Siracide 4
4
1M-jipɔɔn, taa ŋmìntī usoodaan
tin u làá dūú kpíiǹ u-bee,
taa yàntī unandaan ń cīití u-nimbiliŋ ń tin lóoĺ#4.1 B. 1-10: dūú ŋmàntī nì 7.32, Ditee 15.7-8, Yees 1.17, 58.7, Yoob 29.12-17, Alaŋ 3.27-28, 31.8-9, Toob 4.7, Luuki 16.19-31..
2Taa yàntī un ŋkùm cááyee ń jī falaa,
taa yàntī un bí kunandaŋunee ń gíí diŋuul.
3Taa dū digìńdi kí kūtì-u.
U nyàab̀ tiba a-cee, taa yàntī ú kàl̄ kí gīī.
4Taa jà unil un an páb́ u bíi mèé-si tibee,
taa fàtī a-boon kí tīī usoodaan.
5Taa fàtī a-boon kí tīī unandaan,
kí taa tīī ubɔ diyimɔɔl ú tɔ̄-si mbusu.
6Di sá yii u-nyɔkɔ yaa túŋkì
ní u yaa tɔ́-si mbusuee,
u-náanliu làá fōō u-wimmeem.
7Yàntī bí nīn néeń-si samaa poon,
a yaa ká unikpaanee, á tìntī a-yil kí tīī-u jilma.
8Kpòon̄ a-tafal kí pīlifì ufalaadaan bɔti,
ní kí kíí-u nì kinyɔɔmɔɔi nì ŋgbansɔŋfi poon.
9Fīī unil un bi wɔ́b́ee u-wɔ́biliu ŋaan.
A yaa cáá tibɔti kí sòoǹee, á taa fàŋkì.
10Nín̄ sá kii ubaatee ki tīī ataŋkpiibil,
ní kí nīn sá kii calee ki tīī bi-na.
Niinee a làá nīn sá Yilpu fɔ́ŋŋŋ yɔu jipɔɔn,
ní ú nīn néeń-si ki jítiǹ a-na nín néeń-si puee.
Iciin dàkà un nyàab̀-iee ní
11Iciin yòontí i-jipɔmbi yilpu,
i kpèé bin nyàab̀-iee tiŋan ní.
12A yaa néeń Iciinee, a néeń dimaŋfal dee.
Bin péetí kutaafaau pɔ̀lpɔl ki nyàab̀-iee
làá dāá nīn bí mmɔnni.
13Unil un yaa cáá-iee làá ká tinyool.
laakin u yaa cée, ti-Dindaan làá bìin̄ u-boon#4.13 Dūú ŋmàntī nì Alaŋ 3.16-18..
14Binib bin bí i-tundinee
sá Circir Nimbɔtiu yab ní.
Binib bin yaa néeń i-bɔtee,
ti-Dindaan mun néeń-bi ní.
15Unil un pílifí i-bɔtee
làá nīn sá deedee bɔsoonliu,
ní un dū u-ba ki nákáǹ-iee
làá nīn pée bí ŋgbansɔŋfin.
16Un yaa máká i-puee,
làá dāá fōō-i kii difakalee,
ní u-naantiibi ń dāá nīn yì-i
kí nīn pée cáa cá jaanjaan.
17I làá péé kí kpòotī-u kí tàkan̄ asaŋgɔŋgɔlin,
kí yàntī tifaandi nì dinyoondi ń kɔ́-u.
I làá dàkà-u kí dáaĺ u-tafal
kí tin sāā ŋyunti ŋun ní
i làá nīn kíǹ ki cáá u-pu dimákalee.
I làá dū i-bɔkpaaŋi kí cɔ̄ŋkì-u.
18Míǹ boonee ní í fàtīí gítiń u-cee,
kí yàntī án mɔ̄ɔkiǹ-u ní kí dū u-bɔbalkaati kí dàkà-u.
19Ama udaan yaa kākatì
ki wāatì Iciin saŋŋuee,
i làá dū-u kí fá
ní kí yàntī ú wāŋkì.
Taa nín cáá a-ba pu icoo
20Nín̄ dāantí ki kpèé tin bí ki jītée kɔkɔ
kí kpāafì a-ba kí taa ŋá ikpiti,
kí taa nín̄ cáá a-ba pu icoo.
21Di sá yii icoo iba bí ki cáǹ unil ikpitin,
ní iba mun cáǹ unil tinyool nì kulaŋŋaŋfitiiun.
22Taa kpèè kí sɔ́kɔ́ a-ba,
kí taa yàntī icoo ń nàan̄-si.
23Án yaa bālifì á sòoǹee, sòoǹ.
24A-sooŋyi poon ní bi béetí yii a sá uciŋfiti,
ní anyɔɔbun ŋin nyēē a-nyɔkɔnee di dàkà a-nyil.
25Á taa sòoǹ kí jáǹ ibaamɔn,
ama á yàntī icoo ń cúú-si tin saa nyée pu.
26Á bìitī a-kpitii puee ń taa nín̄ cáá-si icoo,
di sá yii saa ŋūǹ kí pìin̄ dimɔɔl nsan dí taa pùub̀.
27Taa yàntī ugbaan ń jɔ̄m̀ kí tɔ́kɔń a-pu,
kí taa yàntī upɔɔl ń jī a-pu dinyandi.
28Já áli kí tin kpú ibaamɔn pu,
ti-Dindaan Unimbɔti làá já kí tīī-si.
29Á taa dàkà tininjati isoon poon,
kí taa nín̄ dàkà diwutijool nì didɔndi a-tundin.
30Taa nín̄ sá kii gbikintee a-cindin,
kí nīn sá ufaantija a-tɔntɔnliibi kansikin.
31A-ŋal ń taa nín̄ wāā ki cí kí fōō,
ama ní an yaa tin sá á tīīyee, á dū-ŋu kí ŋúb́#4.31 Dūú ŋmàntī nì Atuun 20.35..
Currently Selected:
Siracide 4: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.