2Màkàbeòwo 10
10
Mawuxɔ̀ a be ŋutikɔ̀kɔ
(1Mak 4.36-61)
1Tɔhonɔ̀ ŋutɔ kplɔ̀ Yudà Màkàbeò ku yebe ŋutimèwo, wo gbìgbɔ̀ xɔ̀ Kɔ̀kɔ̀ɛpe a ku Yèruzàlɛ̀m be èdù a. 2E gbã vɔsakpe kèwo àmèjrowo tù ɖo èdùgbo nu ku sɛ̃sɛ̃pewo a. 3Wo kɔ̀ mawuxɔ̀ a ŋuti, eye wo gbìgbɔ̀ tù vɔsakpe bu. Wo sɔ èzòkpe, klɛ̃ èzò, sɔ dozò ɖo vɔsakpea ji, eye wo gbà savɔ cucugbã a, so kaka èpè èvè be àsiɖotè yomè. Wo tɔzò lifĩ, sũ kãligbɛ̃awo, sɔ vɔsa be kpɔ̃nɔawo ɖo Tɔhonɔ̀ be ŋùmè. 4Kè wo wɔ̀ èkɔ̀nu kèawo vɔ̀ a, wo cɔ̃ ŋùmè ànyi, fãkue na Tɔhonɔ̀ be mu gbà na yèwo jɔ̀gbèvuɛ̃ kèawo ke ò. Wo fã yɔ Tɔhonɔ̀ be, ne e gbà va jɔ̀ be yèwo gbà jè àgɔ̀ do è kea, ne gbɔ̃ èjì ɖɛ blɛ̀wù, ne bèa dɔ̃ èto na yèwo, mu gbà sɔ yèwo do àsi na vòdu sumɔ̃tɔ, èhlɔ̃dãtɔ kèwo kònà Tɔhonɔ̀-a ke ò.
5Àzã kè gbè tututu àmèjrowo va dovlo Mawuxɔ̀ a lè wètri Kìslɛv be ŋùkèkè wìvɔàtɔ̃gɔ̃ a gbè a ke ye wo va le kɔ̀ e ŋuti. 6Wo sɔ jìjɔ̀ɛ ɖù àzã ŋùkèkè ènyi, sìgbè leke wo ɖùnà Gòxɔ̀wo be Àzã a nène. Yudà ku yebe ŋutimèwo ɖoŋù be, mu dìdì ò a, wo ɖù Gòxɔ̀wo be Àzã a lè èto tamè, wàlɛbɛ kè wo le bè ɖo àkpã-dowo mè, sìgbè ègbemè-lãwo nène a. 7Ye ŋuti wo le àti be àlɔ̀zɛ̃ mumuwo, àmìti màkpawo, ku èdekpawo ɖo àsi, wo le jì kafuhàwo ɖoɖa àmè kè na, wo teŋù kɔ̀ yebe tèpe kɔ̀kɔ̀ɛ a ŋuti a. 8Wo ɖo è, dà àkɔ̀, sɔ dà àsi ɖo e ji, lè bɔ̀bɔ, be: “E nyi ɖoɖo na Yudàtɔwo kpata be wo la nɔ ɖù àzã kè a, èpè sia èpè.”
