Sagesse 3
3
Kun dɔ̄ ki cí deedeedambi nì binikpitibee
1Deedeedambi nammu kā Unimbɔti ŋaan ní, falaa ubɔ pée gíti kpá kí gbēē-bi. 2Bigbaambi bíǹ ceeyee, bi dàkafī yii bi kpíì ní, ní bi-yīkitam duulinya nee poonee sá kii asaluuee, 3ní bi-kpátam ti-kansikinee sá katanjoolii. Ama ní bíǹ bí ŋgbansɔŋfin. 4Bi nìn máká Unimbɔti pu yii u làá tīī-bi dimaŋfal din kaa kúntée, ama binib bíǹ nìn dàkafī yii bi-kpitii pu ní bi jíń falaa. 5Bi jíń falaa fiii, ama bi làá dāá jī nnaam min sá ŋkpaamee#3.5 Dūú ŋmàntī nì Room 8.18, 2 Kɔra 4.17.. Di sá yii Unimbɔti cɔ́ŋkì-bi ní ki ká yii bi máaǹ kí nīn sá u-yab. 6U nìn cɔ́ŋkì-bi ki ŋá-bi circir kii bi nín cɔ́ŋkí sindaariya ŋŋmin puee#3.6 Dūú ŋmàntī nì 1 Peet 1.7., ki fōō-bi kii saraawɔkaa ní bi ŋá nsaraafan puee.
7Unimbɔti bɔsooŋyi dalee, bi làá dāá nīn jìl̀ ní, bi làá dāá nīn bí kii iŋmiyatiyaal nín fòol̄ kumoou kú wà pu niin niinee ní. 8Bi làá dāá sòoǹ atimbun#3.8 Dūú ŋmàntī nì 1 Kɔra 6.2. bɔti ní kí dāá jī anibul pu dibeel, ní ti-Dindaan ń dāá nīn sá bi-bɔtiu kí nīn cá jaanjaan. 9Bin máká ti-Dindaan puee làá dāá béé ibaamɔn. Bin yúl̀ nì u deedeeyee làá dāá nīn bí u-cee dineendi poon. Di sá yii ti-Dindaan dàkà bin u lútèe u-laŋŋaŋfitiiku nì u-poommɔŋŋu.
Kun dɔ̄ ki cí binikpitibee
10Binikpitib bíǹ làá dāá fōō bi-landɔkɔi nín máaǹ ditafadaaldi diŋyee ní. Di sá yii bi kpēē deedeedambi fám ní ki dū ti-Dindaan ki fá. 11Bin kaa dū Iciin nì i-dakaŋ ki yíiń tibee gbí falaa. Baa pée máká tiba pu, ní bi-pɔ́ɔǹtam sá fám, ní bi-tuuŋŋi kaa làá pée kèetī-bi tiba poon. 12Bi-nimpoobi kaa nyí tiba, bi-biyaamu sá bitɔŋfitiibi ní mbusu làá jēetí bi-naantiibi pu.
Deedeebítam sɔ́ǹ mmaal
13Unimpu un sá uŋmaŋŋmanti, kaa kpáfì nì uninja ŋkpāfitam min kòó ki kɔ́ tijɔkɔndinee bí mmɔnneeee! Ibɔsoon dalee, u làá dāá fōō tipaal. 14Ufaal un mun kaa ŋá tikpitil ní kaa dākafì ti-Dindaan pu ilandɔkɔkpitee bí mmɔnneeee! U nín yúl̀ nì Unimbɔti deedee puee, u làá dāá fōō tipaal tin nyáń ti-bee, ní kí kàl̄ tinyool paaŋŋu pu ti-Dindaan diikun#3.14 B. 14 : dūú ŋmàntī nì Yees 56.3-5.. 15Di sá yii un túń atunnyaanee làá fōō tinyool paati ní. Iciin bí kii busubu bun nyaaŋyi kaa kúùyee ní.
16Ama an kaa bútí bilaakpaadambi biyaamu, ní mbiyaamu mun bi màl̄ ŋkpāfitam min kòóyee poonee làá wāŋkì. 17Báà bi yaa kāl̀ ki yúntì, baa làá kàaǹ-bi kí kūtì binib pu, ní bi yaa púĺee, bi làá nīn kpèé ki sìŋkīǹ-bi áli bi-kúm dal. 18Bi yaa tí kpíì malaayaaa, baa làá nīn cáá dimákalaaa, kaa làá ká diŋmeendi ibɔsoon dal. 19Di sá yii kun dɔ̄ ki cí unikpitee dāa pɔ̄ɔ̄.
Currently Selected:
Sagesse 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.