Tobit 4
4
Toobii tīī u-jipɔɔn isaŋki
1Ŋwiin gbanti ní Toobii téetì animbil ŋin u nìn dūu síiǹ Gabayeel, Rageesi tiŋki kin bí Meedii tiŋkinee pu. 2Niinee ní u sòon̄ u-ban yii: «Kpèè, m mēē Unimbɔti yii ú kpɔ̀-mi. Mimmee an kítì yii ḿ yíiń m-jipɔɔn Toobiyaasi kí sòoǹ nì u animbil gbanti pu ní kí nín kpú.» 3Niinee ní u yíiń Toobiyaasi. Úǹ bāańee ní u bí-u yii: «M yaa kpíìyee, á síb́-mi kii an nín máaǹ puee. Tīī a-na tinyool. U-maŋfal wiiŋyi kɔkɔ poonee, á taa dū-u kí fá jaanjaan. Ŋá tin fáatì-uee kí tīī-u, kí taa ŋá tiba tin làá kɔ́ǹ-u kunimbaaunee. 4M-biki, á taa súntí agìń ŋin u kántì a-pu ŋyunti ŋun a dáá kā u-poonee. U yaa kpíìyee, á síb́-u kí kɔ́ĺ-mi, dikaakubaantiilin#4.4 dikaakubaantiilin : dūú ŋmàntī nì Judiiti 16.23-24..
5«M-biki, a-maŋfal wiiŋyi kɔkɔ poonee, á taa súntí ti-Dindaan pu. Á taa kíí kí ŋá ikpiti kí yìntī u-marab. A-maŋfal wiiŋyi kɔkɔ poonee, á nīn tūǹ deedee tuuŋŋi kí taa nóó ikpiti saŋŋu. 6Tiŋman, bin bin ŋáań tikɔkɔ nì ibaamɔn poonee, án làá bútí-bi bi-tuuŋŋi kɔkɔ poon ní. 7Bin kɔkɔ ŋáań tin bí deedeeyee, á lēē a-gaajawanti pu dijandi kí pɔ̄-bi. A yaa bíi pūǹ-bi tibee, an taa nín̄ wù-si#4.7 an taa nín̄ wù-si: dūú ŋmàntī nì Ditee 15.10, 2 Kɔra 9.7.. Á taa fàtī a-boon kí tīī uwɔfi, ní Unimbɔti mun kaa làá fàtī u-boon kí tīī-si. 8Tūtuǹ bin kíǹee kí nóó nì tin a cááyee, kí nóó nì a-gaajati wíiŋŋu. A yaa tí cáá fiiiyaaa, á taa fàŋkì kí dū fiii un a cááyee kí tūtuǹ a-nabiki. 9A yaa bíi ŋáań mimmee, tigaajawammɔntiil ní a cáa bíi kpáafí dinimbinaamandi wiiŋŋu#4.9 tigaajawammɔntiil: dūú ŋmàntī nì Maat 6.20, 1 Tiim 6.19.. 10Kun puee a yaa bíi pūǹ uwɔfee, an làá fīī-si ŋkúm ŋaan, ní kí pìin̄ nsan á taa kɔ́ dibɔmbɔndin. 11Di sá yii bin kɔkɔ pūǹ biwɔfib tiwanee ŋáań saraa un cáá kudapɔɔuee ní ki tìì Yilpu Fɔ́ŋŋŋ Nimbɔtiu.
12«M-biki, á taa cáá unimpu min kaa nóó Unimbɔti marauee. Mpeepeekaamee, á cáá unimpu a-nibul kansikin. Á taa cáá unicaan, unimpu un kaa sá a-baa naakookunee. Di sá yii ti sá Unimbɔti bɔnaatiliibi dicaŋkun ní. M-biki, téetí Noowa nì Abraam nì Isaaki nì Jaakɔb, ti-naanjab bipeepeekaabi pu. Bíǹ gbanti kɔkɔ nìn cáá bi-nabiyaamu kansikin ní unimpu ní Unimbɔti nìn bīiǹ bi-pu ki tīī-bi mbiyaamu. U nìn pōoǹ bi-biyaamu nì bi-naantiibi yii bi làá fōō kitiŋ kí kpántí bi-yaka. 13An puee m-biki, nín̄ néeń a-nabiyaamu Isirayeel yab. Á taa kpèè kí sìŋkīǹ a-nabiyaamu, bininjab nì binimpoobi bin sá a-nibul yabee. Bíǹ kansikin ní á yòon̄ unimpu. Di sá yii dilambil bíiĺ binib ní ki nàantí-bi. Míǹ mbaantiim ní diwutijool cāabìń disool nì falaakpaan. Diwutijool di sá ŋkùm na.
14«Á taa yàntī upaadaan nimbiliŋ ń dòon̄ a-cee kutaa ń wúntí aa pàn̄-u#4.14 Á taa yàntī upaadaan nimbiliŋ...: dūú ŋmàntī nì Akoo 19.13, Ditee 24.15., ama á pà-u dicilpu dicilpu. A yaa nóó Unimbɔti mimmee, u làá pà-si kí téeǹ. M-biki, á nīn nyíǹ a-ba a-tuuŋŋi kɔkɔ poon, ní kí dàkà a-bimbim kɔkɔ poon yii bi dàkā-si a nyí. 15Kun aa lèe, á taa dūú ŋá a-juti#4.15 á taa dūú ŋá a-juti: dūú ŋmàntī nì Maat 7.12, Luuki 6.31.. Á taa nyɔ̀ ndaam tikpil áli kí tin gbí, ní kí taa yàntī didanyɔgbil ń kpántí mbimbim kí tīī-si.
16Á tīī bin ŋkùm cááyee tijin bí jī, ní kí tīī bin gàaǹee tiwampeeŋkaal bí pèen̄. Kun a yaa cáá an lákatèe, á dūú tīī biwɔfib. A yaa bíi tììyee, an taa nín̄ wù-si. 17Dū a-jinti kí tīī bin kā ki sūǹ deedeedaan kpoolee#4.17 Dū a-jinti... deedeedaan kpoolee: kpèè Yeer 16.7, Eesee 24.17,22., ama á taa ŋá míǹ an yaa sá unikpiti.
18«Á nīn fòol̄ uciŋfiti kamaa cee isaŋki, ní kí taa kpèè isaŋki in sá imɔntee fám. 19Tin kamaa poonee, á jāam̀ ti-Dindaan a-Nimbɔtiu, ní kí mèè ú kpòotī-si kí tàkan̄ nsan ŋun tèen̄ee poon, ní kí yàntī án bútí-si a-saŋkiŋŋi nì a-tuuŋŋi kɔkɔ poon. Di sá yii dinibul diba pée kpá ki cáá dinyil. Ti-Dindaan baba di tìì tigaajawan. Úǹ di tí yàntī un u lèe ń sìntī ditaŋkpiilin.
«Too, m-biki, á nīn téetí didàkal nee pu ní kí taa yàntī dí nyā a-pɔbilin. 20Kɔŋkɔnnee m-biki, m là á béé yii m dū animbil kúti kiiloobi alaataa ata ki bíl̀ Gabrii jipɔɔn Gabayeel cee Meedii tiŋki kin bi yíì Rageesee ni. 21M-biki, ti yaa kpántì biwɔfibee, á taa fàŋkì. Ama a yaa tɔ́ Unimbɔti, ki sáń ikpiti kɔkɔ nì i-bulifi ní ki ŋáań tin fáatiǹ ti-Dindaan a-Nimbɔtiuee, a béé yii a sá ugaajakpaan ní.»
Currently Selected:
Tobit 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.