2Màkàbeòwo 9
9
Ãtiokus Èpìfan le èdɔ̀ veve ɖe
(1Mak 6.1-17; 2Mak 1.11-17)
1Lè hùe ŋua nu lɔ̀ge a, Ãtiokus sɔ ŋùkpɛ̃ gbɔ̀ so Pɛrsìa be nutowo mè. 2E ɖo èdù kè wo yɔna be Pɛ̀rsèpolìs a mè. E jè àgbàgba be yè a ɖo àlɔ̀ èdù a ji, ne yè a hlà ènu kèwo lè vòduxɔ̀ ɖe mè a. Vɔ̀ a, èdù a mètɔwo sitè, wɔ̀ àhùa ku ì. Kè èdù a mètɔwo nyà Ãtiokus ɖo èdù nu a, e si ku ŋùkpɛ̃ gã ɖe. 3Kè be va ɖo Ɛ̀kbàtan gbɔ a, e sè ènu kè jɔ̀ ɖo Nìkàmɔr ji, jɔ̀ ɖo Tìmòteò ku yebe àhùakɔ̃wo ji a. 4Lè yebe àdɔ̀mèze mè a, e ɖo è be Yudàtɔwo la tu ŋùkpɛ̃ kè Pɛrsìatɔwo do yè, wàlɛbɛ kè wo nyà yè a be èfɛ̃. E ɖè ègbè na àmè kè le kù yebe àhùa-kèkevi a be ne yì ŋùkɔ̀, ètè mà-tɔ, kaka na èmɔ̃zɔ̃zɔ̃ a be ènùwuwu. E sɔ jajra do àpa be: “Ne mù ɖo Yèruzàlɛ̀m be èdù a mè a, mù na èdù a la trɔ yɔ̀do ɖèka, eye mù la wù Yudàtɔwo keŋu ɖo e mè!”
Vɔ̀ a, mù nyã be Mawu be kòjoɖoɖo le nɔ̀tè kpɔ yè ò. 5Kè be gbe gblɔ̃ ènyà a vɔ̀ kpò a, Tɔhonɔ̀ kè kpɔna ènu sia ènu a, Izràɛl be Mawu a, do è, èdɔ̀ ɖe kè àmè ɖe mu la teŋu kpɔ, ne wo a dà ɛ̀ ò a. Èfìɔ a sè veve sɛ̃sɛ̃ ɖe, lè àdɔ̀ mè, eye be le fiɔ̃ yebe àdɔ̀kàviwo kpò. 6Ènu kè a jè na ɛ̀, e ye kè nyi àmè kè dona àyà sùgbɔ vòvòvò nyràhũwo na àgbètɔ buwo a. 7Gãke a, èdɔ̀ kè a mu ɖè yebe jajra a kpɔ̀tɔ̀ ò; yebe ègbè dà àmè a gbà lè ènu na ɛ̀. Àdɔ̀mèze kè be le do do Yudàtɔwo a na be e ɖè ègbè be àhùakèkèvi a ne pudù wu nène a. Zè ɖèka kpò a, e gɛ̃ lè àhùakèkèvi kè le pudù sɛ̃sɛ̃ ɖe a ji. Leke be gɛ̃ sɛ̃sɛ̃ ɖe ɖo a, na be, yebe àta ku àbɔ̀wo ŋɛ̃ keŋu.
8Ŋusù kè ɖɔ ku jajra gã ɖe, hùenu vi ɖe kpò va yì a, ŋusù kè susu be yè wu àmèwo keŋu, eye yè teŋu ɖè ègbè na àpù be àsrɔ̀kewo a, ŋusù kè susu be yè teŋu dà èto kèwo yì èji wu a, ne yèa kpɔ woabe kpɛ̃kpɛ̃mèa, ŋusù ŋua ye jè ŋɛ̀sì ɖo ànyigbã fifìa ŋua, eye àba ji ye wo kɔkɔ ɛ̀ ɖo! Ekè a nyi Mawu be Ŋusɛ̃kpatatɔ nyinyi be jèsì, kpɔ ku ŋùku, na àmè sia àmè. 9Èfìɔ vlo kèa gbà kpɔ̀tɔ̀ lè àgbè, vɔ̀a, e le sè veve ŋutɔ. Yebe ŋuti-lã le flì, eye be le gɛ̃ jo lè e ŋuti. Èŋɔ̃viwo le ɖù ì, eye wo le hùã lè ŋùkuviwo mè na ɛ̀. Yebe àmèti kè le nyìnyɔ̃ a be hɔ̃hɔ̃ɛ le tɔ èjì gbɔ na àhùakɔ̃ blibo a. 10Zãa ɖe kpò va yì a, e susu be yè la teŋu sɔ àlɔ̀ tɔ wètriviwo, lè jiŋùkusi. Fifì a, àmè ɖekpe mu lɔ̃ le gogo è, ne wo a kɔkɔ ɛ̀ ò, ɖo a, e le hɔ̃ɛ, eye be le nyɔ̃ŋu.
