Sagesse 5
5
1Niinee deedeedaan làá dāá nīn yú nì dimákakpaandi, bin nìn wɔ́b̀-u ki kpèé u-pɔ́ɔǹtam fámee nimbiin. 2Binib gbanti yaa láa ká-uee, dinyoondi làá dāá cúú-bi, ní an ŋá-bi bitii bí ká yii u ká difiil min baa bàà mákée. 3Bi làá dāá nīn yáliŋkí ki nyàab̀ kufoou kaa làá ká, ní ki lì tɔb cee nì kunimbaau yii: 4Un ti nìn lāā njamin ki bèel̄ee dee. Ti nìn ŋá digbaandi páaa! Ti nìn dākafì yii u nín bí puee sá kuwaatiiu, ní u-kúm sá ticoobɔti ti-cee. 5An ŋá mana ní u dāa kútì Unimbɔti biyaamu nì circirdambi pu ní? 6Mimmee ti nìn dū mbaamɔn saŋŋu ki fá deeyaa! Deedee walifiŋu kaa nìn ŋmíntì ti-pu ní ŋwìiń kaa nìn nyáń ti-pu. 7Ti nìn dū ti-ba ki múĺ ikpiti sàmbiyaamu mun nàantée poon, ki cōom̀ ki pūntì kuteeu kun kaa cáá nsàmbiyaamuee, ama taa béè ti-Dindaan saŋŋu.
8«Ba ní ti-bayoondi kútì-ti? Tigaajati tin pu ti nìn cáá dilambilee kútì-ti ba? 9Tíǹ gbanti kɔkɔ wáŋkì kii mboonee, a lì kii tibɔti tin unil sòon̄ kubuŋu yōoǹ ki cáa búntèe. 10Ti nìn bí kii meela un kóò tinyiŋgban kansikin ní baa ti kāntí u-fuuŋŋu, u-taapu mun kaa yāntì kudaaŋŋu tinyiŋgban puee ní. 11Ti nìn gíti náań nì unoon un ŋàaǹ kutaa puee ní. Unoon yaa ŋàan̄ ki jítèe, baa ti kāntí u-saŋŋu. Di sá yii u cáá u-feeŋyi ki gbáà kubuŋu, ní kí dū u-pɔŋŋu kí cátí nsan, ama míǹ boonee, baa ti kāntí u nín jítì puee tabɔbiliŋ. 12Bi yaa màkā tiba ní ki tɔ́ mpiin, kubuŋu kun ŋu cátèe fàtīí gítiń ku-laŋki, ní baa ti kāntí mpiin nín dī laakiŋyee. 13Míǹ ní ti mun bí. Bi tin pée màal̀-tee, ti kpáàa wáŋkì. Taa ŋúń ki ŋá tiŋan ki bíl̀ ti-boon bí ká, ti-toonam di ŋmɔ́ ki kūū-ti.»
14Tiŋman, unikpiti mákal bí kii tifeel tin kubuŋu yòontée ní, a lì kii dipɔ̀ńdi din kubuŋkpaaŋŋu yòontée. Dì wáŋkí kii nnyiim min kubuŋu yòontée, a lì kii bi nín téetí unicaan un kɔ́ u-juti pu ŋwimbaanti puee ní.
Deedeedambi foolbooŋwu sá tinyool yɔu ní
15Ama deedeedambi bíǹ bí ní talku. Ti-Dindaan di pà bíǹ paati, ní Yilpu Fɔ́ŋŋŋ Nimbɔtiu kpèé-bi. 16An puee, bi làá dāá fōō u-ŋaan kibeefuulii kinyaaŋŋi nì dibeel daaŋku kun cáá tinyoolee. Di sá yii u làá dū u-ŋantil ŋgiil yɔŋu kí wúń bi-pu, ní kí dū u-ŋal kí bìin̄ bi-pu. 17U làá dāá dū u-faŋgiil din u cáa tɔ̀ ipɔntoonee ní ki ŋá u-janjawanti, ní kí dāá dū u-wannaaŋkaati kí ŋá tijanjawan kí dáaĺ u-nannanliibi tafal. 18U làá dāá dū u-deedeeu ní kí ŋá dijanjabɔkutil, ní kí dū u nín sòoǹ tibɔti deedee puee kí ŋá kijanjafuulii. 19U làá dāá dū u-circir bítam min ubɔ kaa ŋūǹ kí já kí pɔ̄ɔkiǹee ní kí ŋá digbampɔɔl, 20ní kí dū u-ŋuul din pɔ̄ɔ̄yee kí ŋá kitàataajiki#5.20 B. 17-20: dūú ŋmàntī nì Yees 59.17, Eef 6.13-17. ní duulinya kɔkɔ ń dāá kūtì u-pu kí jáǹ bigbaambi. 21Kii ipiin in bi màkā tiŋan ki dáaĺ butɔbu mun tiŋanee, míǹ ní utaa nín ŋmóò puee làá nyānní atagbanni kí cùú yā kun bi tɔ́ee. 22Ataanyiŋkumbil làá dāá nīn lítí bi-pu nì diŋuul poon kii ditaŋkpal din bi dū kujaataafuŋ ki tɔ́ee. Tiŋkun nyim làá dāá nīn jáà nì bi nì tininjati, ní amɔɔ nyim ń bìin̄ bi-pu kaa làá sɔ̄ bi-saai. 23Kubuŋu kun pɔ̄ɔ̄yee làá dāá yīkì bi-pu ní kubuŋkpaaŋŋu kubɔ ń dāá yòon̄-bi.
Inikpiti làá dāá yàntī kitiŋ kɔkɔ ń kpántí kii kuteeuee, ní tikpitil diŋál ń dāá cúú abee ŋin pɔ̄ɔ̄yee kí lábití kí cìb̄.
Currently Selected:
Sagesse 5: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.