Zacharie 11
11
Ti-Dindaan nāaǹ ntimu mun cáá mpɔnee
1Leebanɔn tiŋki, pìitī a-punyɔmmu
ŋŋmi ń wà a-seediri sufii#11.1 Leebanɔn seedir sufiiyee: kpèè Eesee 31.3-9..
2Siipreesi subu, nín̄ yáliŋkí,
di sá yii seedir sufii lítì,
bi nāaǹ isumɔnti gbanti.
Baasan seeni sufii, nín̄ yáliŋkímaan,
di sá yii bi gāā a-bambaŋku
kun nìn múkú ubɔ kaa ŋūǹ kí kɔ́ee.
3Bi gbìl̀ bipikpaaliibi nín yáliŋkée,
di sá yii bi-nyooti kúntì.
Bi gbìl̀ gbikinti siim pu,
di sá yii bi kpéelikì Jɔɔdan
buŋgbandi mɔsɔŋku kɔkɔ.
Bipikpaaliibi bili bɔti
4M-Dindaan m-Nimbɔtiu tīī-mi mara nee yii: «Kpàà ipii in bi péetí ki cáǹ kí kpɔ̀ nee. 5Bin dāā ipii gbantee kù-i an kaa ŋáań-bi nyàaa. Bin nyáfí-iee lì yii: <Ti jáam̀ ti-Dindaan, ti kpántì bigaajab!> I-bɔti kaa kpáàa cáá i-kpaaliibi falaa. 6Man ni-Dindaan di lī yii maa làá sɔ̄ kitiŋ nee pu nib saai. M làá gíiǹ unil kamaa kí ŋá u-juti nì u-bɔtiu ŋaan. Bibɔtiibi làá nùkù kitiŋ púb, ní maa làá fōō báà ubɔ bi-ŋaan.»
7Niinee ní m fōō ipii in binyampoobi bàà cáǹ kí kpɔ̀ee ki bíi kpàá. M yōoǹ atambɔn ali ki ŋúb́. M yíiń diba yii: <Disaasɔl>, ní ki yíiń din kíǹee yii <Mpèé>, ní m kíĺ ki bíi kpàá-i. 8Ní m jìn̄ bipikpaaliibi bitee uŋmabaanti poon. Míǹ boonee ní maa ti cáá kimɔtii ipii pu, ní í mun núutiǹ-mi. 9Niinee ní m bí-i yii: «Maa làá ti kpàà-ni! In làá kpúee ń kpú, in làá wāŋkèe ń wāŋkì, ní in làá kíńee ń nīn tɔ̀ntī tɔb!»
10Ní m cúú m-tambɔndi din m yíì <Disaasɔlee> ki kóol̀ ki kpītì dipoondi din ti-Dindaan nìn pōoǹ anibul kɔkɔee#11.10 Kpèè Oosee 2.20.. 11Yaadal ní dipoondi gbanti kpītì. Bibantiliibi bin dāā ipiiyee nín ká tin m ŋée, ní bi béè yii ti-Dindaan là kí dī tin m ŋée pu kí sòoǹ tiba ní. 12Ní m bí-bi yii: «An yaa ŋān̄ ni-cee, ní pà-mi m-paati, an yaa kaa tí sá mimmee, ní yàntī.» Ní bi pàn̄-mi m-paati jitɔmbi mmuŋku nì saalaa. 13Ní ti-Dindaan bí-mi yii: «Bi nín ká m-daaku nimbiŋmiiku sá puee dee! Yòon̄ animbikpaan gbanti kí cáá lúkú ukúduntil!» Ní m yōoǹ animbil jitɔmbi mmuŋku nì saalaayee ki cáa lúkú ukúduntil kunimbɔtidiin. 14Míǹ boonee ní m cúú m-tambɔndi dililiitiil din m yíì <Mpèéyee> ki kóol̀ kí yàkatī kunabitiiu kun bí Juuda yab nì Isirayeel yab kansikinee.
15Ní ti-Dindaan gíti bí-mi yii: «Á gíiǹ a-ba upikpaagbaan yam. 16Di sá yii man làá yàntī upikpaal ubɔ mun ń dāan̄ kitiŋ nee ni. Waa dāa fātìi tɔ́ ipii in wáŋkèe bɔtaaa, kaa dāa nyàab̀ in wáŋkèeyaaa, kaa dāa cāantí in būǹeeyaaa, kaa làá dāá kpíiǹ in pɔ̄ɔ̄yee mun. Ama u dāa kù in gbìfì ki cáá ŋkpamee ki ŋmóò, ki dátí ki fúkutí i-tafuŋfukuti.»
17An sá mbusu ní ki tīī upikpaagbaan
un féeń u-picaŋkpuŋkuee!
Bí gāā kí tùkutī u-ŋal kí lēē u-nimbil kujaaun!
U-ŋal ń fáká
ní u-ŋaŋgiinimbil ń kpú.
Currently Selected:
Zacharie 11: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
