2Samuɛl 1
1
David sè Saolò be èku
1Saolò ku vɔ̀, gbɔ̀xue David trɔ gbɔ̀ va Siklag, ekè be ɖù Àmàlɛktɔwo ji vɔ̀a. David nɔ̀ èdùa mè ŋùkèkè èvè. 2Ŋùkèkè ètɔ̃gɔ̃a gbèa, ɖèkajɛ ɖe so Saolò be àsàɖaa mè va. Yebe àwùwo vũvũ lè e ŋuti eye, àle nana be èkɔ ɖɔ èta mè na ɛ̀. Vɔ̀a, kè be ɖo David gbɔa, e cɔ̃ ŋùmè ànyi, eye be jè èɖɛ̀ na David.
3David biɔ ɛ̀ sè be: “Fikɛ ye wò so ò?” E ɖo e ŋuti be: “Mù si so Izràɛlviwo be àsàɖa mè.” 4David gbà biɔ ɛ̀ sè be: “Nukɛ ye jɔ̀ ò? Gblɔ̃ ɛ̀ na mù.” E ɖo e ŋuti be: “Wo wù Izràɛlviwo be gbãdãgbã sùgbɔ, eye Izràɛlviwo be àhùakɔ̃a si lè àhùa gbea ji. Wo wù Saolò ku èvia Yonatàn ŋutɔ cã.” 5David gbà biɔ ɖèkajɛ a be: “Leke wɔ̀ ye wò nya be Saolò ku èvia Yonatàn ku ò?” 6Ɖèkajɛ a ɖo e ŋuti be: “E va va e mè be mù lè Gilbòa be ètoa ji. Mù kpɔ Saolò zìɔ̃ ɖo yebe èhuã ŋuti. Wàlɛbɛ ŋua, miabe kɛ̃tɔwo be àhùa kèkewo ku èsɔdotɔwo xa ɛ̀ vɔ̀. 7Kè Saolò ɖè èkɔ̀a, e kpɔ mù, eye be yɔ mù. Mù tɔ̀ be: “Àgo, èfìɔ bùbùtɔ!” 8E biɔ mù be: “Àmè kɛ ye wò nyi ò?” Mù ɖo e ŋuti na ɛ̀ be: “Àmàlɛktɔ ye mù nyi.” 9E gblɔ̃ na mù be: “Dɔ̃ va gbɔ nyè, ne wòa wù mù, ɖo, to e gbɔ be gbɔ̃gbɔ̃ gbà lè ŋuti nyè nyuɛ̃ ɖe cã a, mu le wɔ̀ na mù nyuɛ̃ ɖe ò.” 10Mù dɔ̃ gogo è, eye mù wù ì, ɖoa, mù kpɔ be, ekè àhùaa gble do èa, mu gbà la nɔ̀ àgbè dìdi ɖe ò. Eye mù ɖè yebe fìɔkukua ku yebe àlɔ̀gàa, be ma sɔ va na wò, àpetɔ nyè bùbùtɔ.”
11David do àlɔ̀ yebe àwùwo mè, eye be zɛ̃ wo. Yebe ŋutimewo cã zɛ̃ woa tɔ̀wo. 12Wo làmɔɛ̃, wo bla ènu kaka èzã do, sɔ wɔ̀ ècɔ na Saolò, na èvia Yonatàn ku Tɔhonɔ̀ be àhùakɔ̃ kudo Izràɛl be àxomètɔ kèwo ye ku lè èwui nua. 13David biɔ ɖèkajɛ kè hɛ̃ àŋɛ̀ a vaa be: “Fikɛ ye wò so ò?” Ɖèkajɛ a ɖo e ŋuti be: “Àmàlɛk ŋusù ɖe kè va ci èdù kèa mèa be èvi ye mù nyi.” 14David do àpa gblɔ̃ be: “Eye wò mu vɔ̃ ŋutɔ cã ò! Wò ɖè àlɔ̀, sɔ wù èfìɔ kè Tɔhonɔ̀ ŋutɔ do àmì èta na a!” 15David yɔ yebe ŋutimeawo dòmètɔ ɖèka, eye be gblɔ̃ na ɛ̀ be: “Yì, ne wòa wù ì!” David be sumɔ̃via wù ɖèkajɛ àŋɛ̀dotɔa. 16David gblɔ̃ na ɛ̀ be: “Àpo èhũ ne nɔ̀ wò ŋutɔ èta wò ji, ɖoa, wò gblehùɛ do ɖokoe wò, wàlɛbɛ kè wo gblɔ̃ be: “Ènyè ye wù Tɔhonɔ̀ be àmèsìamìnaa.”
