2Kronikà 3
3
Mawuxɔa be tùtu
(1Èfìɔ 6)
1Salomɔ̀n tɔ Tɔhonɔ̀ be àxuea tùtu lè Yèruzàlɛm, lè Mɔriyà-To kè ji Tɔhonɔ̀ ze na ètɔa David lè, lè tèpe kè ètɔa jràɖo ɖɛ lè Ornàn, Yebusì ŋusùa be èlùfupea. 2E tɔ èxɔ̀a tùtu, lè yebe èfìɔɖùɖu be èpè ènègɔ̃a be wètri èvègɔ̃a be ŋùkèkè èvègɔ̃a gbè.
3Jije kèwo Salomɔ̀n sɔ ɖo Tɔhonɔ̀ be àxuea be tùtu ànyiawo ye nyi ekèawo: dìdimèa la nyi sãa be àbɔglìgo èkàtakpo; kèke mèa la nyi àbɔglìgo èwì. 4Àkpàta kè be dìdi mè sɔ̀ ku àxuea be kèke mèa, ɖo àbɔglìgo èwì, eye yebe èjiyìyi nyi àbɔglìgo èkà ètɔ̃. Salomɔ̀n na, wo tre sìka àdodoe ɖo e mè. 5E na wo tre òɖum-ti ɖo àsaji gãa be èglìwo ŋuti, eye wo sì sìka-mì meme do e ŋuti. E na wo ta ède be àzã ku sepòpo lɔ̃lɔ̃ ɖo woa ŋuti. 6E ɖo èkpe xɔ̀ àsìwo èxɔ̀a mè, sɔ ɖo àcɔ na ɛ̀. Sìkaa nyi Parvayìm-sìka. 7E do sìka èxɔ̀a mè: sɔtiawo ŋuti, hɔ̃truawo ŋuti, èglìawo ŋuti, àgboawo ŋuti, eye wo ta Kèrubimwo ɖo èglìawo ŋuti.
8Eye be wɔ̀ kɔ̀kɔ̀ɛpewo be Kɔ̀kɔ̀ɛpea be èxɔ̀a be dìdi mè ɖo Mawuxɔa be kèkemè ji: àbɔglìgo èwì. Yebe kèke mè nyi àbɔglìgo èwì. E sɔ sìkanu meme kpɛ̃kpɛ̃ mè talɛ̃ŋutò#3.8 Talɛ̃ŋutò nyi ènudàkpe kè be kpɛ̃kpɛ̃ mè nyi kìlo 35. èkà woeàtɔ̃ fã ɖo è. 9Sìka be plɛ̃ŋugoawo be kpɛ̃kpɛ̃ mè lè sekɛ̀l#3.9 Sekɛ̀l: Sekɛ̀l ɖèka be kpɛ̃kpɛ̃ mè lè gramà 11 èkàciwo. Wo fã sìka-mi ɖo èxɔ̀wo mè be èjiwo.
10Lè kɔ̀kɔ̀ɛpewo be Kɔ̀kɔ̀ɛpea, e sɔ ègà tù Kèrubim tata èvè, eye wo tre sìka ɖo woa ŋuti. 11Kèrubimwo be àwàdawo be dìdi mè nyi àbɔglìgo èwì. Kèrubim cucugbãa be àwàda ɖèka dìdì àbɔglìgo àtɔ̃, eye be le tɔ èxɔ̀a be èglì. Àwàda èvègɔ̃ kè dìdì àbɔglìgo àtɔ̃a, le tɔ Kèrubim èvègɔ̃a be àwàda ɖèka. 12Kèrubim èvègɔ̃a be àwàda ɖèka dìdì àbɔglìgo àtɔ̃, eye be le tɔ èxɔ̀a be èglì. Yebe àwàda èvègɔ̃a dìdì àbɔglìgo àtɔ̃, eye be le tɔ Kèrubim cucugbã tɔ̀a be àwàda. 13Kèrubim kèawo vlũ woabe àwàdawo, eye kèke mèa nyi àbɔglìgo èwì. Wo lè woabe àfɔ̀wo ji, eye wo jè ŋùkɔ̀ èxɔ̀a mè. 14E sɔ àho-vɔ ku àvɔ jɛ̃ kudo àklàla àdodoe wɔ̀ èxɔ̀mèsòvɔa, eye be na wo lɔ̃ Kèrubimwo ɖo e mè ku àlɛ̃ŋudà-vɔ.
15E wɔ̀ sɔti èvè ɖo èxɔ̀a be ŋùkɔ̀: woabe dìdi mè lè àbɔglìgo ègbã vɔ àtɔ̃, eye sìhɛ̃ kè lè èta na sɔtiawoa be dìdi mè lè àbɔglìgo àtɔ̃. 16E wɔ̀ sepòpo lɔ̃lɔ̃wo ɖo kɔ̀kɔ̀ɛpea, sɔ ɖo sɔtiawo be èta mè. E wɔ̀ yòvobòɖà èkà èvè takpo, eye be sɔ wo do sepòpo lɔ̃lɔ̃awo mè. 17E li sɔtiawo ɖo Mawuxɔa mɔnu. Ɖèka lè ɖùsi mè, eye èvègɔ̃a lè èmìɔ̃ mè. E ɖo nyikɔ na cucugbã tɔ̀a be Yakin, eye be ɖo nyikɔ na èvègɔ̃a be Boaz.
Mina Bible © Bible Society of Togo, 2014.