11Kè Ãtiokus gbã keŋu-keŋu leke a, eye kè Mawu be èba va le sù ì a, yebe vevesèse kaɖi-kaɖi a le yì e ji. Fifì gbɔ̀xue yebe ègbè dà àmè gã a, va le ɖiɖi, eye be va le kpɔ ènu kè ŋutɔ le jɔ̀ ɖo e ji a jèsì. 12Wàlɛbɛ kè mu gbà teŋu va le kpe leke ye ŋutɔ be hɔ̃hɔ̃ɛ a le tɔ èjì gbɔ na ɛ̀ a ji ò a, e gblɔ̃ be: “E jè be àgbètɔ kè nyi ènu kuku sìgbè ènyè nène a, ne bɔ̀bɔ̀ ye ɖokoe na Mawu, eye mù ɖo la susu be yè sɔ̀ ku Mawu ò.” 13Àmè ɖìgbɔ kè a cã va le fãkùe na Tɔhonɔ̀ kè mu la gbà teŋu ku ŋuzĩzĩ na ɛ̀ ò a. E le gblɔ̃ be: 14“Mù ɖè èbla le yì Yèruzàlɛ̀m, èdù kɔ̀kɔ̀ɛ a mè, ne ma gbã ɛ̀ hanyãhanyã, ne ma sɔ wɔ̀ yɔ̀do ɖèka kè mè, mù la ɖì èdù a mètɔwo keŋu ɖo a. Fifì a, mù le ɖè è gblɔ̃ be Yèruzàlɛ̀m nyi èdù kè vò a. 15Mù ɖo è be mù la sɔ Yudàviwo ku woabe èviwo be àmèkpòtiwo dà ŋùgbe ɖoɖa ègbemè-lã wɔ̀ àdãwo ku èxè kèwo ɖùnà èlãawo, ɖo a, mù kpɔ be wo mu jè ne wo a ɖì wo ò. So egbè ji a, mù jro be wo ne ɖo jèna kèwo Àtɛn be èdù mètɔwo ɖo a ke. 16Sã a, mù va hlà ènuwo jo lè Mawuxɔ̀ Kɔ̀kɔ̀ɛ a mè. Fifì a, mù la sɔ ènunana kèwo nyã kpɔkpɔ wu a ɖo àcɔ na ɛ̀, eye mù la sɔ ènu kɔ̀kɔ̀ɛ kèwo sùgbɔ wu kèwo mi fɔ̀ joawo gbìgbɔ̀ và ɖo woa tèpe. Mù la ɖè ègà lè nyè ŋutɔ àpe ègo mè, la sɔ kpɔ vɔsawo be zãzãwo gbɔ. 17Sɔ kpe è a, mù la sɔ Yudàtɔwo be xɔ̀sè a wɔ̀ tɔ̀nyè, eye mù la ɖìsà, to àgo kèwo keŋu ji àgbètɔwo lè a, eye mù la nɔ ɖè Mawu be ŋusɛ̃ a gblɔ̃.”
Ãtiokus Èpìfanò ŋlɔ̃ xoma ɖoɖa Yudàtɔwo.
18E gblɔ̃ ènyà kèawo kpata gãke a, Ãtiokus be vevesèsèawo mu kã ɖo e mè ò, ɖo a, Mawu be jɔ̀jɔ̀ɛ sòsò a lè e ji, sìgbè leke be jè na ɛ̀ a nène. Kè èjìdo le vɔ̀ na èfìɔ a, so yebe nɔ̀nɔmè ŋuti a, e ŋlɔ̃ xoma ɖoɖa Yudàtɔwo, sɔ le ɖè kuku na wo be:
19“Èfìɔ Ãtiokus, àhùakɔ̃ a be àhùàgbèɖètɔ gã a, le do èbgè na yebe èdùmèvi lɔ̃lɔ̃tɔ Yudàtɔwo, so kaka èjì mè ke. E le ji jɔ̀gbènyuɛ̃ ku lãmèsɛ̃ na wo!
