Siracide 3
3
Bibaatiibi nì bi-biyaamu
1M-biyaamu, pīlifìmaan ni-baa saŋkii#3.1 B. 1-16: dūú ŋmàntī nì 7.27-28, Disa 20.12, Alaŋ 30.17..
Nín nóómaan-i ní kí ká difiil.
2Di sá yii ti-Dindaan
di tīī ubaati mpɔn u-biyaamu pu,
ní ki pú unaati nsan u-jipɔmbi pu.
3A yaa tīī a-baa jilmee, a kāntí a-kpitii pɔ̄tam ní.
4A yaa tìì a-na tinyoolee,
a bíi kōontí tigaajati ki yōontí a-ba ní.
5Un tìì u-baa tinyoolee dāa kāntí
úǹ u-ba biyaamu pu dipɔɔpindi.
Daliŋkin u làá dāá mèèyee,
ti-Dindaan làá dāá pīlifiǹ-u.
6Un yaa tìì u-baa tinyoolee
làá kàl̄ kitiŋ pu kí yúntí.
Un yaa tɔ́ ti-Dindaanee
tìì u-na dipɔɔsɔŋkil.
7U tūǹ ditundi ki tìì u-baabi kii u-dindambee ní.
8Tīī a-baa jilma
atuun nì anyɔɔbun poon.
Mimmee u-biindi làá jēetí a-pu.
9Di sá yii ubaati nín tìì dibiindi diŋyee
tìì u-biyaamu dicaŋku pu mpɔn ní,
ama unaati yaa tɔ́ u-biyaamu mbusuee,
an bíiĺ kudicaŋuee nyeel ní.
10A-baa yaa fá u-jilmauee, á taa nín̄ gúntí a-ba.
U yaa fá u-jilmauee,
an kaa ŋūǹ kí tīī-si tinyool.
11Di sá yii bi yaa tīī a-baa jilmee,
an sá sii a-ba jilmau ní.
Bi yaa kpēē ubinaati fámee,
an sá icoo ní ki tīī u-biyaamu.
12M-biki, kpèè a-baa u-puti poon,
kí taa kɔ́ǹ-u digìńdin u-maŋfal wiiŋyi poon.
13Báà u-yil yaa lábitì, á jī u-pu kimɔtii.
Sii un dáá pɔ̄ɔ̄yee, á taa kpèè-u fám#3.13 Dūú ŋmàntī nì Alaŋ 23.22..
14Di sá yii Unimbɔti kaa làá súntí
tiŋan tin ní a ŋá a-baayee pu.
Tì làá dāá ŋāŋkì a-kpitii kupaau.
15A yaa láa kɔ́ dinimbinaamandinee,
ti-Dindaan làá dāá téetí a-pu.
A-kpitii làá dāá wāŋkì
kii ntaayim nín dùntī pu ŋwìiń puee.
16Unil un dū u-baa ki fée
náań nì un bíi sìí Unimbɔtee ní.
Unil un kɔ̄ntí u-na digìńdee,
ti-Dindaan làá tɔ̄ udaan mbusu#3.16 Dūú ŋmàntī nì Alaŋ 19.26..
Dibasintil paatii
17M-jipɔɔn, sìntī a-ba taapu
tin kɔkɔ ní a ŋáańee poon.
Niinee binib làá nīn néeń a-bɔti
ki jítiǹ un pūǹ binib tiwanee.
18A yaa kpántì unikpaanee,
míǹ ní a máaǹ kí mɔ̀tīí sìntī a-ba taapu.
Niinee ti-Dindaan làá fōō-si nì kulaŋŋaŋfitiiu#3.18 B. 18: dūú ŋmàntī nì Dikà 12.3, Alaŋ 3.34, Fiil 2.3..
20Di sá yii ti-Dindaan pɔŋŋu sá ŋkpaan,
ama bin sīntiǹ bi-ba taapuee di tìì-u tinyool.
21Taa nín̄ nyàab̀ tin pɔ̄ɔ̄ ki jítiǹ-si tikpilee,
kí taa fíkití kí nyàab̀ kí béé tin jítiǹ a-pɔŋŋu puee.
22Nín̄ pée dàkafī marab bin bi tīī-see pu,
taa nín̄ nyàab̀ kí béé tin di bí dibalinee#3.22 Dūú ŋmàntī nì Ditee 29.28..
23Taa dū atuun ŋin jítiǹ-see
bɔti kí dūú páb́ a-ba.
Tin a gíti dáá ká duulinyanee
jítiǹ tin unil ŋūǹ kí gbìl̄ taapuee.
24Di sá yii binib tikpil nín nyàab̀
kí gbìl̄ tikɔkɔ taapuee yāntì bi wáŋkì,
ní bi-gbaandi landɔkɔi yāntì bi gáatì.
Dibayoondi
26Upɔɔgbifindaan dāa kúntíǹ tikpitil ní,
un néeń dinimbinaamandee dāa kúù di-poon ní.
27Upɔɔgbifindaan làá dāá ká agìń tikpil.
U ŋáań tin kaa ŋān̄ee ní ki cáá ikpiti ki kútí ikpiti pu.
28Ulambidaan nimbinaamandi kaa cáá dicáaǹdi,
di sá yii ikpiti báaǹ u-ni inyaan.
29Unil un cáá dinyilee dàkafī biciŋfitiibi laŋkpaŋŋi pu ní,
uciŋfiti nín là puee di sá ú ŋátí u-tafal tiŋan kí pīlifì.
Tí nīn tútúǹ tɔb
30Kii nnyim nín gbíntí ŋŋmi ŋun fòol̄ee puee,
míǹ ní a yaa pú uwɔfi tiwanee, an pítí ikpiti.
31Unil un ŋáań tiŋanee
bɔ́ntí foolboon pu ní.
Ŋwiin ŋun u làá dāá lítée,
u làá dāá ká utikinli#3.31 B. 30-31: dūú ŋmàntī nì Ditee 15.7-11, Alaŋ 19.17, Toob 4.10, Maat 5.7..
Currently Selected:
Siracide 3: BASSARDC
Highlight
Copy
Compare
Share
Want to have your highlights saved across all your devices? Sign up or sign in
BIBLE EN N'TCHAM (Bassar) © Alliance Biblique du Togo, 2013.