Tobit 11
11
Toobii ká dicáaǹdi
1Ŋyunti ŋun bi tóob́ Kaseeriim tiŋki kin bí Niiniifi tiŋki nyɔkɔpuee ní Rafayeel bí Toobiyaasi yii: 2«A nyí tin poon ní ti nìn yíkì ki yāntì a-baayee. 3Tí lìntī a-nimpuu nyɔkɔpu kí cùú bɔ́ntí mmɔŋki kí wàatī ú nín bàń.» 4Ní bi-liitil táá ki búntì. Rafayeel nìn tùkū Toobiyaasi yii: «Á yàntī ujɔmee kaam ń nīn bí ki kɔ́ĺ-si.» Toobiyaasi bɔkɔ nìn pá bi-boon. 5Ŋyunti gbantee, Ana úǹ nìn kā ki kpèé nsan ŋun pú ní u-jipɔɔn làá nyānní kí dāan̄ee. 6Dicilpuee u kpēēyee úǹ di páaǹnée ní u cūtìi tùkū u-baa yii: «Kpèè a-jipɔɔn di dòońee, u nì uninja un céeǹ-uee.»
7Kí wàatī Toobiyaasi ń bà u-baa ceeyee ní Rafayeel bí-u yii: «M nyí a-baa nimbiliŋ nín làá ŋúbitée. 8Á dū ujɔmee kaam kí nùkù u-nimbiliŋ pu. Nnyɔkɔ nee làá tɔ̄ tinipɔn pu ditundi ní tinipɔnee ń wāŋkì u-nimbiliŋ pu. Niinee a-baa làá nyā ijɔfin ní kí fàtīí ká ŋwalifi.»
9Ana nìn sáǹ ki cūtìi yùkū ki léeǹ u-jipɔɔn sil pu ní ki bí-u yii: «M fātìi wál̀-si m-biki, kɔŋkɔnnee m ŋūǹ kí kpú#11.9 kɔŋkɔnnee m ŋūǹ kí kpú: dūú ŋmàntī nì Diny 46.30.!» Ní u kíĺ ki bíi sūǹ. 10Toobii nìn nyīī ki yíkì ki còom̄ ki gbéetí ki dī dicindi punyɔkɔpu ki nyáń. 11Toobiyaasi nìn cōom̀ ki túkuǹ-u, ki ŋúb́ ujɔmee kaam ki púfì u-nimbiliŋ pu ní ki ŋúb́-u tiŋan ki lī yii: «M-baa, ká dipɔbil!» U nìn dū nnyɔkɔee ki ŋmītì u-nimbiliŋ ní ki ŋúb́-u. 12Míǹ boonee ní u dū u-ŋalii liitil ki gbátì gbátì tinimpɔn tin kā dinimbil kamaa poonee. 13Niinee Toobii yùkū ki léeǹ u-sil ní ki kíĺ ki bíi sūǹ ki lì yii: «M-jipɔɔn, m-nimbiliŋ walifiŋu, m fātìi wál̀-si!» 14Ní u gíti lī yii:
«Tí nyɔ̄ŋkì Unimbɔti!
Tí nyɔ̄ŋkì u-yiŋkpaandi!
Tí nyɔ̄ŋkì u-circir tuuŋyi kɔkɔ!
U-yiŋkpaandee ń nīn bí ti-pu!
Tí nyɔ̄ŋkì ituun kɔkɔ abin abin!
Di sá yii ti-Dindaan di nìn dū falaa nee ki tɔ́ m-pu,
ama kɔŋkɔnnee m fātìi wál̀ m-jipɔɔn Toobiyaasi.»
15Toobiyaasi nìn kɔ́ dicindin nì ifaal ki jáaḿ Unimbɔti mpɔn. Niinee ní u máafì u-baa u-saŋŋu nín cōom̀-u puee, nì animbil ŋin u cāabìńee nì min ní u cáá Raguweel bisal Saarayee. Ní u gíti kútì ki lī yii: «Kpèè úǹ di dòońee, u bí kɔŋkɔnnee Niiniifi tiŋki punyɔkɔki caŋin.»
16Toobii nìn bí ifaalin ki jáaḿ Unimbɔti ki cá kí tūŋkì u-coopu Niiniifi tiŋki punyɔkɔki watil pú. Niiniifi yab nín ká-u u còom̄ sɔkɔmii ubɔ kaa līī u-nyɔkɔpu ki kpòotī-uee ní an ŋá-bi bitii. Toobii nìn sòoǹ báà ŋma nimbiin yii Unimbɔti súń u-saai ní ki cúú u-nimbiliŋ ki ŋúbitì. 17U nín sútìi pìl̄ u-jipɔɔn Toobiyaasi nimpuu Saarayee ní u mēē ki bīiǹ u-pu ki lī yii: «M-bisal, sii nì nsan! Tí nyɔ̄ŋkì a-Nimbɔtiu un di cáań-si ti-cee dooyee, m-bisal! Unimbɔti ń bìin̄ a-baa pu! Ú bìin̄ m-jipɔɔn Toobiyaasi pu ní kí bìin̄ si mun pu, m-bisal! Kɔ́ a-diikun, si nì nsan! Sii di yì dibiindi nì mmɔn! Kɔ́-mi, m-bisal!»
18Ŋwiin gbantee, Juuda yab bin kɔkɔ nìn bí Niiniifi tiŋkinee nìn bí mmɔŋkpaanni ní. 19Toobii weeb Ayiikaar nì Naadaan mun nìn dɔ́miń u-cee ki nìn bí ifaalin.
Currently Selected:
Tobit 11: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.