Tobit 3
3
Toobii wimmeem
1M nìn kɔ́ kunimbaakpaaŋŋun, ki kíĺ ki bíi yáliŋkí ki sūǹ. Míǹ boonee ní m kíĺ ki bíi mèé nì iyaliŋki yii:
2«Ti-Dindaan, a sá deedeedaan ní,
ní a-tuuŋŋi kɔkɔ sá deedee tuuŋŋi.
A sá deedeedaan ní ki cáá mbaamɔn a-saŋyi kɔkɔn,
sii di sòoǹ duulinya bɔti.
3An yaa sée, ti-Dindaan, téetí m-pu.
Kpèè-mi kí taa dáaĺ m-tafal m-kpitii puɔɔɔ,
m-yìntitam puɔɔɔ,
m-baabi yam pu.
4Bi yīntiǹ a-marab.
An pu ní a yāntì ti-nannanliibi fúkúl̀-ti,
ki cúú-ti ki cūnnì kuyuŋu, ki kūū-ti,
ki bēel̀-ti ki láń-ti.
A nín jìn̄-ti ti yàl̄ ki kɔ́ atimbun ŋin poonee,
bi ŋúb́-ti ní ki sìí niin.
5A nín sòoǹ binib bɔti puee sá deedee ní.
A cáá mbaamɔn kí dáaĺ m-tafal man nì m-baabi kpitii pu,
di sá yii taa tɔ́ a-marab
ní kaa tí cōom̀ a-nimbiin ibaamɔn poon.
6Too kɔŋkɔnnee, pée dū-mi kí ŋá a nín là puee.
Fàtīí fōō m-fooku
ḿ taa ti nín̄ bí kitiŋ nee pu kí fàtīí gítí ntamin#3.6 fàtīí gítí ntamin: dūú ŋmàntī nì Diny 3.19, Uciŋ 12.7.!
An sɔ́ ḿ kpú ki jítiǹ ḿ nīn bí dimaŋfalin,
di sá yii m gbìl̄ bi sīī-mi fám
ní m bí kunimbaakpaaŋŋu poon.
M-Dindaan, nyāntí-mi dinimbinaamandi nee poon,
yàntī ḿ kɔ́ talku ŋuŋfilin
ní kí taa fàtī a-boon kí tīī-mi, m-Dindaan.
Tiŋman, an sɔ́ ḿ kpú
ki jítiǹ ḿ nīn bí nnaabu nee poon
m-maŋfal wiiŋyi kɔkɔ poon,
ní kí nīn gbìl̀ bi sìí-mi yéè!»
Saara siibiliŋ
7Ŋwiin gbanti mbaanti, Eekibataani tiŋki kin bí Meedii tiŋkinee, Roogeel bisal Saara nìn gbìl̄ u-baa tɔntɔnliibi binimpoobi kansikin ubɔ bíi sìí-u. 8Tin nìn jítèe di sá yii Saara nìn mɔ́ǹ ŋfunyɔm miluli pu ní. Ama ŋyunti kamaayee, ŋfaŋkpitim Asimoodee nìn kù u-cal kí wàatī gba ní u nì u ń nín kpāfì kii binib bin cáá tɔbee nín máaǹ kí nīn ŋáań puee. Utɔntɔnli gbanti nìn tùkū-u yii: «Sii di kù a-calib! A mɔ́ǹ miluli kɔkɔ pu dee, ama kaa fōō báà ubɔ yindi! 9A-calib yaa kpíìyee, ba pu ní a sàantí-ti? Nín̄ cá kí ŋàl̄-bi tí taa pée ká a màl̄ kibininjabiki àá kibinimpubiki!»
10Ŋwiin gbantee, Saara nìn kɔ́ kunimbaakpaaŋŋun. U nìn kíĺ ki bíi sūǹ ní ki nín kóò kudii kun tɔ́kɔ́ u-baa yɔkɔ puee kí bàà lúntí u-ba ŋŋmii kí kpú. Ama ní u dākafì ki lī u-ban yii: «Binib làá sìì m-baa kí lì yii: <A bàà cáá kibineeŋkaai, ní kì lúntì ki-ba ki-naabuŋu pu!> M yaa ŋá mimmee, m làá yàntī m-baa ń kpú#3.10 yàntī m-baa ń kpú: dūú ŋmàntī nì Diny 37.35, 42.38, 44.29,31. u-tikpitin nì kunimbaau. An puee, an nín bàà sá ḿ lúntí m-ba kí kpúee, m làá pùtì gbàam̀ ti-Dindaan ní úǹ u-ba ń kpɔ̀-mi, ní ḿ taa ti gbìl̄ binib sìí-mi m-maŋfal wiiŋyi kɔkɔ poon.»
Saara wimmeem
11Ŋyunti gbanti dicilpuee ní u yōoǹ u-ŋalii ki túĺ tɔkɔla ní ki mēē yii:
«Unimbɔti ulaŋŋaŋfiti, inyɔŋki sá a-yai!
A-yindi ń ká inyɔŋki kí nīn cá jaanjaan!
A-tuuŋŋi kɔkɔ ń nyɔ̄ŋkì-si kí nīn cá jaanjaan!
12Kɔŋkɔnnee, sii watil pú ní m fàtī m-ba ki túl̀,
sii watil pú ní m fàtī m-nimbiin ki túl̀.
13Yàntī ḿ yīkì kitiŋ nee pu
ní kí taa ti gbìl̄ binib sìí-mi talku.
14Ti-Dindaan, sii a-ba nyí, maa cáá tijɔkɔndi.
Báà uninja kaa gbēē-mi ki ká.
15Maa kɔ́ǹ mama m-ba yindi nì m-baa yindi icoo
kitiŋ kin bi cáań-ti kuyuŋu nee poon.
M sá m-baa sapɔmbaabil ní,
waa ti cáá kibiki kiba kin làá jī u-fakalee.
Waa cáá naal kaa tí cáá kinabiki
kin ŋūǹ kí cáá-mee.
M mɔ́ǹ bininjab biluli dee bi-kɔkɔ kpíì.
Ba pu ní ḿ nīn gíti bí dimaŋfalin#3.15 Dūú ŋmàntī nì Dikà 36.6-9.?
Ama ti-Dindaan, an yaa kaa fáatiǹ-si á kpɔ̀-mee,
kpòon̄ a-tafal kí pīlifì bi nín sìí-mi puee.»
Unimbɔti fōō Toobii nì Saara wimmeem
16Ŋyunti gbanti dicilpu dicilpuee, tinyool Nimbɔtiu fōō Toobii nì Saara wimmeem. 17Unimbɔti nìn tú ntuun Rafayeel ŋu dɔ́miń ki cáaǹ bi-liitil. Ŋu nìn cúú tinipɔn ki lēē Toobii nimbiliŋ pu ní u fātìi wál̀ Unimbɔti walifiŋu. Ŋu nìn fīī Raguweel bisal Saara ki nyántì ŋfaŋkpitim Asimoodee ŋaan, ní ki dū-u ki tīī Toobii jipɔɔn Toobiyaasi ticati. Di sá yii mara poonee, Toobiyaasi di nìn cáá nsan kí cáá-u kí wàatī ní bin kɔkɔ bàà là kí cáá-uee ń nín páań. Ŋyunti gbantee Toobii nyáń dicindi ki nín kóò u-diikun ní Raguweel bisal Saara mun nyáń kudii kun tɔ́kɔ́ u-baa diiku puee ki kpákatì.
Currently Selected:
Tobit 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.