David jì àlenana be èhà
17Eye David kpà àlena-hà kèa ɖo Saolò ku Yonatàn be èku ŋuti. 18E ɖè ègbè be wo ne fiɔ Yudà-nyigbã ji tɔwo. E ɖo nyikɔ na ɛ̀ be: “Àŋùdàti be àvi-hà”. Kpɔɖa, àlekea ye wo ŋlɔ̀ ɛ̀ ɖo “Àmè jɔ̀jɔɛ be xoma a” mèa ye nyi ekèa:
19Oò, Izràɛl! Nukɛ ŋuti gbãdãgbã wò kãlìsuwo ku ɖo ò?
Àpo gogo be àhùawɔ̀tɔwo ci ètokɔ̃ɛwo tamè!
20Mì mu gbà kãkã ènyà kèa lè Gat be èdù mè ò,
eye mì mu gbà gblɔ̃ ɛ̀ pòxla, lè Àskalɔ̀n be èmɔwo dòmè ò!
Ekèa la va do jìjɔɛ na Filistì be nyɔ̃nùwo,
eye àgbàlè kèawo be tùgbɛ̀jɛviwo la nɔ gli ku gogo!
21Mì, Gilbòa be ètowo,
èji mu gbà jà ɖo mìa ji ke ò,
eye gbawɛ mu gbà wu mì ke ò,
àleke be àmè ɖe mu gbà kpɔ àgblè do àmà cɔ̃ mìa ji ɖe ò!
Ɖoa, funua ye wo ɖìgbɔ kãlìsuwo be àkpoxɔ̀nuwo lè.
Saolò be àkpoxɔ̀nu kè wo mu la gbà sì àmì na ò a.
22Lè kɛ̃tɔwo be èhũ be ŋùkɔ̀a,
lè kãlì jɔ̀ àsu, gìdìgãwo be ŋùkɔ̀a,
Yonatàn be àŋùdàti mu tètènà yì ŋùgbe ò;
eye Saolò be èwui mu gbɔ̀nà puplu, àmè mà crɔ̃ ò.
23Saolò ku Yonatàn,
lɔ̃lɔ̃tɔ kèwo dòmè èsì mu tona, lè àgbè mè ò a,
èsì mu to woa dòmè, lè èku mè cã ò.
Woawo kèwo be èsɔwo, èhɔ̃ cã mu teŋu xena ò,
woawo kè wɔ̀nà kãlì wu jãŋùtaa!
24Mìa Izràɛl nyɔ̃nùwo, mì fã Saolò,
kè dona àwù xɔ̀asìwo na mì, eye be ɖona àcɔ na mìa,
Saolò kè sɔna sìkanuwo jrànà mìabe àwùdodowo ɖoa.
25Oò! Kãlìsuawo ku lè àhùa gbea ji!
Oò, Yonatàn jè ànyi lè ètokɔ̃ɛawo ji!
26Tɔ̀ wòa le ve mù loò, nɔ̀vi nyè Yonatàn!
Èwò kè mù lɔ̃ kakaa!
Èwò kè be lɔ̃lɔ̃ nyi ŋùdãnua!
Èwò kè be lɔ̃lɔ̃ jènà ŋùmè na mù wu nyɔ̃nùwo tɔ̀a!
27Kãlìsuwo ci àhùa!
Eye àhùawɔ̀nuawo cã crɔ̃ gbidii!
Currently Selected:
2Samuɛl 1: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.
