Zacharie 10
10
Awaa kaa bí tiban
1Mèèmaan ti-Dindaan
ú yàntī ukpaasiitaa ń nì.
Ti-Dindaan di yàntī utaa nì
ki yàntī utaa ŋmóò ki tátí nì kubuŋu.
U làá yàntī utaaja ń nì,
ní báà ŋma saaku ń sɔ̀ŋkì timool ń nyā.
2Di sá yii awaa sòoǹ tinyimɔmbɔti ní,
ní bibɔɔbi wāĺ tin kaa sá ibaamɔnee.
Bi nín lèekī tidamintiil taapu puee sá inyimɔn ní,
ní bi ŋmēentí binib fám.
An pu ní dinibul nee yíkìi búntì nì falaa
kii ipii in kaa cáá ukpaalee.
Ti-Dindaan pōoǹ kí fīī u-nibul
3«Bipikpaaliibi pu ní m fōō diŋuul,
iŋɔjaa tafal ní m làá dáaĺ#10.3 Doo nee, bipikpaaliibi nì iŋɔjaa dàkà biyidambi bin sá binicambi ki là kí kpòotī Isirayeel nibulee ní..
Tiŋman, man ni-Dindaan Mpɔŋkɔdaan làá dāan̄
kí kpàà m-picaŋkpuŋku, Juuda nibul.
M làá dū-bi kí kpántí tinyool taamuu
kí cáá-bi kí cùnnì dikɔ̀ndi.
4Juuda naakookun ní ditaŋkpal din tíkí kudiiyee,
nì tanti kpakpaal
nì bujanjatɔbu làá nyānní.
Kunaakoou gbantin ní bibɔtiibi kɔkɔ làá nyānní.
5Bi làá dāá nīn bí kii bibaatandambee.
Bi làá dāá nīn tà bi-nannanliibi ki múl̀
kii adan pu kpatee.
Bi làá dāá nīn jáà míǹ,
kun puee man bi-Dindaan bí bi-cee.
Icoo làá cúú bi-nannanliibi bitanjakaliibi.
6M làá tīī Juuda yab mpɔn,
m làá fīī Isirayeel yab.
M làá fàtīí gíiǹ-bi bi-tiŋkin,
kun puee bi kɔ́-mi falaa.
Bi làá dāá nīn bí kii
maa pée dū-bi ki fá ki kée.
Di sá yii man di sá bi-Dindaan bi-Nimbɔtiu,
ní m làá fōō bi-wimmeem.
7Eefiraayiim yab làá dāá nīn cáá dipɔbil
kii bibaatandambee.
Bi làá dāá nīn bí dipɔɔpindin kii
bi nyùn̄ ndaamee.
Bi-jipɔmbi yaa láa ká mimmee,
bi làá dāá nīn fàal̀,
ní kí nīn bí mmɔŋkpaanni ti-Dindaan pu.
8M làá búń ŋfoon kí yíiń m-nibul yab
kí kóoǹ-bi kí kpāfì,
di sá yii m fōō-bi ki líì.
Bi làá dāá bùtī kii njaminee.
9M yāaǹ-bi atimbun kansikin,
kii bi nín yàantí iwambool puee.
Ama ndandati timmu gbanti poonee,
bi làá téetí m-pu.
Bi làá dāá nīn bí niin dimaŋfalin nì bi-biyaamu
ní kí fàtīí gítiń.
10M làá dāá nyāntiń-bi Eejipiti nì
Asuur timmun, ní kí kóoǹ-bi kí kpāfì.
M làá dāá cáá-bi kí kɔ́ǹ Galaadi
nì Leebanɔn timmun.
Nì míǹ kɔkɔee, an kaa làá dāá bà-bi.
11Bi làá dāá dùtī dinimbinaamandi mɔɔl#10.11 dinimbinaamandi mɔɔl: an dàkà yii Tikati mɔɔl, kpèè Disa 14.21-22, Yees 51.10, Ilan 106.9..
Man ni-Dindaan làá dāá fáá dimɔɔl nyiŋgbanti.
Niil mɔɔl làá kpā kí tin sāā taapu.
Asuur ulambidaan làá lítí,
ní Eejipiti kaa ti làá nīn cáá mpɔn.
12M làá dāá tīī m-nibul yab mpɔn,
ní bí nīn ŋáań min man lèe.
Man bi-Dindaan di lī míǹ.»
Currently Selected:
Zacharie 10: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.
