblɔ̃ ɛ̀. E gbà gblɔ̃ be: “Ènyè ye do àmì èta na wò, ɖo wò èfìɔ na Izràɛl, eye ènyè ye hlùɛ̃ wò gã lè Saolò si. 8Mù sɔ àpetɔ wò be àxuedoa do àsi na wò, eye mù sɔ èsrɔ̃awo na wò. Mù sɔ Izràɛl dùkɔ̃a ku Yudà be dùkɔ̃a ɖo gɔ̃mè na wò. Ne mu sù ò a, mù la gbà teŋu wɔ̀ wu ekèa na wò. 9Vɔ̀a, nukɛ ŋuti wò dovlo Tɔhonɔ̀ be ènyà, eye wò wɔ̀ ènu kè be crìa ɖo ò? Wò sɔ èwui, wù Urìa, Hitì ŋusùa, eye wò xɔ̀ èsrɔ̃a ɖè, wàlɛbɛ kè wò na be ci Amɔ̀n be èviwo be èwui nua. 10So egbè jia, èwui be èhlɔ̃ mu la tètè jo lè àxue wò mè gbeɖe ò, ɖoa, wò ɖìgbɔ mù, eye wò xɔ̀ Urìa, Hitì ŋusùa be èsrɔ̃ ɖè. 11Tɔhonɔ̀ ye gblɔ̃ ɛ̀: kpɔɖa, jɔ̀gbèvuɛ̃ kè la kplɔ̀ wò do a, wò ŋutɔ jìjimè wò mè mù la ɖè è to so. Mù la xɔ̀ èsrɔ̃ wòwo, lè àsi wò, la sɔ na wò ŋutɔ xòmèvi wò, lè àpo ŋùku mè, e la dɔ̃ woa gbɔ dɔ̃ŋùkusu jàse. 12Ɖoa, ènu kè èwò ya, wò wɔ̀, lè bèbe mèa, ènyè ya, mù la na be la jɔ̀ lè Izràɛlviwo kpata be ŋùmè lè àgũ dòmè.”

13Eye David gblɔ̃ na Natàn be: “Mù kpɔ ɛ̀ jèsi be mù jè àgɔ̀ le Tɔhonɔ̀ be ŋùmè.” Natàn gbà gblɔ̃ na David be: “Ekè e nyi nènea, Tɔhonɔ̀ miɔ ŋùkuvi ɖo èvuɛ̃ wòa ji. Wò mu la ku ò. 14Vɔ̀a, lè ènyà kèa mèa, wò na èmɔ̃ Tɔhonɔ̀ be èkɛ̃tɔwo, ne woa ɖìgbɔ Tɔhonɔ̀. Ekèa ŋutia, èvi kè wo jì na wòa, la ku.” 15Ekèa yomè a, Natàn trɔ yì àxomè. Eye Tɔhonɔ̀ na èvi kè Urìa be èsrɔ̃a jì na David e yomè a, jè èdɔ̀. 16David blìbɔ̀ na Mawu ɖo ɖèvia ta. E bla ènu, eye, ne e gbɔ̀ va àxomè la mlɔ̃ ànyi a, e dɔ̃na ànyigbã. 17Àmè sĩsĩ kèwo ye lè yebe àxomèawo jina be yèwoa zĩ David ji, ne bèa sitè lè ànyigbã, vɔ̀a, e gbena, eye mù lɔ̃nà, ɖùnà ènu ɖekpe ku wo ò. 18Ŋùkèkè adrɛ̃ yomè a, ɖèvia ku. David be sumɔ̃viwo vɔ̃ lekè wo la gblɔ̃ na èfìɔa be ɖèvia kua. Wo le gblɔ̃ be: “Gà kè mè ɖèvia lè àgbèa, èfìɔa mu ɖona èto ènyà kèwo mi gblɔ̃nà na ɛ̀a ò. Fifìa, leke ye mi la wɔ̀, la gblɔ̃ na ɛ̀ be: 'Ɖèvia ku ò?' Èfìɔa teŋu va wɔ̀ ènu gbegble ɖe!” 19Ekè David kpɔ yebe sumɔ̃viwo le ɖè èkpaa, e sè e gɔ̃mè be ɖèvia ku. Eye David biɔ yebe sumɔ̃viawo be: “Èvi nyèa ku ye à?” Wo ɖo e ŋuti be: “Ɛ̀ɛ, e ku.” 20Ekè David sè ènyà kèa, e sitè lè ànyigbã, yì lè èsì, sì àmì hɔ̃hɔ̃ɛ, eye be ɖɔ̀lì àwù. E yomè a, David ɖo kɔ̀kɔ̀ɛpea, yì sumɔ Tɔhonɔ̀. Ekè be trɔ yì àxomèa, e na wo wɔ̀ ènu ɖùɖu na ɛ̀, eye be ɖù ì. 21Yebe sumɔ̃viwo biɔ ɛ̀ sè be: “Èfìɔ bùbùtɔ, ènu kè wò le wɔ̀a gɔ̃mè ɖe? Wàlɛbɛ kè èvi wòa kpɔ̀tɔ̀ lè àgbèa, wò blana ènu, eye wò fãnà àvi ɖo ɖèvia ta. Fifìa, kè be kua, wò sitè, eye wò gbà tɔ ènu ɖùɖu!” 22David ɖo e ŋuti be: “Nyàwo ye be nyi be, wàlɛbɛ kè ɖèvia gbà kpɔ̀tɔ̀ lè àgbèa, mù blana ènu, eye mù fãnà ɛ̀, ɖoa, mù susuna be: 'Èta mu nyɔ ò a, Tɔhonɔ̀ la ku ŋuzĩzĩ na mù, eye be la na ɖèvia la ci àgbè.' 23Vɔ̀a, fifì kè be kua, nukɛ ŋuti mù la gbà nɔ bla ènu ɖo ò? Mù la teŋu ɖo ŋusɛ̃ sɔ na, be la gbɔ̀ àgbèa? Ènyè bòhũ ye la yì àfi kè be lèa, e ya mu la gbà teŋu trɔ gbɔ̀, va na mù gbèɖe ò!”

