Tobit 12
12
Rafayeel lēē u-ba ki dàkā
1Bi jíń tinimpucan jiŋaaliu ki dóòyee ní Toobii yíiń u-jipɔɔn Toobiyaasi ki bí-u yii: «M-biki, kpèè kí pà a-bɔɔ un céeǹ-see paati kí nyàab̀ tiba kí kūtì.» 2Ní Toobiyaasi kíí-u yii: «M-baa, ḿ tīī-u mana? Báà m yaa dū tigaajawan tin u tútuǹ-mi m cáań nee dijandi gba ki tīī-u, maa bíil̀ tiba. 3U fātìi gíiǹní-mi nì ŋgbampɔn, ki cáaǹ m-nimpuu, ki tútuǹ-mi m cáań animbil ní ki gíti cáaǹ si mun. Mana ní m làá tīī-u tíǹ gbanti kɔkɔ pu?» 4Ní Toobii bí-u yii: «M-biki, an kítì ú fōō tin kɔkɔ u cáańee dijandi.» 5Niinee Toobiyaasi yíiń Rafayeel ní ki bí-u yii: «Yòon̄ tin kɔkɔ a cáańee dijandi án nīn sá a-paati ní kí nīn cá nì ŋgbansɔŋfi!»
6Niinee Rafayeel yāntì Toobii nì u-jipɔɔn Toobiyaasi nyáń kinimpunaatii ní u bí-bi yii: «Ní jāam̀maan Unimbɔti kí māafì tin u ŋá ki tīī-nee binifoobi kɔkɔ nimbiin, bi mun ń jāam̀ kí gāā ilan kí nyɔ̄ŋkì u-yindi. Ní yàntī binib kɔkɔ ń béé Unimbɔti tuuŋŋi kii ŋi nín máaǹ puee. Ní taa ti tàan̄ kí jāam̀-u. 7An ŋān̄ unil ń dū ubɔti bɔɔŋŋi kí báĺ, ama Unimbɔti tuuŋŋi ŋiŋŋee, an sá bí dūú gāā ilan ní kí nyāntí-ŋi kí bíĺ mpaampiin pu.
Tí dū-ŋi kí gāā ilan kii an nín máaǹ puee. «Ŋámaan tiŋan, ní tikpitil tiba kaa làá bàń-ni#12.7 kaa làá bàń-ni: dūú ŋmàntī nì 1 Peet 3.13.. 8Á nīn mèé nì mbaamɔn kí nīn pūǹ biwɔfib tiwan kí kpántí deedeedaan sɔ́ǹ á dī nsaŋkpiti pu kí ká tigaajati#12.8 nsaŋkpiti pu kí ká tigaajati: dūú ŋmàntī nì Alaŋ 11.4.. An sɔ́ á pɔ̄ uwɔfi ki jítiǹ á kóoǹ sindaariya kí kpúkuń. 9Tiwampɔkaal gbanti fìil̄ unil ki nyāntí ŋkúmin ní ki fíntí ikpiti kɔkɔ. Bin bin pūǹ biwɔfib tiwanee làá kàl̄ kitiŋ nee pu kí yúntí. 10Bin bin ŋáań ikpitee nì bin kaa ŋáań deedee tuuŋŋee sá bíǹ bi-ba nannanliibi ní.
11«Kɔŋkɔnnee, m làá tùkù-ni ibaamɔn kɔkɔ kaa làá báĺ-ni tiba. M dáá láá yāntì ni béè tin bí nee yii: <An ŋān̄ unil ń dū ubɔti bɔɔŋŋi kí báĺ ní kí lēē Unimbɔti tuuŋŋi kí páań mpaampiin pu kii ŋi nín máaǹ puee. 12Too, ŋyunti ŋun a nìn bíi mèéyee, Toobii, ki kpáaǹ Saara muee, man di nìn fōō ni-wimmeem ki cáa cūnnì ti-Dindaan tinyooldaan cee, ki kpáaǹ a nín nìn síb̀ bitaŋkpiibee mun. 13A nín kaa nìn gūgufì ki yāntì tijin tin a bíi jīǹee ki nyīī ki yíkì ki cūtìi síb́ utaŋkpiilee, ní Unimbɔti túnní-mi a-cee ḿ cɔ̄ŋkì-si. 14Ama ŋyunti gbanti mbaanti ní Unimbɔti túnní-mi ḿ cáaǹ-si, kí kpáàa cáaǹ a-coopu Saara mun. 15Man ní bi yíì Rafayeel, ituun iluli in yú ti-Dindaan nyooti nimbiin, ki tūǹ atuun ki tīī-uee ŋubɔ#12.15 Dūú ŋmàntī nì Luuki 1.19, Dilee 8.2..»
16Toobii nì Toobiyaasi kaa nìn gíti nyí tin poon bi bée. Niinee bi tātìi dōoǹ dicincibil ní tifaandi cúú-bi. 17Ama ní ŋúǹ bí-bi yii: «Ní taa fàŋkìmaan tiba! Ŋgbansɔŋfi ń nīn bí ni-cee. Nín̄ jáaḿmaan ti-Dindaan ŋyunti kamaa! 18M nín nìn bí ni-ceeyee, an kaa sá yii m nín cáá kulaŋŋaŋfitiiuee pu ní m nìn bí ni-cee, ama an sá Unimbɔti di là míǹ. Úǹ ní ni máaǹ kí nīn jáaḿ baabadal. Úǹ ní ni máaǹ kí nīn nyɔ́ŋkí. 19Ni yaa nìn ká m bíi jīǹee, ibaamɔn poonee, maa nìn baasii jīǹ, ama an ŋáań-ni kii m bíi jīǹee ní. 20Míǹ puee, nyɔ̄ŋkìmaan ti-Dindaan kitiŋ nee pu, kí yòon̄ Unimbɔti yilpu. Kpèèmaan, m fàtīi gítí un di túnní-mee cee dee. Ŋmàmaan tin kɔkɔ bāań-nee kí bíĺ.» Ntuun lī míǹ ki dóòyee ní ki yíkì ki nín jɔ́ḿ yilpu.
21Bi nìn yíkì, ama baa nìn gíti ŋūǹ kí wāl̀-ŋu. 22Bi nìn bíi jáaḿ Unimbɔti, ki nyɔ́ŋkí-u ní ki pàkà-u u-tuŋkpaaŋŋi ŋin ní u nìn ŋá gbantee pu. Unimbɔti tuuŋŋu ŋubɔ di nìn lēē ŋu-ba ki dàkā-bi!
Currently Selected:
Tobit 12: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.