9Ekèawo ye nyi ènu kèwo jɔ̀, lè èfìɔ Ãtiokus kè wo yɔna be Èpìfanò a be ŋùgbe tɔtrɔ mè. 10Fifì a, mi la pò nupo so Ãtiokus Epatɔr, Mawu be èkɛ̃tɔ ŋua be èvi a ŋuti. Àhovì kèwo be sɔ yebe àhùa wɔ̀wɔ hɛ̃ va a be ènyà kpò mi la gblɔ̃ kpòe ɖe. 11Kè be gbe ɖùfɩ̀ɔ kpò a, Epatɔr cã ŋusù ɖe kè wo yɔna be Lisìa a, sìgbè cãmì cucugbãa nène, eye be la nɔ kpɔ Sèlèsiria ku Foenikè ji. 12Yebe èdɔ gbà le nyi be ne nɔ̀ Tòlòmeò kè wo gbà yɔna be Makrɔn, àlo, 'Èta Lɔ̀bɔ̀' a tèpe. Àmè kè a ye nyi èdùjiɖùtɔ cucugbã kè kplɔ̀ Yudàviwo lè jɔ̀jɔ̀ɛwɔ̀wɔ mè, lè àyàdùɖu kè wo do na wo a keŋu yomè. E jè àgbàgba, nɔ̀ ŋitifafa be èkàdodo nyuɛ̃ mè ku wo. 13Ekè a ŋuti a, Èfìɔ be Èxlɔ̃wo va gblɔ̃ na Epatɔr be e nyi èdùsàtɔ. Wo sɔ ènyà ɖo e ŋuti, zè sùgbɔ xoxo, be e nyi àmèsàtɔ. Ejiptè be èfìɔ Fìlòmetɔr sɔ Kiprò be àpùdòmèkɔɛ̃ a do àsi na ɛ̀ sã, vɔ̀a, e gble àpùdòmèkɔɛ̃ kè a ɖɛ, jo yì ci Ãtiokus Èpìfanò ji. Kè mu la gbà teŋu na wo a do èdɔ kè be wɔ̀nà a be bùbu e ŋuti òa, e nù àtikè, sɔ wù ye ɖokoe.
Yudà ɖè àhùa kpe na Idumè be èdù a be àgbògbò a.
(1Mak 5.1-18)
14Kè Gorjìas trɔ zũ Idùme be èdùjiɖùtɔ a, e xɔ̀ àgbãtè gbàdagbãwo, eye ne e gbe kpɔ èmɔ̃ nu kpò a, e ɖènà àhùa kpena na Yudàtɔwo. 15Ìdùmètɔ kèwo xɔ̀ àgbògbòwo na woa ɖokoe, lè tèpe kè wo mu la teŋu ɖù woa ji lè bɔ̀bɔ̀ɛ ɖe ò a, dona nupo na Yudàtɔwo. Wo xɔ̀nà àmè kèwo wo nyà so Yèruzàlɛ̀m-a, eye wo wɔ̀nà ènu kè wo la teŋu a, ne àhùa ne jɔ̀.
16Yudà Màkàbeò ku yebe ŋutimèwo fãnà kùe na Mawu, sɔ biɔna ɛ̀ be ne nɔ̀ ku yèwo. Ekè a yomèa, wo jè èmɔ̃, la yì ɖè àhùa kpe na Ìdumètɔwo be àgbògbàwo. 17Wo kpe àkɔ sɛ̃sɛ̃ ɖe ŋutɔ ku àmè kèwo lè àgbògbòawo mèa, nyà àmè kèwo le hlùɛ̃ èglìkpawo a kpata ɖo èdù nu, eye wo xɔ̀ tèpeawo do èse. Wo wù àmè kèwo kpata woabe àlɔ̀ gbe klɛ̃ kpò a hànyã-hànyã. Gbàdagbã kèwo wo crɔ̃awo kpata mu hùe wu àgbètɔ hotu èwo (20000) ò.
