2Samuɛl 10

David kpe àhùa cucugbã tɔ̀a

1Hùenu vi ɖe yomè a, Amɔ̀ntɔwo be èfìɔ ku, eye èvia Hanun ɖù èfìɔ ɖo e tèpe. 2David gblɔ̃ be: “Mù la wɔ̀ àdɔ̀mè nyuɛ̃ na Hanun, sìgbè lekè ètɔa, Nahas wɔ̀ àdɔ̀mè nyuɛ̃ na ènyè ŋutɔa nène.” Ekèa ŋuti, David dɔ̃ yebe èdùdɔnunɔ̀tɔ ɖewo ɖoɖa, ne woa yì fa àkɔ na Hanun, ɖo ètɔa Nahas be èku ŋuti. Ekè èdùdɔnunɔ̀tɔawo va ɖo Amɔ̀ntɔwo be èdùa mèa, 3Amɔ̀ntɔwo be èfìɔviwo gblɔ̃ na woa àpetɔ Hanun be: “Wò susu be bùbu kpò David jro be yèa do ètɔ wò ŋuti, ye be dɔ̃ yebe èdùdɔnunɔ̀tɔawo ɖoɖa wò, be wo ne va fa àkɔ na wòa? Mu nyi ɖe ye wo va, la bè kpɔ èdùa mè bòhũ, ne David bèa va xɔ̀ èdùa gbè ɖèka ŋuti ye be dɔ̃ yebe èdùdɔnunɔ̀tɔwo ɖoɖa wò ɖoa?” 4Ekèa ŋutia, Hanun na, wo le David be èdùdɔnunɔ̀tɔawo, wo lũ woabe ègɛ̃ be mamã mè, wo sò woabe àwùwo lè dòdò mè kaka va ègbĩ nu, eye wo trɔ wo ɖoɖa David. 5Ekè David sè ènu kè jɔ̀ a, e dɔ̃ àmè yì dogò èdùdɔnunɔ̀tɔawo, ɖoa, wo do ŋùkpɛ̃ ŋusù kèawo ŋutɔ. Èfìɔa na, wo gblɔ̃ na wo be: “Mì ci Yerikò, kaka na wàlɛbɛ kè mìabe ègɛ̃awo la gbà toa. Ne wo to vɔ̀a, mìa trɔ gbɔ̀.”

