Sagesse 6
6
BI BÍI NYƆ́ŊKÍ ICIIN
Bibɔtiibi máaǹ kí nyàab̀ Iciin
1Nimbi bibɔtiibee, ní pīlifìmaan kí gbìl̄ taapu! Kitiŋ pu kpootiliibi kɔkɔ, yàntīmaan bí dàkà-ni! 2Ní kpòom̄maan ni-tafal, nimbi bin di sá anikiti kpilib, ní an mɔ̄ǹ-ni ní nīn kpòotī atimbun kupaauee. 3Ibaamɔnee, ti-Dindaan di tīī-ni mpɔn, Yilpu fɔ́ŋŋŋ Nimbɔtiu di tīī-ni ni-beel pɔŋŋu#6.3 ni-beel pɔŋŋu: dūú ŋmàntī nì Dani 4.14, Room 13.1.. Úǹ di làá dāá cɔ̄ŋkì ni-tuuŋŋi ní kí dāá kpèè ni-landɔkɔi tiŋan. 4Nimbi bin di bí u-beel tundinee, naa sòon̄ tibɔti deedee, kaa tɔ́ mara, ní kaa tí ŋá ki nóó nì u nín là puee. 5An pu ní u làá dāá cíĺ ni-pu dicilpu dicilpu nì tifaandi poon, di sá yii u làá dāá sòoǹ binikpaambi bɔti an nīn pɔ̄ɔ̄ ní. 6Tiŋman bi ŋūǹ kí sɔ̄ bin sīntiǹ bi-ba taapuee saai kí dū bi-kpitii kí pɔ̄-bi. Ama bi làá dāá kpèè bipɔɔbi bɔti nyíki nyiki ní. 7Di sá yii un sá tiwan kɔkɔ Dindaanee kaa làá dāá fàŋkì ubɔ, ní kaa làá dāá kpèè yii ŋma sá ukpaan. Úǹ di náań ŋwaamu nì bikpaambi ní ki kpèé bi-kɔkɔ mbaantiim#6.7 Dūú ŋmàntī nì Yoob 34.19, Alaŋ 22.2.. 8Ama u làá dāá sòoǹ bin cáá mpɔnee bɔti nyíki nyiki ní.
9An puee nimbi bibɔtiibi ní m bíi sòoǹ nì, án nín làá ŋá pu ní bīfì kí nīn cáá Iciin kí taa gáatée. 10Bin tɔ́ circir marab tiŋanee, bi làá dāá yíiń-bi circirdambi, ní bin yāntì marabee dàkā-bee, bi làá dāá mɔ̄tì bi-pu ibɔsoon dal. 11An puee ní pīlifì m-bɔti, kí nīn néeń-tì nì ni-pɔbil kɔkɔ ní tí dàkà-ni.
Iciin túŋkí unil ní
12Iciin jìl̀ ní i-walfiŋu kaa kúù. I yàntī bin néeń-iee#6.12 bin néeń-iee: dūú ŋmàntī nì Alaŋ 8.17. kāntí-i sɔkɔmii, ní ki yàntī bin nyàab̀-iee kāntí-i. 13I túŋkí bin là-iee ní, íǹ di péetí kí lēē i-ba kí dàkà. 14Un yaa yíkì malaa kí nyàab̀-iee kaa làá gīī. Udaan làá ká-i i kā i-punyɔkɔpu. 15Un di dàkafī i-puee dàkà yii u cáá dinyil. Un di kaa gèeǹ i-puee làá nyā ilandɔkɔn an kaa làá sūŋkì. 16Di sá yii i yìiǹ an kɔkɔ pu ki nyàab̀ bin di máaǹ-iee ní. I cífiń bi-saŋyi pu nì kulaŋŋaŋfitiiu, ní bi-landɔkɔi kɔkɔ poonee, i túŋkí-bi.
17Iciin nyeel di sá á nīn baasii là í dàkà-si#6.17 Dūú ŋmàntī nì Alaŋ 1.7.. 18A yaa là í dàkà-see, see á nīn néeń-i. Kí nīn néeń-iee dàkà yii a ŋúb́ i-marab. Á nīn ŋúb́ i-marabee dàkà yii a cáá dimákal yii a pée gíti kpá kí kpú, 19ní kí taa kpúee dàkà yii a bí ki kɔ́ĺ Unimbɔti. 20An puee á nīn là Iciinee cáǹ-si dibeel cee ní. 21Míǹ puee, nimbi anibul bɔtiibi, ni yaa néeń dibeel nì mbɔtikpandɔee#6.21 Mbɔtikpandɔ dàkà mpɔn ŋun ubɔti cáá kí nīn cáa kpòotī u-nibee ní., ní nīn tìì Iciin tinyool, mimmee ni làá nīn sá bibɔtiibi kí nīn cá talku.
Ba di baasii sá Iciin ní?
22Ama ba di sá Iciin ní? I nyánní la ní? M làá tùkù-ni, kaa làá dū abɔɔn kí báĺ-ni. M làá pée cù i nín kíĺ pu ki bée ní táb. M làá pée dū kun an bàlifī unil ń dūú béé-iee kí bíĺ mpaampiin pu, maa làá kàkatī kí wàatī mbaamɔn. 23Maa làá tí yàntī nnimbidiki ŋun nàantée ń kpòotī-mi, di sá yii nnimbidiki nì Iciin kaa kpáfí. 24Biciŋfitiibi yaa wīikée, duulinya kāntí difiil ní, ní ubɔti un cáá dinyilee#6.24 ubɔti un cáá dinyilee: dūú ŋmàntī nì Siira 10.1-3. tìì u-nibul nnaam. 25An puee yàntīmaan m-bɔti ń dàkà-ni ní án tūtuǹ-ni.
Currently Selected:
Sagesse 6: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.