24David fa àkɔ na èsrɔ̃a Bat-Cebà. E dɔ̃ e gbɔ, eye Bat-Cebà jì ŋusùvi, eye David ɖo nyikɔ na ɖèvia be Salomɔ̀n. Tɔhonɔ̀ lɔ̃ ɖèvia, 25eye be na Natàn, gblɔ̃ɖɛtɔa yì to e na David. Wo na nyikɔ ɖèvia be Yedidia, kè gɔ̃mè ye nyi: 'Àmè kè Tɔhonɔ̀ lɔ̃a, àlo ɖo Tɔhonɔ̀ ŋuti.'

David ɖo àlɔ̀ Rabà be èdùa ji

(1Kro 20.1-3)

26Wàlɛbɛ ŋua, àhùaga Yoab kpe àhùa ku Rabà kè le nyi Amɔ̀ntɔwo be èdù gãa, eye be ɖo àsi èdù kè mè èfìɔa nɔ̀nàa ji. 27Yoab do àŋɛ̀ ɖoɖa David be: “Mù ɖè àhùa kpe na Rabà. Mù xɔ̀ èdù kè mè èsìdoa lèa ŋutɔ cã. 28Fifìa, bɔ̀ àhùkɔ̃ kpɔ̀tɛa, ne wòa va, xɔ̀ ànyi nɔ̀ ɖo èdùa ji, ne wò ŋutɔ, wòa xɔ̀ èdùa. Ne mu nyi nène ò a, ne ènyè ye xɔ̀ ɛ̀a, wo la va yɔ nyikɔ nyè ɖo èdùa ŋuti.” 29Ekèa yomè a, David bɔ̀ àhùakɔ̃a keŋu, jè èmɔ̃, yì Rabà, ɖè àhùa kpe na èdùa eye be ɖù èdùa ji, xɔ̀ ɛ̀. 30Eye David ɖè woabe èfìɔ be kukua lè èta na ɛ̀. Kukua be kpɛ̃kpɛ̃mè lè sìka talɛ̃ŋutò ɖèka. Ekpe xɔ̀ àsìwo lè e ŋuti. Wo sɔ kukua ɖo èta na David, eye David sɔ àmɔ̀nyɔ̀nu sùgbɔ jo lè èdùa mè. 31David kplɔ̀ dùkɔ̃a àhùale, ne woa yì wɔ̀ èdɔ sɛ̃sɛ̃wo sìgbè èkpe-sòso, èkpe-kpàkpa, ànyikɔ-kpe mème; àti-sòso. David sɔ Amɔ̀n be èdùmètɔwo kpata ɖo èdɔ sɛ̃sɛ̃wo mè. Ekèa yomè a, David kplɔ̀ Izràɛlviwo be àhùakɔ̃a keŋu gbɔ̀ va Yèruzàlɛm.

Currently Selected:

2Samuɛl 12: GEN

Highlight

Copy

Compare