6Ekè Amɔ̀ntɔwo kpɔ be yèwo trɔ zũ David be èkɛ̃tɔwoa, wo dɔ̃ àmè ɖoɖa Aràmtɔ kèwo ye lè Bɛt-Rehob ku Aràmtɔ kèwo ye lè Sobaawo, gbãdãgbã àfɔ̀-zɔ̃tɔ hotu èwo, be wo ne va do àlɔ̀ Amɔ̀n be jìjimèviwo be àhùakɔ̃wo. Maakà be èfìɔa ɖo gbãdãgbã èkà èwì vɔ àtɔ̃ ɖoɖa wo; Tɔb-nyigbãjitɔwo ɖo gbãdãgbã hotu àdɛ̃ ɖoɖa wo. 7Ekè David sè èa, e ɖo àhùaga Yoab ku Izràɛl be gbãdãgbã kãlìwo keŋu ɖoɖa àhùagbea ji. 8Amɔ̀n be jìjimèviwo yì ɖo woabe àhùakɔ̃wo ɖo woabe èdùgãa be àgboa nu. Aràmtɔ kèwo so Sobàa ku ekèwo ye so Rehob, Tɔbtɔwo kudo Maakatɔwo ya, wo ɖo ɖo àfi bu lè àhùagbea ji. 9Ekè Yoab kpɔ be yè ɖo la kpã ŋùkɔ̀ gbãdãgbã ɖewo lè ŋùkɔ̀, la gbà kpã ŋùkɔ̀ èbuwo lè ŋùgbea, e gbà cã àmè lè Izràɛlviwo be gbãdãgbã kãlìwo keŋu dòmè, eye be ɖo wo, kpã ŋùkɔ̀ Aràmtɔwo. 10Yoab sɔ àhùakɔ̃a mènɔ̀tɔ kpɔ̀tɛawo do àsi na nɔ̀via Abisai, eye be ɖo gbãdãgbãwo ɖo èkà ɖèka nu, kpã ŋùkɔ̀ Amɔ̀n be jìjimèviwo. 11Ekèa yomè a, e gblɔ̃ na nɔ̀via be: “Ne Aràmtɔwo sɛ̃ŋu wu àhùakɔ̃ nyèa, wò la kplɔ̀ tɔ̀ wòa va do mù àlɔ̀. Nène a kea, ne Amɔ̀n be àhùakɔ̃a ye sɛ̃ŋu wù àhùakɔ̃ wòa, nyè cã mù la kplɔ̀ tɔ̀ nyèa va do wò àlɔ̀. 12Àdìka mu gbà sò wò ò. Mia wɔ̀ àhùa kãlìwɔ̀tɔ̀, na miabe dùkɔ̃a, miabe Mawu be èdùwo. Tɔhonɔ̀ ŋutɔ la wɔ̀ ènu kè ye jè na ɛ̀a.” 13Ekè Yoab zɔ̃ ku yebe àhùakɔ̃a ɖo Aràmtɔwo jia, Aràmtɔwo si lè woa nu, jo. 14Ekè Amɔ̀n be jìjimèviwo kpɔ be Aràmviwo le sia, woawo cã, wo si lè Abisai nu, ɖo woabe èdùa mè. Ekè Yoab trɔ so àhùa ku Amɔ̀n be jìjimèviwo be ègbea jia, e yì Yèruzàlɛm.

15Ekè Aràmtɔwo kpɔ be Izràɛlviwo ɖù yèwo jia, wo yɔ woabe àhùakɔ̃wo keŋu bɔ̀. 16Èfìɔ Hadadɛzɛr dɔ̃ àmè ɖoɖa, ne Aràmtɔ kèwo ye lè Efratà be ètɔ̀a godoa, woa sɔ̀gbè. Gbãdãgbã kèawo sɔ̀gbè, eye wo va ɖo Helam-dùa mè. Hadadɛzɛr be àhùaŋùkɔ̀nɔ̀tɔ Sobak ye nɔ̀ ŋùkɔ̀ na wo. 17Ekè wo gblɔ̃ ɛ̀ na David, e bɔ̀ Izràɛlviwo be àhùakɔ̃wo keŋu, eye be sò Yɔrdàn be ètɔ̀a ku wo, va ɖo Helam. Aràmtɔwo ɖo, kpã ŋùkɔ̀ David, eye wo kpe àhùa ku David. 18Vɔ̀a, Aràmtɔwo si lè Izràɛlviwo be ŋùkɔ̀. David ku Izràɛlviwo be àhùakɔ̃a wù àmè kèwo ye lè Aràmtɔwo be àhùakèkevi àlɔ̀ adrɛ̃ kèwo wo gbãa mè. Wo gbà wù èsɔdotɔ hotu èwì. Àhùaga Sobak jè àfɔ̀ku, eye be ku lè funua. 19Ekè èfìɔ kèwo keŋu lè Hadadɛzɛr gɔ̃mèawo kpɔ be Izràɛlviwo ɖù yèwo jia, wo wɔ̀ ŋuti fàfa jèsi ku Izràɛlviwo, eye wo bɔ̀bɔ̀ woa ɖokoe ɖo Izràɛlviwo gɔ̃mè. Eye Aràmtɔwo vɔ̃ be yèwoa gbà yì xɔ̀ na Amɔ̀nviwo ke.

Currently Selected:

2Samuɛl 10: GEN

Highlight

Copy

Compare