18Gãke a, àmè sìgbè gbàdagbã hotu ènɛ̀ èkàwìvɔàtɔ̃ (9000) tètè gbà teŋu si, yì bè ɖo àgbògbò èvè ɖe kèwo trì àkɔ ŋutɔ, kèwo mè ènu sia ènu lè, la sɔ nɔ̀ àhùakɔ̃ ɖekpekpe kè la va zĩ woa ji a nu. 19Màkàbeò gble Simɔ̀n ku Yozɛf kudo Zàkeò kèwo ŋuti àhùakɔ̃ kè be gbàdagbãwo be hɛ̃hlɛ̃mè sù, la yì àgbògbòawo ji zĩzĩ be èdɔ a ji a ɖɛ. Ye ŋutɔ jo yì àfi kè wo hiã ɛ̀ lè, na àhùa a. 20Vɔ a Simɔ̀n be gbàdagbã kèwo lɔ̃nà ègà a, ɖè àsi lè woa ɖokoewo ŋuti, eye èkɛ̃tɔwo plè wo: wo lɔ̃, xɔ̀ drahmà hotu ègbãvɔàtɔ̃ (70000), eye wo ɖè àsi lè èkɛ̃tɔwo ŋuti, wo si jo. 21Kè Yudà sè ènyà kè a, e bɔ̀ àhùakɔ̃wo be ŋùkɔ̀nɔ̀tɔwo, eye be sɔ ènyà ɖo àmè kèwo jè àgɔ̀ kè a ŋuti be wo sà woa nɔ̀viwo: wo xɔ̀ ègà, ɖè àsi lè èkɛ̃tɔ kèwo sɔ̀gbè, la va kpe àhùa ku wo a ŋuti. 22Yudà na wo wù àmè sàtɔ kèawo, eye, e yomè, zè ɖèka a, e ɖo àsi àgbògbò èvè kèawo ji. 23E ɖùnà ji lè àhùa kèwo kpata be wɔ̀nàwo mè, ekè a na be e crɔ̃ àgbètɔ kè sùgbɔ wu hotu èwoa (20000), lè àgbògbò èvè kèawo mè.
Yudà kpɔ èjiɖùɖu gã ɖe lè Gèzɛr
24Tìmòteò kè ji Yudàtɔwo ɖù sã va yì a, xɔ̀ èdù bu mètɔwo be gbàdagbã sùgbɔ, eye be na èsɔdotɔ gbogbo ɖe so Azìa va. E yomè a, e kplɔ̀ yebe àhùakɔ̃ a, jè èmɔ̃, be yè a yì ɖo àlɔ̀ Yudà-nyigbã a ji. 25Wàlɛbɛ kè wo gbãnà a, Yudà Màkàbeò ku yebe àhùakɔ̃ a blìbɔ̀ na Tɔhonɔ̀. Wo tà èfùlòlo be kòtòku, eye wo lè kɔ̀ èkɔ ɖo èta. 26Wo do ènu gũ, le cɔ̃ ŋùmè ànyi, lè vɔsakpe a gbɔ, sɔ le blìbɔ̀ na Mawu be ne wɔ̀ àdɔ̀mè nyuɛ̃ na yèwo, ne be a nyi yèwo be “kɛ̃tɔwo be kɛ̃tɔ, ne be a kpà ŋùkɔ̀ àmè kèwo kpà ŋùkɔ̀ yèwo a”, sìgbè leke ye ŋutɔ fìã àjɔ̀gbè lè yebe èse a mè a nène
27Kè wo fãkùe a vɔ̀a, wo sɔ woabe àhùawɔ̀nuwo, to lè Yèruzàlɛ̀m be èdùa mè. Wo zɔ̃ yì dìdipe na èdù a. Kè wo gogo kɛ̃tɔ a, wo nòtè. 28Kè èŋù gbe kè kpò a, àhùakɔ̃ èvèawo kpe àkɔ. Ne wo a teŋu ɖùji a, Yudàtɔwo kã ɖo woabe kàlĩ wɔ̀wɔ ji, gãkea, Tɔhonɔ̀ ŋuti bòhũ, ye wo ɖoŋù ɖo. Tɔhonɔ̀ ŋuti ye woabe jìdo lè. Àmè kpɔ̀tɛawo ya a, woabe àdã wɔ̀wɔ, kè wo la sɔ wɔ̀ àvũ a, ji ye wo kã ɖo. 29Wàlɛbɛ kè àhùa a le sɛ̃ŋu a, kɛ̃tɔawo kpɔ èsɔdotɔ àtɔ̃ kèwo le klɛ̃ a, wo le ɖì, so jiŋùkusi. Wo le do èsɔ kèwo wo bla sìka be àkpà na a, eye wo va lè ŋùkɔ̀ na Yudàtɔwo. 30Èsodotɔ kèawo sɔ Yudà ɖo woa dòmètɔ èvè be dòdòmè. Wo sɔ woa ŋutɔwo, woabe àhùawɔ̀nuwo le hlùɛ̃ èta a na ɛ̀, ne Yudà mu gbà jè àfɔ̀ku ɖekpe ò. Wo le dà èzò kɛ̃klɛ̃wo be bìdà, ɖo èkɛ̃tɔwo ji, àleke be, èzò kèawo le gbã ŋùkuvi na èkɛ̃tɔawo, sìgbè èzò be àŋùti nène, eye vɔ̃vɔ̃ kè le ɖo woa mè a, na be woa kpata, wo le pudù, le kãkã, lè hùnà-hùnyà gã ɖe mè. 31Yudàtɔwo sò èhlò na èkɛ̃tɔwo be gbàdagbã hotu èwo-èkà woèvè takpo (20500) ku èsɔdotɔ èkà woèatɔ̃ (600).