20Ne mìa ku mìabe èviwo, mì fɔ̃ nyuɛ̃ ɖe, eye ènuwo le zɔ̃ na mì, sìgbè leke mì jro a nène a, mù le do àkpe gã ɖe na Mawu kè mè, mù sɔ àpe èjìdo ɖo a. 21Lɔ̃lɔ̃ ye mù sɔ le ɖoŋù mì, wàlɛbɛ kè mù le susu bùbu kè mì dona ŋuti nyè, ku àdɔ̀mènyuɛ̃ kè mì wɔ̀nà na mù a.
Kè mù trɔ gbɔ̀ so Pɛrsìa a, mù jè èdɔ̀ veve ɖe, eye kè mù gbɔjɔ a, mù ci àba ji. Ekè a ŋuti mù kpɔ be e lè veve ɖe, be ma bù àpe èdù mèviwo kpata be àgbènɔ̀nɔ lè vòvo, ku ŋutifafa mè ŋuti. 22Nyàwo ye be nyi be èjì mu ɖè lè pò na mù, be mù la gbà xaya ò. Vɔ̀ bòhũ a, èmɔ̃ kpɔkpɔ lè. 23Vɔ̀ a, mù ɖoŋù be ètɔ nyè ŋutɔ cã àmè kè la ɖùfìɔ, lè e yomè a ɖɛ, wàlɛbɛ kè be yì àhùàgbè ji lè Èvègo be Èdùwo mè a. 24E wɔ̀ ekè a, àleke be èdù mèviwo mu gbà vɔ̃, ne ènyà vuɛ̃ ɖe va jɔ̀, àlo, wo va do àŋɛ̀ vuɛ̃ na wo ò. Ne e va nyi nène a, àmè sia àmè la nyã àmè kè èfìɔ a sɔ èdù a be ènyàwo do àsi na a. 25Sɔ yì e ji a, mù kpɔ be èdù kèwo trɔ ɖo àpe èfìɔɖùpe a be èfìɔwo le ɖia hùenu kè la dɔ̃ woa ji a, ne wo a zrò jè e ji. wo le nɔ̀tè kpɔ ènu kè la jɔ̀ ɖo ji nyè a. Ekè a ŋuti mù cã èvi nyè Ãtiokus, be ne ɖùfìɔ, lè yo nyè mè. Mù sɔ ɛ̀ fiɔ mìa dòmètɔ sùgbɔ, eye mù sɔ ɛ̀ do àsi na mì, wàlɛbɛ kèwo mù ɖo la yì Èvego be Èdu a be àgowo ji a. Mù le sɔ xoma kè mù ŋlɔ̃ na ɛ̀ a le kpe ɖo ekè a ŋuti.
26“Ènu kè mù le biɔ veve ɖe, so mìa si a ye nyi ekè a: Mì ɖoŋù ènyùɛ̃ kè mù wɔ̀ na mìabe dùkɔ̃ a ku kè mù wɔ̀ na mìa dòmètɔ ɖe sia ɖe a, ne mìa kpata, mì a le ènyùɛ̃ jina àmè kè mì ɖo na nyè ku èvi nyè a ɖo àsi veve ɖe. 27Mù kã ɖo e ji ŋutɔ cã be e la le susu nyèwo ɖo àsi, eye be la nɔ wɔ̀ ènyùɛ̃ ku àmènu na mì; nène a ke a, mù kã ɖo e ji be mìa ku ì, mì la sè mìa nɔ̀nɔɛwo gɔ̃mè.”
28Leke a, àmèwùtɔ kè a, kè kònà Mawu a be àgbè a wu e nu, lè vevesèse kèwo sɛ̃ŋu, sìgbè vevesèse kèwo ye ŋutɔ do na àmè buwo a nène. E ku àmè vlo kè ɖìgbɔ wu a be èku, lè àmèjrowo de, lè ètowo tamè. 29Fìlipò, kè wo hɛ̃ ku èfìɔa, so vifɛ̃mè ke a, kɔ yebe àmèkpòti a gbɔ̀, va Ãtiokìa. Vɔ̀a, ke be le hɛ̃ àye na Ãtiokus be èvia, e jo yì Ejiptè, le èfìɔ Tòlèmeò Fìlòmètor gbɔ.
Currently Selected:
2Màkàbeòwo 9: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.