2Kronikà 2
2
1Salomɔ̀n xɔ̀ àgbãdrotɔ hotu ègbãvɔàtɔ̃, èkpekpàtɔ hotu èkà, ku èdɔjikpɔtɔ hotu ɖèka àlɔ̀ woeàdɛ̃, ne woa wɔ̀ èdɔ lè èto tamè.
2Ekèa yomè a, Salomɔ̀n dɔ̃ àmè ɖoɖa Hiràm, Tirò be èfìɔa, be woa gblɔ̃ na ɛ̀ be: “Sìgbè àleke wò wɔ̀ na ètɔ nyè David, eye wò sɔ sedàtiwo ɖoɖa ɛ̀, ne bèa tù àxue, ne bèa nɔ̀ e mèa nènea, 3kpɔɖa, mù jro la tù àxue na Tɔhonɔ̀, Mawu nyè be nyikɔa be gogo, ma kɔ̀ e ŋuti na ɛ̀, ne woa nɔ tɔzò àmì hɔ̃hɔ̃ɛ lè e be ŋùkɔ̀, ne woa nɔ dà kpɔ̃nɔ ɖo ŋùkɔ̀ na ɛ̀, gà sia gà mè, ne woa nɔ wɔ̀ ènumème vɔsa ŋùdekɛ̃nyɛ ku wètrɔ, lè jɛ̃gbɔ̃zãwo gbè, lè wètri yeye-zãwo gbè kudo Tɔhonɔ̀, miabe Mawu a be àzã kɔ̀kɔ̀ɛwo gbè. Wo la nɔ wɔ̀ ekèa, kaka sɔ yì, le Izràɛl-nyigbã ji. 4Eye àxue kè mu jro la tùa, la lolo, ɖoa, miabe Mawu a lòlò wu vòduwo keŋu. 5Vɔ̀a ɖe, àmè kɛ ye la teŋu ɖo ŋusɛ̃ la sɔ tù àxue na ɛ̀, wàlɛbɛ kè jiŋùkusiwo ku jiŋùkusiwo be jiŋùkusiwo ŋutɔ cã hùe na yebe nɔ̀pe ò? Eye nyè ya ɖe, àmè kɛ ye mù nyi, ne ma tù àxue na Tɔhonɔ̀, ne mu nyi, ne woa sɔ nɔ tɔzò vɔsa lè yebe ŋùkɔ̀ kpò ò? 6Ekèa ŋutia, ɖo àmè ɖe kè ɖo àɖàŋù lè sìka-dɔwɔ̀wɔ mè, klòsalò-dɔwɔ̀wɔ mè, lè gàjɛ̃-dɔwɔ̀wɔ mè, lè gbɛ̀dɛ-dɔwɔ̀wɔ mè, ekè ɖo àɖàŋù lè àvɔ jɛ̃, àvɔ hɛli ku àhò-vɔ be èdɔwɔ̀wɔ mèa ɖoɖa mù. Àmè kèa ɖo la nya ènu tata ɖo èkpe ŋuti ku ɖo àti ŋuti. E la va wɔ̀ èdɔ ku àɖàŋù-dɔwɔ̀tɔ kèwo ye lè gbɔ nyè, lè Yudà-nyigbã ji, ku Yèruzàlɛm, àmè kèwo ètɔ nyè David ɖo ɖɛawo. 7Wòa sɔ sedàtiwo, òɖum-tiwo ku wawa-tiwo so Libàn-nyigbã ji, ɖoɖa mù, ɖoa, mù nya be àpo èdɔwɔ̀tɔwo nya leke wo sònà Libàn be àtiwoa, eye èdɔwɔ̀tɔ nyèwo la va kpe ɖo woa ŋuti, 8ne woa bɔ̀ àti sùgbɔ na mù, ɖoa, àxue kè mu ji la tùa la lòlò, eye be la nya kpɔkpɔ. 9Kpɔɖa, mù la na èlù jijenu gã hotu èwo, èpò jijenu gã hotu èwo, vɛ̃, ègò hotu èwo, àmì ègò hotu èwo na àpo èdɔwɔ̀tɔ kèwo la sò àtiawoa be ènu ɖùɖu.”
10Huram, Tirò be èfìɔa ŋlɔ̀ xoma, ɖo e ŋuti ɖoɖa Salomɔ̀n be: “Ekè Tɔhonɔ̀ lɔ̃ yebe dùkɔ̃a ŋuti ye be ɖo wò èfìɔ ɖo e nu ɖo.” 11Huram gbà gblɔ̃ be: “Woa kafu Tɔhonɔ̀, Izràɛl be Mawu ke wɔ̀ jiŋùkusi ku ànyigbã, eye be na èfìɔ David, ŋusùvi kè ɖo ènunya, àdòdò ku sijèje, ne bèa tù àxue na Tɔhonɔ̀, ku èfìɔsa na ye ɖokoe. 12Ekèa ŋutia mù le ɖo ŋusù àɖàŋùme ɖe kè ɖo ènunya ku sijèjea ɖoɖa wò. E ye nyi Huram-Àbì#2.12 Kpɔ 2Kro 4.11; 1Èfìɔ 7.13.. 13Huràm-Àbì nyi Dàn be nyɔ̃nùviawo dòmètɔ ɖèka be èvi. Ètɔa so Tirò. E ɖo àɖàŋù lè sìka, klòsalò, gàjɛ̃, ègà yìbɔ, èkpe, àti be èdɔwɔ̀wɔ mè. E gbà nya àhododo, àvɔ jɛ̃ ku àvɔ hɛ̃ kudo àklàla ŋuti-dɔwɔ̀wɔ. E gbà nya ènu tata ɖo àti ku èkpe mè. E sɔ̀gbè la ɖè susu so èdɔ ɖe sia ɖe kè wo la do àsi na ɛ̀a ŋuti, sɔ bɔ̀ ɖo àpo àɖàŋù nyatɔwo ku àpetɔ nyè, David, ètɔ wò be àɖàŋù nyatɔwo ŋuti. 14Fifìa, àpetɔ nyè ne ɖo èlù, èpò, àmì ku vɛ̃ kè be ènyà be gblɔ̃a ɖoɖa yebe sumɔ̃viwo. 15Miawo yaa, mi la sò àti kè wò gbe hiã keŋu kpòa so Libàn, eye mi la do wo àpù ɖoɖa wò, lè Yafo. E yomè a, wò la teŋu sɔ wo yì Yèruzàlɛm.”
16Ekèa yomè a, Salomɔ̀n hlɛ̃ àmèjro kèwo keŋu lè Izràɛl-nyigbã jia, ekèwo ètɔa David hlɛ̃ sãawo#2.16 Kpɔ 1Kro 2.22. Woa kpata wo lè àgbètɔ hotu èkàtakpo ci woeàdɛ̃, àlɔ̀ woeàdɛ̃. 17Salomɔ̀n sɔ àmè hotu ègbãvɔ àtɔ̃ wɔ̀ àgbãdrotɔwo, hotu èkà wɔ̀ èkpe kãtɔwo lè ètowo ji, eye be sɔ àmè hotu ɖèka àlɔ̀ woeàdɛ̃ wɔ èdɔ ji kpɔtɔwo, àleke be dùkɔ̃a keŋu ne wɔ̀ èdɔa.
Mina Bible © Bible Society of Togo, 2014.