32Tìmòteò ŋutɔ si, yì bè ɖo Gèzɛr be àgbògbò kè Cèreas kpà àcɛ̀ na, eye be nyi àgbògbò ɖe kè wo le ɖia veve ɖe a mè. 33Màkàbeò ku yebe ŋutimèwo zĩ àgbògbò kè a ji, ŋùkèkè ènè, eye wo le kpɔ èmɔ̃ be yèwo la ɖùji. 34Gbàdagbã kèwo ji Yudà ku yebe ŋutimèwwo le zĩ a kã ɖo àfi kè wo lè a ji, be ènu ɖekpe mu la teŋu jɔ̀ ɖo yèwo ji lè funu a ò. Ekè a na be wo le kò Yudàtɔwo be Mawu a, eye wo le zũ àmè kèwo le zĩ woa ji a. 35Kè èzũawo be àdɔ̀mèze bì lè ɖèkajɛ èwì, so Màkàbeò be àhùakɔ̃ a dòmè, be èjì mè, Ŋùkèkè àtɔ̃gɔ̃ a be fɔ̃fɔ̃ mè a, wo so kàlĩtɔ̀, ɖèkpe na àgbògbò a. Wo sɔ àdã bàɖà ɖe, jrò ɖo èkɛ̃tɔawo dòmè, crɔ̃ àmè kèwo kpata ji, woabe àlɔ̀ gbe jè kpò a. 36Àmè buwo cã hɔ̃ nène a ke, trɔ do àgbògbò a, ne wo a kpe àkɔ ku àmè kèwo ye lè e mèawo, to ŋùgbedòmè. Wo tɔ̀zò èmɔ̃jikpɔxɔ̀awo, eye, àmè kèwo kò Mawu awo fiɔ̃ ci èzò a mè. Yudà be gbàdagbã kpɔ̀tɛ buwo gbã àgbòawo, ɖè èmɔ̃ na àhùakɔ̃ kpɔ̀tɛawo, wo ɖo èdù a mè, eye wo ɖo àlɔ̀ èdù a ji kaba. 37Tìmòteò si wla ɖo èsì-do ɖe mè. Kè wo kpɔ ɛ̀ a, wo sò èhlò na ye ku nɔ̀via Kèrea kudo Àpòlòfan.
38Kè wo ɖù àhùa kè a ji vɔ̀ a, wo tɔ kafu-hàwo jìji, sɔ le mlã Tɔhonɔ̀. Wo le do àkpe na Mawu be e wɔ̀ ènyuɛ̃ kèawo na Izràɛlviwo, eye be na, wo ɖùji.
Currently Selected:
2Màkàbeòwo 10: GEN
Highlight
Copy
Compare
Share
Want to have your highlights saved across all your devices? Sign up or sign in
Mina Bible © Bible Society of Togo, 2014.